Football Agent I bihchiang lawk ang aw – R.Malsawma (Asawma)

Estimated read time 8 min read

Mizo zingah pawh Football hmanga ei zawng tam tak kan lo awm ve ta a. Football hmanga ei zawng zingah hian tun dinhmunah chuan Agent nei lovin a awm theih tawh lo te pawh a tih theih awm e. Heng kan Mizo professional footballer te ho hian Agent an nei vek ti ila kan sawi sual awm lo ve. India ram bik hi han thlir ta ila, kum 2013 khan Indian Super League (ISL) chu din niin October 2014 ah khelh tan a ni a. ISL khelh anih hnu atangin nasa takin India football ah hian sum che vel a tam lehzual a ni.

Tun hma chuan Kolkata giants kan tih mai East Bengal leh Mohun Bagan te bakah Goa lam atangin Churchill Brothers SC leh Dempo SC te hian sum an hmang nasain players hlawh te pawh an pe tha a, bak club dang te hi chu sum an hmang hnem ti a hriat an ni lem lo. Kum 2013 a IMG-Reliance, AIFF leh Star Sports ten ISL an rawn chhawpchhuah tak hnu ah chuan India mihausa tam tak leh celebrity ten club an rawn nei ta a, an rawn nei satliah mai ni lovin kalphung fel tak neiin sum pawh an rawn thehchhuak nasa ta hlawm hle a ni. Players in chuhna a nasa a Players te hlawh tam taka sawmtu an rawn awm ta a ni. Hemi hunlai atang hian Football Agent te pawh nasa takin kan ramah pawh an rawn inlar ve tan ta a ni.

Agent chuan eng hna nge an thawh kan tih chuan, player te aiawhtu ti ila kan sawi sual awm lo ve. Heng Agent te hian Player te aiawhin Club leh company te hnenah negotiation leh business deal tihsak hi an hna ber chu a ni. Company kan tih hian Agent te hian an player te ballboot, thawmhnaw, suppliments, energy drink etc a sponsorship an hmuh theih nan theihtawp an chhuah bawk thin a ni. Kan hriat angin player tam takte hi chu ziak leh chhiar thiam lem lo leh mi biak thiam lem lo mi zakzum te te an ni a. Chung ho tan hlei hlei chuan Agent te hi an pawimawh lehzual thin a ni.

Agent te hi a tlangpuiin mi lehkhathiam, tawhhriat ngah leh mi biangbiak thiam em em an ni a, chubakah Contract chhung thu zir chiang peih leh an Players te that na tur dah lal thiam tak an ni tlangpui a ni. Hetia Agent te hian an player te ai an awh avang hian club atang leh inbiak rem dan azirin an players te atangin ei an lo nei ve thin a. India ramah hi chuan a tlangpuiin Agent te hian 5% – 15% an ei thin a. A tam zawk chuan 5% hi an ei ber a ni. 5% an ei kan tih hian entirnan Player pakhat hi Club in lo la duh ta se, a Agent hian season khat ah nuaih za (1 Cr) a hlawh tur ani tiin club chu a dawr ang a, a lo hlawhtlin chuan Club chuan player hlawh (1 Cr) chu season khat chhung khan a tlangpuiin vawi sawm pek ah an pe tla ang a, Agent fee (5% of 1 Cr = 5 Lakhs) erawh chu a tlangpuiin Club in vawi khat pekah season tawp dawn ah Agent kha an pe thin a ni. Contract offer chungchangah pawh players langsar leh langsar lem lo inkar hi a hla thei viau mai a, players langsar te chu Club hian Agent fee pek hi an hreh lo tlangpui a ni. Amaherawhchu players langsar lem lo hi chuan club hian agent fee pek an hreh thin avangin Players leh agent khan inremsiamin a hlawh atangin thla bia an Agent te pek chang te pawh an nei ve thin bawk a ni.

Mizo te zingah hian Football Agent License nei hi an awm keichuan ka la hre lo va, an lo awm a nih pawhin an tam lovang. Agent nih hi thil awlsam tak niin lang mahse Agent tha nih erawh chu thil harsa tak leh hna hahthlak tak a ni tih a chiang reng. Kan ramah te ngat phei chuan Football Club Owner, Technical Director, Manager etc te connections va neih that mai piah lamah va biak peih a va kawmngeih te pawh a tul viau a ni.

Tun dinhmun ah hian India ah hian Football agent 300 chuang awm anga hriat a ni a, mi tam zawk hi chuan agency/company din kher lo hian hna dang thawk pahin football agent hi an ni thin a, mahse heng ho hi chuan an hlawhtling lovin an teirei peih lo tlangpui thin a ni. Kan ramah pawh hian mumal taka license nei thlap, Agency company din te pawh an awm nual a ni. Chung ho zingah chuan ka hriat ang ang te leh kan mizo players tu te nge awm tih te kan hriatna tizau atan han thailang dawn ila.

1. World 1 Sports. World 1 sports hi tun hma kha chuan Football Solutions ti a hriat lar an ni a, an hming an thlak chhan hi chu foreign company te nen zau zawka an thawh ho duh vang te pawh ti ila a sual awm lo ve. An CEO hi Varun Achreja a ni. Anni hian Champhai lamah Young Legends League te lo kalpuiin, Mizoram ah hian hma an rawn la nasa thin hle a, an mahni lo hmelhriat pawh kan awm nual ang. Anni hian players 68 neiin India Football Agency te zingah chuan an nei ngah ber nia hriat a ni. Tunah hian anni hnuaiah hian kan Mizo players tha awm te tlem a zawng han tarlang ila.
i) Jerry Mawihmingthanga
ii) Jerry Lalrinzuala
iii) K.Lalthathanga (Puite-a)
iv) Daniel Lalhlimpuia
v) Lalrindika Ralte (Didika)

2. Best of You Sports. Anni pawh hi tunhma a The Football Edge kha an ni a, Best of You Sports Global, Foreign lam nen tie up an neih avangin Best of You Sports, India tih an ni ta ani. An agency CEO hi Anuj Kichlu a ni a, experience nei ngah tawh tak niin Baichung Bhutia leh Renedy Singh te lo enkawl tawh thintu an ni. Anni hi a hma kan sawi te ai khian players hi an nei tlem zawk a 65 nei ni a hriat ni mahse Sandesh Jhingan, Jeje Lalpekhlua, Pritam Kottal etc te an neih avangin India Football Agency-te zingah chuan players market value belhkhawmin hlutna nei sang ber an ni. Anni hian Mipa mai pawh ni lovin hmeichhia player te pawh an nei. Chung zingah chuan tuna Rangers FC a khel mek Bala Devi pawh hi a tel a ni. Kan Mizo players tha awm te han tarlang ve leh ila.
i) Jeje Lalpekhlua
ii) Lalengmawia (Apuia). Apuia hian tun hnaiah a agent hi a thlak nia hriat a ni.
iii) Laldinliana Renthlei
iv) Lalramchullova

3. Four Flags . Anni hi agency hi tun hnai ah hian an thang chak hle a ni. Four Flags founder hi Sonu Lamba a ni. Anni hian India Football Legend Sunil Chhetri an nei a ni. Sunil Chhetri bakah hian Manvir Singh, Udanta te ho pawh an awm ve bawk a, tuna kan India Senior team (World Cup Qualifiers khelh zawh tak) ah hian players thawh hnem ber nia a hriat an ni. Mizo player erawh hi chu an nei tam vak lova an neih zinga ka hriat te han tarlang ve le ila.
i) Edmund Lalrindika
ii) Lalengzama Vangchhia

Heng kan tarlan tak pathumte hi India ramah chuan tuna kan football agency kan neih that ber te nia hriat an ni a, an zingah hian tu nge tha ber tih erawh sawi thiam a har hle. (Vanneihthlak takin anni, agency founder te khi Football avanga ka hmelhriat te leh ka thiante ka tih theih vek an ni a. An vai hian an smart hlawm hle a ni.)

Heng agency pathum ho bakah hian Lianzuala Chhangte awmna The Sports Company, Treble Sports Management leh Birbal Sports and Entertainment, kan Mizo player tam tak awmna hi Top 10 Agency thlang dawn se chuan an lang pha ve ngei chuan ka ring.

Kan Mizo players football lo khel tawhte leh la khel zel turte hian Agent kan thlan thiam hi a pawimawh em em a ni. Kum 18 la tling lo phei chu Agent neih hi danin a la phal lova, kan nu leh pa te hi kan Agent te chu an ni. Agency te nen inremna siam a nih dawn pawhin kan nu leh pa ten inremna an siampui zawk tur a ni. Hei hi tuna Mizo players Academy hrang hranga awm mek te leh lo la khel zel turte hian kan hriat a tha. Agent thlan hi hmanhmawh chi a ni lova, chuvangin Agent nei turin keiman performance ka nei em tih te pawh kan inzawh a pawimawh awm e. Agent tha tak neiha keimahni kan that leh si loh chuan awmzia a awm lo ve thei bawk.

Chuvangin Agent te hi an awm belh zel dawn niin a lang a, chumi hunah chuan “i Agent ka lo ni ang e” ti-a sawmna dawn hi hlawhtlinna a la ni lo tih hriat a tha. Sawmna kan dawng a nih pawhin uluk takin eng agency nge an nih, eng nge an hmalak tawhna leh tute nge an player te, ka kum ang rual an tam em tih leh ka position-a khel ve an kawl hnem tawh em tih te lo zawh nachang hriata uluk taka thuthlukna siam a tha ber ang.

(Article ziaktu Asawma hi Mizoram-a football zirna, Tata Trusts Centre of Excellence Manager ni lai a ni a, Mizo zinga (Certified/Trained) Match Commissioner pahnih kan neih zing ami a ni bawk.)

You May Also Like

More From Author