FRENCH FOOTBALL TÂNA THIL PAWI LUTUK A THLENG !

Estimated read time 2 min read

Nichin mai khân French football tana thil pawi tak mai a thleng a, chu chu France a football league thuneitu sâng Ligue de Football Professionnel (LFP) ten an thawhdun pui Telefoot Chaine chu tihtawp a nih thu L’Equipe in an puang a ni.

Mediapro company hnuaia TV station Telefoot Chaine hian LFP nen thla 4 liamta mai khân inremna thuthlung ziakin kum 4 chhung thawkho turin an inbe fel a, hemi hun chhung hian Telefoot Chaine hian sum eng emaw zat an pêk a ngai a ni.

Telefoot Chaine hian LFP hnena sum an pêk tur hmasaber chu an pe nghâl mai a. Mahse a vawihnihna, September thla a pek tur €172.3 million chu an pe thei ta lo va. Tin kumin December a pêk tura an in tih €152.5 million chu an pek theih loh tur thu an sawi leh a.

Hemi avang hian LFP chu Commercial Tribunal lamah zualko in an in bei zak zak a. Mediapro lam hian kum 4 chhungin kum tin Ligue 1 leh Ligue 2 hnenah €830 million an pêk tur thu an sawi a. Mahse vawiinah Mediapro hian Telefoot Chaine chu an tihtawp thu an puang leh ta si a ni.

Hetiang a nih chuan French league sâng pahniha clubten an sum hmuh tur ang an hmu thei dawn lo tih a chiang ta a. TV rights aṭanga sum lutah hian clubte thui tak an innghah avangin Ligue 1 leh Ligue 2 a clubte tân chuan Telefoot Chaine tihtawp a ni hi manganna tham a tling dawn a ni.

LFP lam hian engtin nge thil an kalpui zel dawn hriat a la nih rih lo va, tun dinhmunah chuan French football hmakhua a thim rih hle niin a lang.

C Tlanthianghlima

Football tui ve tak

You May Also Like

More From Author