FREDDIE A CHHUAK !

Arsenal hranghlui Freddie Ljungberg chuan Arsenal a assistant manager a nihna hna chu a chawlhsan thu Arsenal chuan an puang.

Swedish kum 43 mi hi kum 9 luai Arsenal-ah khelin Arsenal ‘legend’ zinga sawi tel a ni a. Kum 2016 khân Arsenal academy ah U15 enkawl turin North London club-ah a lêt a. Kum 2017 ah Wolfsburg ah assistant manager niin a chhuak leh a, hemi hnu kum 2018 khân Arsenal U23 enkawl turin a club hluiah hian a lêt leh a ni.

Arsenal U23 te season khat a hrual chhungin a chêt ṭhatpui hle a, chumi avang chuan Unai Emery assistant ni turin 2019 khân lakluh a ni a. Emery a chhuah hnuah care-taker manager anga awmin Arsenal chu game 6 a enkawl zui a. Gunners in Mikel Arteta an lâk hnuah assistant a awm chhunzawm lehin tunah chuan chona thar hmachhawn turin a chhuak ta a ni.

Ljungberg hian club enkawlna lamah tawnhriat tam zawk a neih theihna turin Arsenal chu chhuahsan turin thutlukna a siam niin a sawi a. Tun dinhmunah erawh amah sawmtu club an awm hriat a ni rih lo niin The Athletic chuan an tarlang a ni.