Football Kaida 1: Page 0 atangin !!!

(Football Kaida hi ZoFooty website tih tantirh a mi kha a ni a, kum a vei leh deuh tawh avangin a thu kalhmang thenkhat pawh a hlui deuh tawh tih a hriat theih ang a, chutihrualin tun hun nena khaikhin thiam chuan Mizoten football-ah hma kan sawi tawh zia a lang tel thei bawk.)

Kamkeuna:
Football Expert anga lan ka tum lova, football expert pawh ka ni hek lo. Mahse age group level te, veng aiawh te leh college level te ka lo khelh ve tawh atangin chak nawm zia te leh chak loh hrehawm zia te chu ka hrethiam ve viau chuan ka hria. Amaherawhchu football tactics leh techniques tak tak han ziak tur chuan a zir chhuak ka nih miau loh avangin lehkhabu aṭangte, website aṭangte leh coach training chhuak te aṭang lo chuan ziah tur ka hre bik lo tih min hriat sak dawn nia.

Football hi game ropui ber te zinga mi a ni a, Mizo zingah pawh a tla na khawp mai. En mai kan duh tawk lova, chhiar mai kan duh tawk hek lo. Mizo mipa kan awm khawm tawh chuan titi thupui berah kan hmang fo bawk a, football sawi ngun na na chuan a khelh dan pawh kan thiam tlang pui a, thiam deuh bik te chu awm bawk mah se kan ram India-ah hi chuan hnamdang nena khaikhin chuan a nawlpuiin kan thiam zawk ti ila kan sawi sual awm love. Chutihrualin hmasawnna tur kan la ngah tih erawh kan hriat a ṭha. Mizoten hma kan sawn zel nan Football Kaida pawh hi siam a ni.

Hobby Vs Professional
Professional footballer nih kan tum a nih loh chuan zirlai tichhe tur khawpin kan khel tur a ni lo. Amaherawhchu football hmanga ei hmuh kan tum a nih chuan theihtawp kan chhuah tur a ni. Mizote hian hei hi kan thliar thiam loh avangin kan career kan tihchhiat phah fo thin. Chuvangin football tak tak sawi hmain fimkhur a ṭul zia hi ka sawi hmasa duh a ni.

Footballer ka ni!!!
Mizo tan hian eng position nge tha ber ang tih Lajong F.C. Coach Pradyum Reddy kha ka zawt a, a chhanna chu ka ngaihtuah loh lam thil daih a ni. “Mizo te hi khawi position-ah pawh an khel thei ang. Chutihrualin kan hriat tur chu Positon bik kan nei tur a ni lo. Banglore school a coach anga ka thawh lai pawhin, ka naupang te chu, eng postition-ah nge i khelh ? an tih chuan ‘Footballer ka ni’ tiin chhâng rawh u ka ti thin. A chhan chu khelh thiamna bik i neih chuan i position ah nangmah aia ṭha an awm hlauh chuan i substitute a ngai dawn, i luh theih dan awmchhun chu i position a tlan inhliam chauhin a ni mai. Chuvang chuan position pahnih pathum ah tal chuan khelh theih ngei ngei tur, chu chuan i career pawh nasa takin a pui ang che,”  tiin min chhang.

A chhanna hi a dik viauin ka hria, substitute reng tan chuan footballer hlawhtling nih a theih tlat lo. Chutihrualin BER nih tum tan chuan risk lak a ngai. Position khelhna bik nei nge nge chu an lo thiam deuh bik a, chuvang chuan BER ni tur chuan khelhna bik neih hi a ṭhatna lai a awm. Amaherawhchu kan khelhna tur position kan thlan dawnin kan ngaihtuah chian erawh a ngai ngei ang le.

Eng boot nge kan bun ang!!!
A lan danah kan buai loh a tha khawp mai. Messi in Adidas F50 a bun vang ringawt a F50 lo bun ve nghawt kha a fuh ber lo, anni ang ho bun hi chu uluk lehzuala siam a nih avangin a man pawh a mawi tawh tih hriat tha. Chumi piah lamah kan khelna tur hmun a zirin boot bun tur bik a awm leh zel bawk. A tlangpuiin Mizoram hi chu lei a nih avangin hard ground bik atana siam bun a ṭha khawp mai. Chutah pawh thil hriat tur a la tam, anni hard ground chu keini inkhelhna hmun lei ai chuan a chang lo zawk a. Chuvang chuan an boot tam tak hi chu lei ah hian a la ṭha tawk lo hle. Boot kan leiin Rubber stud ngei kan thlang ṭhin dawn nia. Chubakah Star Impact, Nivea etc te hi lei bik atan chuan a chhe bik lo mai ni lovin tam tak ai chuan a ṭha zawk daih. Tax an pek tlem zawk vanga tlawm zawk an ni tih i theihngilh lovang u.

Boot thar kan bun hmain kan ke ah, vaseline (petroleum jelly) kan hnawih thin dawn nia. I ke leh boot inkarah innawhna (friction) a ti tlem a, i ke pilh tur a veng dawn a ni.

Lammual Grass-ah eng stud ang chi nge bun tur?
SYS Coach Pu Thlanga (Mizo Coach hlawhtling ber te zing ami) leh Coach Pradyum Reddy chuan Lammual Grass anga boot bun tur chungchangah ngaihdan inang an nei a. An ngaihdan chuan stud mum (rounded stud) bun a ṭhat thu an sawi a. Blade stud ho chu grass-ah a tang nghet thei a, turning velah a tang nghet palh chuan player khup a chhiat phah theih thu an sawi a. Pradyum Reddy chuan a boot bun lai Adidas Copa Mundial chu a bun tur chi tak a nih thu a sawi tel bawk. Chutihrualin Lammual chu grass a lo nih tawh avangin ground dang aiin a dup bik a, hei vang hian khelh thut chuan chawn tha chat a awlsam tur thu an sawi tel bawk.

Footballer chu inthunun thei mi a ni tur a ni!!!
Sap ho pawn zu an in tih kan sawi ve ziah mah se Sir Alex Ferguson-a’ Manchester United a enkawltirh khan Norman Whiteside, Brian Robson te zuh heh lutuk kha a ngaihmawh hmasa a, a hmalakna hmasa ber pawh a ni reng a ni. Sir Alex hi coach dang aia a ṭhatna thuruk pakhat chu a team te a thunun thei zel hi a ni ti ila, kan sawi sual tam awm love. Chuvang chuan kan taksa laka ṭha lo turah chuan footballer chuan a inthunun thei tur a ni, hei hi Mizote harsat pakhat a ni, mah se footballer ṭha ni tur chuan kan inthunun theih a ngai si. Mahni intihfai lamah pawh Mizo te kan ṭan a ngai, ball boot bal lutuk, mawza uih lutuk hian mipui a hip lo tih hriat a ṭha. Kan neih ang chu eng pawh ni rawh se, a fai tur a ni. Heti lamah chu footballer te hian basketball player te hi kan entawn a ngai khawp mai, tuna kan awmdan hi chu a la zahawm lo deuhin ka hria. Chutihrualin field leh a chhehvel hi chu zahna chang i hria ang u, fans ten meizial an lo zu a nih pawhin players te hi chuan field leh a chhehvel ah hi chuan ti lo hram hram ang u, zahawmna hi thil ho te anni tih kan hriat a tha.

Mizo footballer te hian hun vawng dik hi kan harsat tlang. College a kan Coach Madhavan (India Player pawh lo ni tawh) kha upa tawh viau mahse a tlai ngai lo, a thusawi ka la hriat reng chu “Minute khat a in tlai ai chuan darkar khat in thleng hma mai rawh” tih kha a ni. Chubakah tun dinhmun a khawvel club tha ber F.C. Barcelona player te hi star viau mahse practice-naah an star bik lo. Guardiola in F.C. Barcelona a enkawltirh khan practice-naah player pakhat (an hming an thup) chu a tlai a, field-ah chuan lut hman tho mah se a boot hrui a suih hman loh avangin pawisa chawitir a ni. Tun a F.C. Barcelona chungnung chhan hi player ṭhat hrim hrim piah lamah an inthununna ṭhat vang a tih loh theih loh. Chuvangin footballer tan chuan inthunnunna hi hlamchhiah chi a ni lo tih kan hre nawn leh dawn nia.

Page 0 a nih angin a chhung tak tak kan la lut lova, Football Kaida chhuak leh turah chuan Tactics leh Techniques chhiar a beisei ngam tawh ang. Chutihrualin a ziaktu tan chuan chhiartute ngaihdan dik tak (feedback – a tha zawng leh a chhe zawng) kha a ziaktu tan a tangkai tih kan hre nawn leh dawn nia.

Download duh chuan HETAH hian kan click dawn nia.

Posted in Articles, Tualchhung.

24 Comments

  1. @Lalengzuala
    Ti lawmawm e.
    Fak chu a nuam, mahse a quality a hniam phah ang tih a hlauawm, awmze nei a sawiselna hmuh a chakawm khawp mai.

  2. @Zara thuziak chu a tha hle mai… Hetiang lam hi a lawm ka lo beisei ruk thin reng ni.

    ProBlogger.com neitu pawh hian midangte thil zirtir hian blog a ti daihrei thin a tia, hei hi hriat reng atan a tha khawp mai.

    Bery bery good posttttt 🙂

  3. Lagong coach sawi khi ka pawm zawk tak ni…….keipoh eng position ge i khel thin an tih hian ALL ROUNDER ka tih hmiah zel…….bench-ah thu ngailo hrim2…..se a hahthlak deuh……striker tih loh hi chu ka khel kual vek………keeeper thlegin……..hahhaah

  4. @Kim kim
    La dah tha reng e mawle. 🙂
    @Ahruaia
    Subroto ah tak chuan ka la khel ve lo, vawi khat ka trial a, ka tling lo 🙂

  5. post ho hi tha hlawm hle mahse he post hi chu a that dan adang dai bik khawp mai…players te hriat tur tam tak a wm…

  6. i picture hman chu i chhuang hle mai…deccan chronicles a mi kha i la dahthra reng a ni maw!!!!a lawmawm e!!!!nalh khop ma

  7. A post tu Zara(AKA Etea) hi ka mi ngaihsan ania…College kan kal lai khan kan inbe thin a..Amah hi M.Sc (Maths) a ni tih lo hre bawk ila…B.Sc a zir lai khan Club hrang hrang atangin offer a dawng nual a. Mahse lehkha zirlai a ni miau a. A zawm duh ta lo a. Mahse tun hnuah hian Football a rawn buaipui chho leh a (Sir a nih hnuah..) midang tan inzirna tha tak ani…An college tan erawh vawi tam an Champion-naah nasa takin tha a thawh a..Professional nih tum tan lo chuan pawngtawng buaipui hi a fuh lo…Tih tak tak tum te tan erawh inpek hle kha a tha lawi si…

  8. thianpa zara nge2, i post tha khawp mai ! beiseina sang tak nen page 1 kan lo nghak reng a nia…

  9. A ngaihnawmin a bengvarthlak hle mai. Insumtheihna hi nia a pawimawh, eizawnna kawng dang zawng zawng aiin infiammite tan a pawimawh ber hial awm e. Mizo footballer te zingah chuan S. Malsawmtluanga hi a entawntlak hle awm e.

  10. Subroto kal tawh leh VC Champion team a tel tawh ziah a ni bawk a , a chhiar tlak viau e!! Footballer ka ni tihtak ah chuan Terry leh Ferdinand te indaihlohna avang a an keeper mai te kha an fakawm khop mai..natural position hi chu a awm ngei a. Defense leh Attack hi then hran hlawk theih chu a ni deuh tho mai.!! (Y)

Leave a Reply

Or