FPAI XI TUTE NGE ?

India rama professional footballer intelkhawm Football Players Association of India leh Mizoram XI te’n naktuk chawhnu dar 2:30 hian Rajiv Gandhi Stadium, Mualpuiah Exhibition Match an khel dawn a, inkhel en man hi Rs. 100 leh Rs. 200 a ni. He inkhel atanga sum hmuhte hi tunhnaia Mizorama chhiatna hrang hrang tuarte tanpui nan pek a ni ang.

Mizoram XI a khel turte hi kan hmelhriat sa an ni hlawm a, tualchhung league leh I-League a Mizo player tha e an ni. FPAI XI pawh hi India rama footballer lar tak tak an ni hlawm a, tute nge an nih in bih thuak thuak teh ang.

Goalkeepers :

Subrata Paul : India tana vawi 60 chuang inlan tawh Subrata Paul hi he ramin goalkeeper a neih that ber pawl a ni a, tawnhriat ngah tak a ni. TFA chhuak a ni a, India ram club lian tak tak East Bengal, Mohun Bagan leh ISL club tana inlan tawh a ni a. Season liam ta khan DSK Shivajians tan khelin ani hi chu kan hriat lar sa a ni.

Abhijit Mondal : Kum 39 a upa Mondal hian a vanglaiin Dempo, United SC leh East Bengal tan a khel tawh a, ISL club Chennaiyin FC tan a inlan tawh bawk. I-League leh Federation Cup champion team ah tum hnih ve ve a tel tawh.

Sandip Nandy : Sandip Nandy hian kum 2004-2013 chhung khan India tan a khel a, India ram club lian Mohun Bagan, East Bengal, Mahindra United leh Churchill Brothers bakah ISL club Kerala Blasters tan a khel tawh.

Defenders :

Gouramangi Singh : Feet 6 leh inchi khat a sang Manipuri defender hi AIFF Player of the Year (2010) leh I-League Best Defender (2008-09) atan thlan a ni tawh a, I-League nomawi vawi thum a chawi tawh bawk. Moirangthem Gouramangi Singh hi India rama defender tha ber zinga mi a ni a, kum 32 a upa a ni. Mohun Bagan leh East Bengal tih loh I-League club dangah chuan a khel kim thawkhat tawh a, India defender rinawm ni thinin ram tan vawi 69 a inlan tawh.

Deepek Mondal : India rama infiammite chawimawina sang Arjuna Award dawng ngat tawh Deepak Mondal hi India ramin defender a neih tawha tha ber pawl a tling a. Kolkata club lian pahniha captain ni thei ve ve a ni.

Narayan Das : Kum 23 a upa Indian football khawvela left-back tha ber pawl kan hmu thei tur hi kan vannei hle. TFA chhuak niin Pailan Arrows, Dempo leh East Bengal tan khelin India tan kum 20 lek a nihin senior team-ah a tel der tawh.

Pritam Kotal : I-League season liam taa mi tam takin right-back tha bera an ngaih chu Mohun Bagan defender Pritam Kotal hi a ni. Ani pawh hi Narayan Das ang bawkin Pailan Arrows tan khan a khel tawh a, India team – ah player pawimawh a ni chho mek.

Gurjinder Singh : Kum 30 a upa Punjabi defender hian Pune FC leh Chirag United tan a lo khel tawh a, Tata Football Academy chhuak a ni

Naoba Singh : Manipuri defender kum 29 a upa pawh hi TFA chhuak a ni a, Churchill Brothers, East Bengal leh Royal Wahingdoh tan inlan tawhin ISL ah Delhi Dynamos tan a khel tawh bawk.

Midfielders :

Rana Gharami : Kum 25 a upa Rana Gharami hi Mohammedan Sporting Club captain nilai a ni a, Kolkata club Kalighat MS tan a khel tawh bawk. A tul dan a zirin defender ang pawhin a chhawr theih a, kumin kumtir a Santosh Trophy a goal chhuah miah lo a champion West Bengal team captain a ni bawk.

Saran Singh : Saran Singh hian Mohun Bagan, Churchill Brothers, JCT, Salgaocar bakah ISL club Mumbai City FC tan a lo khel tawh a, tawnhriat a nei tha hle. Kum 30 a upa niin season tharah hian I-League club thar Neroca FC tan a khel ang.

Holicharan Narzary : Assamese footballer zinga thleng thui ber pawl Narzary hian season liam ta khan DSK Shivajians tan a khel a, India tan kum 2015 atang khan a khel bawk. Kum 23 a upa niin I-League ah Pailan Arrows leh Dempo tan a khelh thin bakah ISL ah FC Goa leh Northeast United tan a khel tawh bawk.

Seityasen Singh : Kum 25 a upa Manipuri winger hian Royal Wahingdoh tan hming a chher hnuah Salgaocar leh Northeast United tan a khel leh tawh a, season liam ta khan DSK Shivajians tan a khel. Ani pawh hi India senior team tan koh a lo ni tawh thin.

Jackichand Singh : Ani hi chu Lammuala kan hmuh tawh ngei kha a ni. 2014-15 I-League Best Player Jacki hian season liam ta khan East Bengal tan a khel a, beisei angin a khel tha lo. Chuti chung chuan a thiamna a theihnghilh a rinawm loh a, naktuk chawhnuah khelmual dinglamah a che tla hmuh tur a awm dawn e.

Alfred Jaryan : I-League Best Midfielder nilai Alfred hi Mizo mipuiten kan hmelhriat sa a ni a, I-League champion team captain a ni. Striker ni thin kha season liam ta khan midfield ah chhawr a ni a, a ball khuap a that avangin a ti mi ta phian. Ani pawh hi Mohammedan leh Mumbai FC tan a lo khel tawh a, naktuk inkhel a Mizo mipuite ngainat ber tur zinga mi a ni.

Forwards :

CK Vineeth : Indian footballer zingah hian I-League ah club pahnih tana hattrick siam thei hi mi pahnih chiah an la awm a, pakhat zawk chu Mizo tlangval niin a dang leh chu Chekiyot Kizhakkeveettill “CK” Vineeth hi a ni. Kum 29 a upa Kerala a piang leh seilian Vineeth hian season liam ta khan Bengaluru FC tan a khel a, forward goal thun thei tak a ni. Season liam ta ISL ah khan Kerala Blasters tan khelin Indian zinga ISL a goal thun tam ber a ni tawh bawk.

Michael Chopra : RG Stadium a mipuite mit fukna ber tur chu Indian thisen kai, English forward Michael Chopra hi a ni. Feet 5 leh inchi 9 a sang, kum 33 a upa hi Newcastle United pum chhuak niin St. James’ Park ah kum 1993-2006 thleng a awm a, club lar tak tak Watford, Nottingham Forest, Cardiff City, Sunderland, Ipswich Town leh Blackpool tan khel tawhin England tan age level hrang hrangah a inlan tawh bawk. Kerala Blasters striker hlui hi tum hnih lai PFA Championship Team of the Year ah a tel pha nghe nghe.

Posted in Football Players Association Of India (FPAI), MFA, Mizoram, Tualchhung.

Leave a Reply

Or