Covid-19 a darh nasat leh tâk avangin Europe ram hrang hrangah lockdown kalpui tura hmalakna a awm chho leh ta!
France chuan Ningani zanlai aṭangin lockdown an puang a, mi tam takin an khawpui Paris chhuahsan an tum a, an ri mup mup tih chanchinthar-ah te kan hmu in a rinawm a. Tûn ṭuma lockdown kalpui an tum dân erawh zirna inte an khar dawn lo va, chutihrual chuan sumdawnna hmun tam zawk chu khar a ni dawn thung. Football erawh an khel chhunzawm thei dawn nge dawn lo chiang taka sawi theih a ni rih lo a ni.
England-ah chuan karleh Thawhṭanni ah lockdown hi puan a ni dawn niin The Times chuan an tarlang a, Nilaini aṭangin khauh taka kalpui turin hmalak a ni dawn niin an tarlang bawk. England-ah hian lockdown hi a hma aia zawnga khauha kalpui an tum ni a sawi a ni a, football an khel chhunzawm thei dawn nge dawn lo pawh sawi chian a har rih hle.
Belgium pawhin ram pum huap lockdown an puang a, Italy leh Germany te pawhin ram pum huap lockdown an kalpui leh ṭan a. Netherlands pawhin partial lockdown karkhat chuang an kalpui tawh bawk. Mahse kumtir anga khauh taka lockdown an kalpui ang erawh kha chu ram tam zawk hi chuan an kalpui thei rih lo va, lockdown duh lo mipui in buaina te siama kawngte an zawh avangin eng emaw chen chu hmalak a la harsa te pawh a ni maithei.
Hetiang a nih chhoh avang hian Europe a football kal zel dân tur pawh hi sawi lâwk a har ta hle a, fixture siamsa leh ruahmanna awm sa angte hian league hrang hrang bâkah European competition-te hi an kalpui thei angem tihte tunah hian zawhna a awm chho leh mêk.
