Kan ti nek nek a, a hun kan thleng tep ta mai. Football thlipuiin a nuai Mizo thalai Football ngaina tute tan chuan lengzawngte hlimna ber KHUANGCHAWI THLA- MPL lo thleng tur baka hun duhawm leh nghahhlelh awm hi a awm chuang dawn nem maw!! Naupangte ka nih lai atanga berh phing pheng, tui hawk leh chhirdiak pawh poisa lova kan tual chai thinna Lammual phul lem phah hmun ngeia Mizo tlangval ball pet thiam ho in lar hun tur chu ka van ngakhlel tawk tak em!!

He hun lo thleng turah hian FANS te kan pawimawh hle dawn a, Local football hi kan ngaihhluta, kan chawisan thar a tul leh zual dawn a ni. Mi tam tak chuan tuipuiral hmun ball pet thiam mingo leh mi hang ho, club level sang pui pui nen he Zoram a inkhel thinte hi kan tehkhin fova, hei hi kan bansan a ngai tak zet!. Mizoram leilung fate nena khaikhin chuan tuipuiral Football chu sang tak a ni tih hai rual lohin a hriat a ni. Chutih lai erawh chuan hnam naupangte kan la ni a, Mizo Film pakhat “ KHAWNGLUNG RUN ” nasa taka buaipui tham chauh kan la ni tih hi kan hriat nawn fo a tul tak zet. I hnam mi leh sa te ngaisang lova, khawvel zau zawk zuan kan i tum anih chuan tu pawi mah chu i sawi lo a nga, chutih lai erawh chuan i hnam mi leh sa thiam thil leh theih chhun i ngaihlu lo a nih erawh chuan in enfiah i ngai thung ang.

Football hi Mizo te min ti thang mawitu, India ram chhunga Media hmanga kan hnam min ti lartu a ni a, kan pumrua leh pianhmang te hian Vai ngal sang tak takte pha lo mahse, he hnam tlemte hi Football vang hian India ram chhungah hian a hmingthangin ,a thangmawi phah a ni.Kan Mizo nula leh tlangvalte’n hma an sawn zel a, inkhel dan mumal tak an nei chho va, thiamna pawh a sang tawh hle a ni.Mizoram mipuite hian kan kan thalaite’n he infiamna kawnga talent an tihpun na kawngah hian theihtawp kan chhuah pui a ngai tak zet a ni.

Kan Footballer, abiktakin tualchhung hmuna khelte tihhmasawnna kawngah hian Association pakhat kutah chauh kan dah a nih chuan thil pawi tak ani. Khawvel club ropuite din hmun kan hria a, kan ramchhung ngeia inkhelh pui awm I-league kan tihte ngeiah pawh khuan mipui, club tantute inpekna sat zia chu kan hmu awm e. Zoram khawvel-ah hian sum leh pai harsatna kan sawi fo thin a, amaherawhchu SUM hi chu a awm a , inpekna nei kan tlem thung si a. Kan mihausa leh neinung zawkte hi hei ai hian han zuang lut se, vawikhat dammana midangtan an malsawmna nih a, thalaite eizawnna siam sak hi kan Lalpa lawmzawng ani ngei ang, kan Pathian thu pawn nang malsawmna ni ang che a tih kha.

Mizo mipui mi mir hrim hrim hian Football khawvela cheng kan Mizo footballerte hi kan ngaihhluta, kan ngaihsan thiam a hun ta.MPL tan hunah ngei te hian an jersey ang, an hming chuanna te hi han ha ta thup thup i la, thil pawi a ni dawn em ni!!!.Kan society pawh hrelo, khawhar in riah leh thlan laih pawh ti ngai lemlo hming chuang neih fur ai chuan.Kan Mizo fate ngei hming chuang kan hak fer fur hunah chuan Zoram khawvelah Football hian rah ropui tak a chhuah ngei ang, chumi hun chu a la thleng ngei dawn bawk.

League hrang hrang mahni in lum atangin , nuamsa takin kan en thin a, zan khaw tairek thleng thlengin, taksa chauh pawh pawisa lovin lan piang ve tih pawh hrelo ho tan kan meng a, kan sum leh pai kan seng thin, tumah ka dem chuang love, MPL hun tak hi ani lawmni Football ngainatu Zofate tan kan lak hun tur chu.Banner, khuang leh ri thei chi tin reng te nen i thawk chhuak i la. Kan club tan te tan theihtawp in han chhuah teh ang u. Mi inkawta intihbuai, Zu ruih leh thawm bengchheng siam ai chuan Lammual lam pan i la, kan Mizo puite ngei tualchai chhim turin i han inbuatsaih teh ang u khai.

A tawpnan chuan Nang leh kei hi kan pawimawh dawn a, Mizoram football hi level sang taka i dah anih chuan i tisual ang, chutih lai erawh chuan hnam naupangtein heti taka Football kan khel thiam leh inkhel thiam kan ngahna hi in chhuang la, chu chuan in hnem la, Local Football hi chawisang tumin tan khawh ang che.