Lo kan vah dawn chuan Chem hriam tak kan neih a ngai a, chutiang bawk in Football kan pet dawn chuan a hmanraw tangkai ber chu BALL BOOT a ni awm e!! Ball Boot hi a that leh that loh ah hian inkhelh a ti nuam in a nuam lo thei a, chuvang chuan player lar tak tak te pawh hian Ball Boot duh bik an nei thin tih kan hre theuh awm e.

NIKE GS : Nike GS hi 2012/13 ah release tur a ruahman mek a ni a, Aug ni 15 Premier league tan hma a release tur a tih a ni. Rooney te ho chuan an bun ngei ang!! A siam tute chuan he boot hi Football Boot awm tawh zawng zawng a zang ber, tlanpui nuam ber leh environment condition nen inmil thei tur a duan a ni e an ti a, an chhuang hle. €300 man vel tur a ni dawn a, tun Summer Olympic London a neih turah hian Brazilian star Neymar chuan an rawn bun hmasa ber dawn a ni. Nike GS no 9 hi 160 gram a rit a ni a, chu chu I-phone mobile nen a rih dan a in ang vel lek tihna a ni!!

Football expert ten an review hnuah Football Boot tha ber ber ( best boot of all time ) an tih zing a a tha zual top 5 te hi han bel chiang dawn teh ang.

1)Adidas Predator : Hei hi chu kan hre lar viau awm e. Predator hi Adidas hian 1994 atang in an siam chhuak tan tawh a, tun thleng hian version 14 lai an siam tawh a ni!! David Beckham, Zinedine Zidane leh Steven Gerrard te ball boot hman thiam tih pawh kan hre theuh awm e. Predator an fak bikna te chu Touch,Precision leh PowerSwerve ah te a ni a, a awmzia chu ball lak a ti nuam in ball pet thlawh leh petnat a pui hle tihna a ni. Predator hi Jonny Wilkinson England Rugby Captain in 2003 Rugby Wolrd Cup ah khan a bun a, a champion pui bawk a, khami hnu atang khan Rugby player te pawh in an bun nasa hle.

2) Nike Mercurial Vapor : Nike Mercurial Vapor hi Ball Boot lar tak a ni a,a original chu Mercurial Line ni in Brazil Ronaldo khan World Cup 1998 ah a rawng pawl leh gold colour inchawhpawlh a rawn bun hmasa ber a,kha tih hun lai a Boot zang ber a ni a, 2002 ah Vapor hi a rawn chhuak ta bawk a ni. World Cup 2002 ah Ronaldo, Carlos leh Thiery Henry ten an rawn bun lar a. An fak na ber chu tlanpui a ti nuam bak ah ball pet a ti dik (accurate) em em hi a ni. A latest release Mercurial Vapor Superfly phei chu Robinho, Cristiano Ronaldo, Didider Drogba leh Zlatan Ibrahimovic te pawh in pet goal nan an hmang nasa hle a nih hi.

3)Puma King XL : A hmel en in a tlawm hmel na a, ball boot tha tak zawng a ni e!! Pele, Eusebio leh Maradona te lo lar pui boot a ni ve tlat. Man City star Sergio Aquero pawh hian a puzawn Maradona in bun rawh a tih vang nge, a bun ve ziah thin. Puma hian Adidas te ang in a zang zawng an ngaituah vaklo a, leather ngat an hmang reng a, a tlo hle a ni. Keini tlang ram lei char leh Astro Turf a pet tur tan chuan a tha ber zawk hiam maithei a ni.!!

4)Adidas Copa Mundial : He Ball Boot hian lung a ti leng a, Adidas classical three stripe ngei mai hian a ti original em em bawk!! A hmasa ber chu 1979 ah Copa hunlai in Adidas in an siam chhuak a, World Cup 1982 ah te chuan hman lar ber ber a ni. Kangaroo vun atang a siam ni in an sawi. 2007 khan he boot kum 25 a tlin lawmnan Adidas in version thar an siam chhuak bawk. He boot bun tu lar deuh te chu Franz Beckenbauer, Juan Sebastian Veron, Kaka leh Xabi Alonso te an ni.

5)Nike Tiempo : He boot hi Ronaldinho lar chhuah pui boot a ni a, an fak em em na chu bun a nuam (handling) em vang a ni. 1994 World Cup ah Romario leh Maldini ten an rawn bun hmasa ber a, version hrang hrang siam chhuah nual a ni tawh a, a thar ber chu Tiempo Legend IV Elite. Nike Teimpo hi Astro Turf ah hman a nuam a, tin training na boot atan pawh an hmang nasa hle. Tiempo hi Football Boot hmasawnna (development) a hmathar kaipui tu ni a sawi a ni.