Football Kaida 2: Khelmual chhunga inrem dan

Football team ah player te nge coach/manager hi pawimawh zawk tiin inzawt ta ila, ngaihdan a inanglo in a thutawpna sawi a har hle awm e. Coach/manager te hi khelmual ah inkhelh laiin an luh ve loh avangin player te khelmual chhunga an remdan hian team anga khelhdan a hril thui hle. Formation hman a zir hian inkhel a hmuhnawm in a hmuhnawmlo thei a, lehlam in an nawr in an bet thei hle bawk. Tunah khelmual chhunga team te inrem dan chi hrang hrang lo zir teh ang.

4-4-2 (Four Four Two) Formation
He formation hi tunlaia hman nasat ber leh player te tana khelh awlsam ber a ni thei awm e. Central midfielder te an rim in an mawhphurhna a sang bik hle a. He formation ah hian winger te an pawimawh hle a striker te puih kawngah. 1990 leh 2000 vel bawr khan Manchester United leh Arsenal te’n an hmang thiam hle a ni. Roy Keane leh Paul Scholes inkawp, Patrick Viera leh Gilberto Silva inkawp te khan he formation hi tackling tha leh goal thun thei tak khan an timawi em em thin anih kha. A sirah David Beckham leh Gary Neville inkawp te khan awmzia a nei hle thin bawk. He formation a sawiselna tam ber chu central defenders, midfielders leh strikers te inkar awl zau lutuk hi a ni thung.

4-5-1 (Four Five One) Formation
Tunhnaia formation hman nasat a ni a. He formation hi defensive hle in lang mahse counter attack kan tih ang chi ah a hlauhawm thei hle. Midfielder pathum leh striker mal tlat ‘target man’ tia sawi thin te hi an pawimawh hle awm e. Lehlam pawl nawr kawngah winger te hi an chet ran leh tlan chak in nasa takin kawngro a su. He formation hi Jose Mourinho in FC Porto leh Chelsea a enkawl laiin a hmang lar hle. Holding midfielder kan tih Claude Makelele te ang kha he formation ah a pawimawh hle mai. Hetih rual hian midfield zingami pakhat chuan goal a thun thei hle thin. Entirnan Frank Lampard khan goal a thun thei hle a ni. Attacking football ngaina tan erawh a hmuhnawm ber lovang.

4-3-3 (Four Three Three) Formation
He formation hi 4-5-1 kan tih nen inang viau mahse a inanlohna chu winger pahnih te hi forward angin an tlan theihna hi a ni. 4-5-1 ah erawh winger te khan midfielder te a puih nasat a ngai thung. He formation hi attacking football a hman a ni a. Inkhel a ti rangin a ti hmuhnawm hle thin. Frank Riijkard in FC Barcelona a enkawl lai khan hman tan a lo ni a. Ronaldinho, Eto’o leh Messi te a ruala tlan tir a duh vang te pawh anih a rinawm. He formation a midfield pathum te hi defensive lam, attacking lam leh a laihawla khel kawp thiam hman a ni thin. Tuna FC Barcelona hian hmang chhunzawm in attacking lamah tuna manager Pep Guardiola hian tlemin a siksawi thung.

4-3-1-2 (Four Three One Two) The ‘Diamond Formation’
He formation a lunghlu ‘diamond’ hming hman anih na chhan chu midfielders te inrem dan sawina a ni. Defensive midfielder, central midfielder pahnih leh attacking midfielder te hian ‘diamond’ zia in an inrem thin a ni. A sir lam ‘flank’ kan tih thin te hmunawl hnawhkhat turin full back (right back leh left back) te hi an rawn tlan tam deuh a, right wing back emaw left wing back angin an khel thin. 1966 a World Cup champion England te khan hmang hmasa in, Carlo Ancelloti in AC Milan ah a hmang leh a. Hetah hian a ni Kaka pawh khawvela tha ber anihna kha. Inkhel hmuhnawm tak he formation hian a entir thei a ni.

5-3-2 (Five Three Two) Formation
He formation hi en mai pawhin a defensive tih a hriat theih awm e. Defender pathum te leh midfielder pathum te hi nawr lemlo mahse full back pahnih te hi an tlan thui thei khawp mai. He formation hmuh hi chuan rilrua lo lang hmasaber chu 1990 a World Cup champion West Germany te kha a ni awm e. Defensive taka a lan laiin 1990 khan West Germany hian tournament khatah khan goal 15 lai an thun thei. He formation hi football tactic a hman ruk emaw a bik tea hman thin ang hi a ni a. Tunlai ah a hmang kan hre khat ta khawp mai.

Posted in Tualchhung.

16 Comments

  1. @eppie: I formation chu Christmas Tree formation an tih ngei ṭhin kha…a lu lam a zuih tial tial a, striker ṭha tâwk neih a ngai an ti…Chelsea-ah khan tu awmlai nge mawni khan an hmang tawh he formation hi.

  2. @jongte madawnga: 4-3-1-2 chu Italian national team leh club ah hian an hmang nasa deuh. He formation ah hian 1 lai tak hi a pawimawh a, AC Milan-a Kaka, Juventus-a Zidane te kha he position-a khel thiam chungchuang an ni. Italy ah pawh Totti a khel ṭhin a, an ṭhatpui lem lo thung. EPL ah chuan hmang an awm mang lo, hemi formation hman hi chuan game a ‘narrow’ duh.

  3. Diamond formation-a Ancelotti i rawn sawi hi a inhmeh kher mai. A kalna apiangah a hmang zel chu a ni ber e. Chelsea ah pawh khan Deco awmlaiin a hman ve zauh zauh thin kha.

Leave a Reply

Or