Didier Deschamps chu Laurent Blanc aiawhin France Coach atan lakluh a ni ta .Olympic de Marseille coach ni mek hian a teammate hlui Blanc chu a thlak dawn ta a. Didier Deschamps chuan a hna thar tur hi phur viau mah se ram tana a lo khelh pui tawh thin hmun ruak han luah khah chu a huphurh ru hle. French Football Federation (FFF) chuan Didier Deschamps chu France national team coach a ni tawh dawn tih a puan chu ngun taka ngaihtuah chungin a pawm ta a ni.  Didier Deschamps leh FFF hian engtia rei nge contract an ziah hi chiang taka puan a ni lova, kum 2014 FIFA World Cup thleng chu a chiang saa ngaih a ni a, chutih lai chuan kum 2016-a France rama Euro Football championship an thlen turah France ram team hi a la enkawl thlen beisei a ni. He kum 43 Coach hian Monaco ah 2001 khan Coaching hna hi bul a lo tan a, Marseille a zawm hma hian Italian lamah Juventus te pawh a lo enkawl tawh a ni.

Didier Deschamps hian sulhnu a ngah hle a, Nantes Marseille (France), Juventus (Italy) Chelsea (England) leh Valencia (Spain) ah te a lo khel ve tawh a ni. Vawi 103 zet an ram, France kawr ha tawhin, kum 1998 Fifa World Cup leh Euro 2000 te kha a hun tawn ropui te zinga mi a ni.