Football Transfer lalpa Fabrizio Romano

Khawthlang lamah chuan tunlai hian Football Transfer runpui a thleng mek a, Mizo football tuimi ten European football hi kan thlir nasat a nih avangin kan ngaihvenin kan club tan zawng te hmalak dan hriat chakin thuthar kan nghakhlel thin hle . Sports news site hrang hrang te, transfer news nei hmasa nih tumin an che rang thin hle a, a bengvarthlak thinin, awihawm loh tak tak te pawh a awm ve fo bawk.

ZoFooty puipa te ngei pawh hi football transfer hunlai a kan han luangliam tak tak hi chuan ZoFooties te in bengvar lo bik ang tih hlauin hun kan hmang fo a. A chang chuan bus/taxi chuan lai te, kawnga kal chhung te, nula rim lai te leh inthiar lai ten rem leh rem lovin transfer thuthar post kan rawn siam rup zel.

Tunhnai ah transfer thuthar kan chhiar chuan Fabrizio Romano hming hi kan hmu fo in a rinawm, ani hi Football transfer thuthang thehdarh kawngah a che rang thinin mi te rin leh ngaihven pawh a hlawh hle. Twitter lamah inlar berin a thu leh hla te hi a thleng dik thin khawp mai. Tun tumah hian Fabrizio Romano hi tunge a lo nih tehreng kan han bel chiang dawn a ni.

Here We Go !

Fabrizio Romano hi Italian journalist niin Sky Sport tan a thawk a nih bakah Sports news site dangah pawh a inhnamhnawih nual a. Football transfers chungchang hi a special na ber a ni.

Milan khawpui a piang leh seilian a ni a, he hmun atang hian tun thlengin a hna hi a thawk thin a ni. Kum 18 chauh a upa a nih lain transfer news hi a rawn nei tan a, website tenau deu tana kum chanve vel news a ziah hnuah Barcelona atangin agent pakhatin a rawn be hlawl mai. He thil a tawn atang hian transfer game ah lut thuk lehzualin hnunglam hawi zai a rel leh tawh lo.

Romano hian he thil thleng chungchang hi sawiin,“Journalist naupang tak mai I ni tih ka hria a, player pahnih Gerard Deulofeu leh Mauro Icardi te chungchang article ziakin min pui thei ang em?” tiin Agent hnen atanga zawhna a dawn thu a sawi a.

“Ani nen hian kan inbe chhunzawm ta zel a, Icardi –a’n Italy ah Sampdoria rawn zawmin a hnuah Inter in an lalut. Icardi chungchang hi transfer news lian ka neih hmasaber a ni bawk nen hetiang dinhmun ka thlen theihnan a pawimawh takzet.”

“Transfer window ni lo ah pawh thuthar ka nei ve ta zel a, November thla ah Icardi chungchang ah bawk Agent hian min rawn be pawp leh a. Inter nen an inrem tawh a, Sampdoria leh Inter pawh an inrem hnai e. Amaherawhchu January ah ni lo in nipui transfer hun ah zawk lut turin an indawr fel hnai e tiin I sawi thei ang.” tiin thuthar a dawn dan a sawi.

“Hetiang hian a ni bul kan tan chhoh tak ni, journalist a ka role hi ka ngaina in nuam ka ti hle a. Transfer market hi ramhnuai ang mai a ni tiin ka sawi thin a, nitin mai hian rin loh deu deu hian thil a thleng thin,” a ti.

Kum 10 vel a ral leh meuh chuan transfer news ah chuan Football fans te tan Romano hi a tangkaiin mi te ngaihven a hlawh tawh hle. Transfer window inhawn lai hi chuan nikhatah darker 5 vel chauh a mu thin a, zing dar 5 atanga dar 10 thleng mu hahdamin a bak zawngah hi chuan a thianpa a tih mai a phone hman thiam nen hna an thawk nghal char char zel.

Khawvel a Football transfer thuthar thehdarh tute zingah chuan mi te rinhlawh ber zinga mi a ni a, a bikin Twitter lamah. A breaking news tarlan te hi a thleng dik thin hle bawk. A trademark quote ‘Here we go’ tih hi a larpuiin mi tam takin an ngainat phahna a ni a, a thu leh hla hi Football tui miten an ngaichang thup zel.

Romano hi pa rilru ngil leh thianghlim tak mai a ni a. Transfer thuthar nei hmasaber nih aiin thuthar nei dik thei ber nih chu a thupui a ni thin.

Hemi chungchang hi Romano hian sawiin,“A hmasaber nih reng hi thil theih a ni lo. Premier League, La Liga, Serie A leh Bundesliga te kan cover a. Ka target chu a dik thei ang ber a ni tawp mai. Mipui ten ‘Fabrizio hnen atangin kan hmu a, a thleng dik tak tak ang.’ an tih theihnan.” a ti a ni.

Kum 27 chauh a upa, Fabrizio Romano hian Football Transfer chungchang ah hian Agents, Sporting director leh players te a biak kual thin thu a sawi a. Kum 5 vel liamta aiin transfer market ah Agents te an pawimawh zual thu a sawi bawk. A thulakna hrang hrang te hi han sawi fak a harsat thu sawiin, transfer market apianga thil thlen dan a danglam thin thu a sawi.

Milan tlangval hi a hna ah hian a tui bawk a, “Ka ngaihdanah chuan Champions League match khelh ang mai a ni, transfer thuthar tha tak han neih hi chuan Champions League final a goal khung ang maiin ka awm a nuam veng veng zel.”tiin a sawi a. Covid-19 hrileng chuan transfer market ah nghawng a neih len thu sawi belhin, “He Virus hian engkim mai hi a tidanglam a, pawisa ai mahin kan hun hman dan a ti danglam zawk. Pawisa chet vel chhung a timuangin nghah ngaiin min siam reng thin a, club tinin pawisa thahnem tak an hloh phah a, players hralh tur zawn a ngaih phah bawk. Tunhma ang lo takin players sign turin balance a ngai.” tiin a sawi.

Tun season nipui transfer window hi July ni 27 khan hawn tan niin October ni 5 ah khar a ni ang. He Italian journalist hi Wikipedia pages ah hmuh tur a awm lo a, a hmingthanna ber Twitter lamah hian he thu buatsaih lai hian 1.9M followers a nei mek a, Instagram lamah hian 1.5M followers a nei ve thung.