#FootballKaida

Estimated read time 4 min read

ZoFooty

#FootballKaida

GERMANY BAWK AW…
October thlaah Germany chanchin kan rawn ziak leh ang kan tia, Romania nena an inkhel kan ziak lo. Hei, zanin dar 12:15 hian North Macedonia an hmachhawn dawn a, Germany chungchang zau zawka chhiar tur kan rawn chhawp e.

HAGI KAN HMU
Germany chungchang ziah hmain Romania tana Hansi Flick-a enkawl laka goal khungtu Ianis Hagi chungchang kan ziah hmasak a ṭul tlat.

Volksparkstadion-ah minute kuana lekah Romania jersey number 14 chuan Germany leh Chelsea chhuanvawr Antonio Rüdiger kap karah ball a thawlh luh hnuin Barcelona keeper Marc-André ter Stegen dan hman loin a pet goal. Goal mawi tak ni.

A jersey hnungah chuan HAGI tih a chuang a, lung a leng nghal ruih mai. Mitthlaa rawn lang nghal chu Romania jersey 10 ha ṭhin Gheorghe Hagi a ni a, 90’s chhoa football en ṭhin zingah hre lo an awm pawhin an tlem ngawt ang.

Real Madrid leh Barcelona tana khel thei khawpa thiam Hagi hian khelmualah magic a show fo a, freekick pet thiam tak niin ke vei lam hmang thiam tih a che kha a mawi em em. Mizo pa nena khaikhin tur chu ni se ‘Khuala’ nena sawi kawp a rem ang, player pahnih khel en ve ve tawh chuan kan sawi tum chu an man thiam ngei ang le. Mahse khawvel huapa player ṭha leh Mizo player ṭha erawh khaikhin rual a ni lo tih kan hriat tlan kha.

Kan kual thui ta lutuk dawn. Gheorghe Hagi hi Galatasary tana a khelh laiin Ianis Hagi hi Turkey khawpui Instanbul-ah October 22, 1998 khan a piang. A tawi zawngin Hagi hi Hagi fapa a ni. A pa tlukpha tur chuan kawng thui tak a zawh a la ngai a, chutihrualin a thiam erawh a thiam ve khawp mai. Steven Gerrard hnuaiah Ianis Hagi hi a khel mek.

GERMANY CHU
September thla khan Hansi Flick-a hnuaiah Germany an khel ṭan a, Liechtenstein 2-0 in an hneh a, Armenia 6-0 in an sawp a, Iceland 4-0 in an hneh leh bawk. Match thum lekah goal 12 khungin goal an chhuah lo a, statistics-ah ball an hloh changa ball la let tura pressure na tak an pek ṭhin chu a la lang lo zawk mah mah.

Mahse, comment lama kan chhiar ṭhin angin Germany khingpui hi ram tenau a nih avangin inchhuanna tur a awm lo. Tichuan, October thla kan chuang kai a, Romania lakah goal an chhuah hmasa a, mahni muala an khel chungin 2-1 in an chak hram.

Chutihrualin scoreline phenah Germany ṭantute chuan lawmna tur an nei ngei ang. Flick-a naute hian hun tawp thlengin chak tumin an nawr a, Joachim Low hnuaia an khelh dan nen a dang tawh a, Qatar khel tur pawhin an tling hnai.

Low-a hnuaiah kha chuan Germany hi Qatar thleng pha ve hram hram tur niin an lang a, Flick-a hnuaiah erawh awlsam hmel takin an thleng dawn tih a chiang ta reng mai.

FLICK A CLICK
Hansi Flick hian thurawn a la nasa. Khawvel coach ṭha Chelsea manager Thomas Tuchel, Manchester City manager Pep Guardiola leh Paris St-Germain manager Mauricio Pochettino te hnen aṭangin pawhin thurawn a la a, a chhan chu German player an kawl vang a ni.

Hei chauh hi a ni lo, Bundesliga club Arminia Bielefeld manager Frank Kramer chuan Germany international a kawl lo chungin Flick-a hnenah thurawn a pek theih thu a sawi.

Leroy Sane hi entirna ṭha tak a ni thei ang. Manchester City winger hlui Leroy Sane hi mnual vei lamah chhawr a ni a, hemi chungchangah hian Flick leh Bavarian manager Julian Nagelsmann te thu a inhmu. Sane hian club leh ram tan position inangah a khel ve ve.

Flick hian hlawhtling takin Bayern Munich a enkawl tawh a, Bavarians player-te hi Germany innghah nan a hmang. Euro 2020 zawh khan Germany legend Toni Kroos-a’n ram tana inkhelh a chawhsan a, Real Madrid midfielder hi ui lo an tlem ngawt ang. Chutihrualin khelmual chhungah erawh Kroos-a awm loh lang miah loin Bayern duo Joshua Kimmich leh Leon Goretzka te an inkawp rem hle.

Position tina player thlan theih te sawi chhoh a chakawm a, mah se hei inkhelh ṭan a hun mai dawn. Low-a hote khan an mualah North Macedonia hi an hneh lo a, Flick-a hote hian khualmualah phuba an la thei ang em tih chu chhanna a awm thuai dawn e.

You May Also Like

More From Author