#FootballKaida

ZoFooty #FootballKaida

ENGLAND AN ṬHA, MAHSE..
Gareth Southgate-a hnuaiah England-in Euro 2020 final an thleng a, an mual chhuanvawr Wembley Stadium-ah Italy lakah an vanduai. Penalty shootout-ah khan vannei zawk chu ni ngat se Three Lions hi European champion tihin kan sawi thei tawh ang. Mahse, an vanduai miau a, kum 1966 hnuah England-in nomawi lian tham an la chawi leh lo.

EURO KHA
Euro 2020-ah khan England hi Croatia (1-0), Scotland (0-0) leh Czech Republic (1-0) te nen group khatah awmin point sarih an hmu a, group hmahruaitu an ni.

Three Lions ṭantuten lungawi lohna an zawng a nih chuan Scotland nena an khelh danah sawisel tur an hmu ang. Czech an hneh danah pawh lungawi lohna tur chu a awm a, mah se inkhelh hmaa knockout stage an luh miau tawh avangin dem theih an ni lo.

Last 16-a Germany an hneh dan erawh a lungawi thlak a, Wembley Stadium-ah an hmelma 2-0 in an hneh satliah lo a, chak an phu tel bawk. England ṭantu zingah tun hma chanchin hre pha chin ‘a ruh kawl’ zingah lawm avanga mittui tla an awm, an lawmpuiawm hle.

Quarterfinal-ah England ṭhatzia hmuhin a awm a, Ukraine 4-0 in an sawp. Semifinal-ah Denmark an hmachhawn a, chak turin extra time khelh a ngai mah se final an thleng. Three Lions tana chanchin lawmawm erawh goal an chhuah hmasa chungin an lehthal a, chanchin lawmawm a ni.

MAHSE, final-ah England-in Italy laka goal an khung hmasa chungin minute 120 chhungin 1-1 in an inhnehtawk. Euro 1996-a penalty hlahtu Southgate leh a hote chu final-ah penalty hmangin an chak lo a, an hma lawka NOMAWI inchhawp chu a hnaiin a va hla si em!

ENGLAND AN ṬHA
Euro an khelh dan chu dah ṭhain World Cup khel tur zawnnaah pawh England an ṭha tih chu a chiang. Match li an khelhah goal 14 an khung a, goal khat chiah an chhuah.

Southgate hian match liah hian player 29 a hmang a, squad chhahzia a lang. Three Lions hian match sarih aṭangin point 19 an hmu tawh a, Qatar khel turin an tlin ngei a rinawm bawk.

England an ṭha em? tih zawhna a awm a nih chuan a chhanna awlsam ber chu AN ṬHA tih a ni ngei ang le.

MAHSE…
England hi an ṭha mah se champion tur khawpin an ṭha tawk em tih erawh hriatthiam a har. An ṭhat tawk lohna lai zawn tur a nih chuan hmuh tur chu a awm ngei e.

  1. COACH : England elpui tur ram ṭha dang coach thlir ila, ram team enkawl chungin nomawi an la chawi lo a nih pawhin club level-a inelna sang ber champion tawh an awm fur. Southgate erawh a inkhelh hun lai pawhin League Cup leh First Division-ah bak a champion lo.

Chutihrualin player ṭha ni lo, coach ṭha an awm nual. Southgate erawh kum 2006 aṭanga team enkawl chung siin Toulon Tournament-a England Under 21 a champion pui bak nomawi a la chawi lo.

Player thlan dan leh khelh dan hmangah thutlukna mak tak tak a siam fo. Euro ṭan hmain inelna ṭan dawn ṭepah pawh inelnaa tel miah lo tur player-te friendly match-ah a khelh tir.

Qualifier-ah ngei pawh Poland nen 1-1 a inhnehtawk ṭumin substitution a siam lo a, qualifier match li khelh tawha player 29 tehmeuh hmang tawh hian hun harsa a hmachhawn ṭumah thutlukna a siam ngam lo ni te pawhin a lang lek lek.

Chik zawka tun hnai an inkhelhna kan thlir chuan FIFA ranking 156-na Andorra an hmachhawn ṭumin player a thlak chiam a, team ṭha zawka ngaih Hungary leh Poland lakah erawh a player thlan ṭhin bawk a thlang. Squad chhah ang taka lang si hian pressure sang tak takah a squad chhahna a hmang ṭangkai chuang lo.

  1. GOALKEEPER : Jordan Pickford hi champion pui theih tur a ni lo, han tihtawp chu a ngamawm loh. Mahse, keeper ṭha ber chu a ni lo tih chu kan pawm tlan a rinawm.

Kum 27 mi Pickford hi Everton-ah pawh an rintawk lo nge, loan hmangin Roma aṭangin Swedish keeper Robin Olsen an lalut. Kuminah pawh keeper tawnhriat nei ṭha Asmir Begović an lalut leh bawk.

England bikah Pickford hian thachhang dawltu pawh a nei ṭha lo a, second keeper-a chhal theih Sam Johnstone hi Championship keeper a ni a, third keeper Aaron Ramsdale pawh Arsenal tan hmun chang chho mah se keeper dang pahnih ang thoin Champions League football khel pha lo a ni.

  1. CLUB ṬHAA RINRAWL : Hungary leh Poland an hneh ṭumin first eleven a inang chiah. Heta bul ṭantute hi England tana player pawimawh chinah lo ngai ta ila, chung player te chu.

Jordan Pickford; Luke Shaw, Harry Maguire, John Stones, Kyle Walker; Declan Rice, Kalvin Phillips; Jack Grealish, Mason Mount, Raheem Sterling; Harry Kane

Club ṭha han tih chuan Europe-a club inelnaa khel pha chin tihin han dah ta ila, player 11 aṭangin player pakua an la bang. Mahse Champions League khel pha chin tih chuan Luke Shaw, Harry Maguire, John Stones, Kyle Walker; Jack Grealish, Mason Mount leh Raheem Sterling te chiah an bang tawh.

Shaw leh Maguire te hi Man United-ah rinrawl chu an ni tehmeuh mai, mah se tun dinhmunah Ole Gunnar Solsjaer-a hote hi UCL-a inlan club dang pathumte an khelh danah an pha lo deuh.

Stones hi Man City-ah rinrawl ni bawk mah se kuminah Aymeric Laporte a tluk ta lo zawk. Kyle Walker erawh rinrawl tiha sawi theih tur a ni a, chutihrualin Grealish hi a man a to avanga duhsak rih a ang viau. Sterling pawh bul ṭan ngei ngei tur a ni ta bik lo.

Chelsea lamah Mount a pawimawh a, mah se English midfielder tel lo pawhin Thomas Tuchel-a hote hi an buai phah hran lo. A tawi zawng chuan league dang dah ṭhain Premier League-ah ringawt pawh English player aia thlan chakawm zawk player – Ederson, Alisson, Virgil van Dijk, Ruben Dias, Kevin de Bruyne, Mohamed Salah, Bruno Fernandes, Paul Pogba, Cristiano Ronaldo etc te an awm.

Premier League-a inelna nung tak hi England ai mahin ram dangin an hlawkpui zawk emaw tih mai tur a ni. England ṭantute tan chuan Man City-in Harry Kane an la lote kha a uiawm a, tun nipuiah khan la ngat se chuan World Cup-ah danglamna thlentu a ni thei ang.

Hriat tel tur erawh tun ṭumah chuan an ṭhat lohna lai kan zawng ngat ngat a mai a, an champion theihna tur zawng ta thung ila, hmuh tur ṭhahnem tak a awm tho ang.

England hi nizan dar 12:15 hian Hungary nen an inkhel a, comment lamah ngaihdan han sawi chhunzawm ila.