Club lian leh player lar ringawt an inlei bik lo a, club laihawl leh a hnuaihnung lama mi te pawhin an team tihchak nan player thar an lalut ve mek. Tun tum chu a laihawl lampang hi i han hrut chhin teh ang.

Fulham : Gecov in, Greening out

U-21 European Championship-a Czech Republic midfield innghahna Marcel Gecov chuan Fulham a zawmfel. Slovan Liberec player hlui Gecov hian kum 2 chhung atan contract a ziak a, a man hi £700,000 vel a ni. Euro U-21, hmanni lawka khelh zawk taka England leh Czech Republic an inkhelh tum khan Man of the match a ni nghe nghe. Fulham ah hian Dempsey leh Davies te ho nen hmun an inchuh ang.

Hetih lai hian midfielder Jonathan Greening chuan Fulham chhuahsanin Nottingham Forest a zawm. Greening hian khelh that chang nei thin mahse first team a chang pha meuh tawh lo a,khelhna hun tam zawk a mamawh vangin a chhuak ta a ni.

Atletico Madrid ah Tiago Mendes

Atletico Madrid an inla tha zel a, Juventus atangin Portuguese midfielder Tiago Mendes an lei. Kum 30 a upa Tiago hian season hmasa pawh kha Atletico Madrid ah hian a lo hmang tawh a, Juventus-ah kum 1 contract a la neih chu club nen an inbiak hnuah tihtawpsak a ni.

Tiago hian kum 2 chhung atan contract hi a ziak a, 2010/11 season khan game 31 ah goal 4 a thun a ni.

Coach Hasselbaink

Premier League-a goal thuntu Jimmy Floyd Hasselbaink chu Nottingham Forest coach a ni dawn. Chelsea striker hlui, EPL-a goal 129 thun tawh Hasselbaink hian kum 2008 khan Cardiff City a chhuahsan a, khami hnu khan a inkhel chhunzawm tawh lo. Nottingham Forest-ah hian Steve McLaren-a hnuaiah first team coach a ni dawn a ni.