Football Kaida- 4 : Push Pass

Mizorama Artificial Turf  hmasa ber, Lammuala phah chu kum 6 em pawh la tling lo mahse hman tlak a ni tawh lo. Mahse Football ngainatute tân chuan lungngaihna tur em em a awm chuang lo. Sports Minister (?) chak tak hmalakna in a hma aia ṭha phah a ni a, Lammual Grass thar phah lawmna Concert pawh ropui taka neih a ni. Football ngainatuten grass chhiat vel chungchang ah hlauhthawn tur a awm lo, grass chungah chuan grass chhiatloh nan platform siam a ni tlat. He Grass thar lawmna Concert ah pawh hian band ṭha tak tak an zai a, chung zingah chuan Lalthanzama, The Rubber Band Guitarist chu mi mit la ber pawl a ni. November Rain an sak ṭum phei chuan Slash nen an danglamna a awm lo hrim hrim. Mizo zingah chuan a hming a dai tawh dawn ang tih tur khawpin a cheṭha tlat. Mahse Sunday a rawn thleng a, beisei a pha lo tlat mai. Inkhawm ban fellowship pawh zai a nuam thei lo, a chhan chu Guitarist a nawi leh tlat ṭhin. Mahse he Guitarist nawi tak hi Lalthanzama tho kha a ni lawi si. Hetiang ang buaina nei hi Mizo Guitarist ah hian an awm ngei ang, chutiang chiah chuan footballer zingah pawh basic technique hriatloh avanga harsatna nei hi kan tam tih a chiang a mahse kan zir peih tlat lo. Basic technique tello pawn engemaw chen chu thlen theih bawk mahse a rei hnuah hmasawn a har ṭhin tih i theingilh lovang u.

Ball pet dan hrang hrang te:
Kan ke in ball a pet fuhna a zirin pet dan hrang hrang a awm thei a. Chungte chu
a) Push Pass
b) Instep Kick
c) Inside of Instep Kick.
d) Outside of Instep Kick.
e) Lofted Kick.
f) Chip Pass

Lofted Kick leh Inside of Instep Kick hi lehkhabu tam tak ah chuan inang in an ziak a, mahse a pet dan ah hian danglam deuh bik a awm tlat a ka hriat avangin point hrang ah ka rawn dah a ni. Amaherawhchu tun post ah bik chuan Push pass hi kan thlur bing ang.

Push Pass:
Push pass hi ball pass nan bera hman a ni a. A accurate mai piah lamah weight dik taka pet a awl avangin kan pass te tan pawh lak a nuam em em bawk. Push pass ah hi chuan kan ke chhûng lampangin ball kha a zuk khawih fuh a ni.

a) Non-Kicking Foot
Kan pet lohna lam kha Non-Kicking Foot chu a ni. Kan ball petna lam nen a ṭangkai dan a inang reng. Ka ke dah dan a dikloh chuan ball pet a dik thei tawh lo. Non Kicking Foot hian hi balance min pe tu anih mai bakah ball direction pe tu a ni bawk. Ka pass duh kha ka kengzungpui kan kawh tir vang tur a ni.

b) Kicking Foot
Kicking Foot chu kan pet na lam kha a ni a. Push pass a ball kan pet chuan kan kicking foot leh kan non-kicking foot kha a perpendicular (degree 90) tur a ni a. Kan ke chhûngin ball lai ah tak a fuh tur a ni. Ball kan pet fuh chiah khan kan ke kha kan ti tawp mai tur a ni lova, kan vai tlang tur a ni bawk. Chu chu Follow through an tih chu a ni. Follow through hi tihdan phung a ni satliah lova, accuracy petu leh weight dik petu anih tih kan hriat tel a ṭha awm e. Ball kan pet reng reng in, ka ke hi kan ti khawng ngei ngei bawk dawn nia.


c) Ban (hand)
Ke ding lama pet kan nih chuan kan ban veilam chu kan phar chhuak tur a ni. Hei hian balance min pe tel dawn a ni. Tackle theih reng kan nih avangin kan ban hi kan dah khawng tur a ni. Kan ban kan dah khawng chuan inhliamna lak atangin min veng dawn a ni.

d) Mit (eye)
Ball kan chan hma in kan pass tur kan melh lawk tur a ni a. Kan pass dawn ah chuan ball chauh kan en tur a ni. Ball lir lai pet tur kan nih phei chuan kan fimkhur lehzual a ngai. Ball kan pet fuh hnu chuan kan mit (eye) chuan ball chu a en zui tur a ni. Chumi awmzia chu kan mit pawhin follow through a hmang ve tihna a nih chu.

e) Awm (chest)
Kan awm (chest) chuan kan pass na lampang a hawi tur a ni. Hei hian kan ball pet direction nasa takin a pui a, chu chuan accurate leh weight dik takin min pet tir thei dawn a ni.

Tuna kan sawi ang zawng zawng hi lehlam pawl (Opponent) ten pressure an rawn pek nasat chuan hman kim vek a harsa maithei. Chutiang hunah chuan kan pet dan tlem a zawng chu a thlak theih ang, mahse tuna kan sawi ang hi a tam thei ang ber zawm ila, hun harsa ah pawh ngai ah kan neih theih ngei a rinawm. Sawifiah kim a harsa a, harsatna nei kan awm anih chuan Comment lamah kan zawt tawh mai dawn nia.

Note: Technique hi chu lehkhabu atangin chhiar ve bawk mahila,  Mizoram U-16 a kan Coach Sir Thlanga (College Veng)  min hrilh atangin engemaw chen chu ka hria a, chutah Inter Village min Champion puitu Sir Duhawma (Chaltlang) hnen atangin follow through pawimawh zia ka hriat bel leh bawk. Loyola College Coach Asha leh Madhavan te leh Indian Bank Coach Rock leh Shabir Pasha te hnen atangin hriat belh leh bawk mah ila, ka la ziak ngam chiah bik lo.

Chutah han ziah dawn tak tak chuan Sir Thlanga hnen ah kal lehin chiang zawkin ka zawt leh a, ka var uar chuan ka hria. Tihsual ka neih loh ngei ka beisei. Hun remchang hmasa berah video nen chiang zawkin kan rawn la tarlang dawn nia.