Chelsea midfielder Frank Lampard chuan tun season-a Chelsea dinhmun sawiin, “A hma angin kan ṭha tawh lo a, tunhma kan tluk tawh lo” a ti tawl mai.

England midfielder hian a la duhtawk lova, season tâwplamah hma an sâwn viau a nih loh chuan Chelsea chuan season lehah Champions League khelh phâk a beisei loh thu a sawi bawk. Lampard hian a la duhtawk lova, karhnih kalta-a Napoli laka ropui taka an ‘comeback’ hnu khan an tlahniam tial tial nia a hriat thu a sawi a ni. Chelsea hi Thawhlehni-a Champions League quarter-final first leg ah Benfica nen an intum dawn a ni.

Chelsea hian tunhnaiah manager Andre Villas-Boas bânin, Chelsea midfielder hlui Roberto Di Matteo chu coach lailawk atan ruat a ni a. Di Matteo hnuaiah hian Napoli an hneh hnuah FA Cup semi final an lût tawh bawk a ni. Mahse Premier League lamah beisei an pha lova, an game hnuhnung pahnihah point 1 chiah hmuin, palina Tottenham Hotspurs nen point 5 laiin an la inthlau.

Lampard chuan Chelsea TV in an kawmna-ah an tlahniam nia a hriat thu a sawi a. “Kan khelh dan te, kan khelh leh tur te, tuna Pemier League table-a kan position te hi tihpalh vang a ni lova, tunhma kan tluk tawh lo a ni.  He hmun (Stamfod Bridge) hi kan kulhpui a ni ṭhin a, tunah chhan eng eng emaw vangin chupawh chu kan ti thei tawh lo a ni. Siamṭha leh tur chuan kan zavaia kan ṭan tlang a ngai.

“Tottenham hi team ṭha tak an ni a, kan intum hma khan a harsat dawn tih kan hre lawk a ni. Mahse chutichung pawhin kan theihna zawng zawng kan pe lo a, fans te tiphur thei khawpin kan khel ṭha tawk lo. Napoli kan khelh ṭuma kan phurna leh thathona kha kan neih leh a ngai a, Napoli kan hneh khan kan hlim hle a, kan thlawk a ni ber mai. Khatiang kha kan mamawh leh a ni.” a ti.

Palina kan ni thei, mahse….

Chelsea hi a zawnin season kua chu top 4 ah an la lang ziah a. Roman Abramovich-a’n a lei hnuah an champion lo a nih pawhin champion teuh ber an ni thei deuh zel a ni. “Chelsea hian palina nih kan phu ber. Tuna top 5 team dangte hi team ṭha tak tak vek an ni a, mahse palina ni tur hian theihna kan nei a, kan ni ngei tur pawh a ni. Tunah hian point 5 in kan inthlau a, mahse season laihawl velah te kha chuan palina nen kan inthlauhna hi hei aiin a tam daih a ni. Lunghnur leh hrehawm tihin awmzia a nei lova, Benfica leh Premier League game la awm te hmachhawn a, chak chho thei tur chuan keimahni kan pawimawh ber a ni.” tiin Lampard chuan a sawi.

Lampard hian Tottenham lehpelh a huphurhawmzia a hai bik lo. “Home leh away-ah hneh ngei tur nia ngaih kan hneh lo nual tawh a, tunah chuan game la awm zawng zawng hi knockout match ang veka kan ngaih a ṭul tawh a ni. Midang kan um avangin, kan chak loh a, point kan hloh chuan kan inkar hi a zau leh sawt dawn a, game khelh tur a tlem sawt bawk ang. Kan inthlauhna hi point 5 a la ni a, kan chetsual a thiang tawh lo.” tiin a sawi.

Chelsea nge Tottenham palina ni tura i rin le?

source: fifa.com