Futsal:Mizo 7 awmna Delhi Champion!

#ZoFooty

Futsal:Mizo 7 awmna Delhi Champion!

Zanin dar 8:30 khan Indira Gandhi Indoor Stadium, Delhi ah Hero Futsal Club Championship Final khelh niin Mizo 7 awmna Delhi FC chuan 7-2 in Mohammedan SC an sawp a, a vawikhatna atan an champion mai bakah champion hmasa ber an ni bawk.

Goal 24 khungtu Delhi FC Captain Nikhil Mali chu Top Scorer niin Best Player-ah thlan a ni bawk. Delhi FC goalkeeper Scott Richard Moraes chu best goalkeeper ah thlan a ni a, Mangala Club (Odhisa) hnenah Fair Play award hlan a ni.

He inkhel hi MFA Honorary Secretary Pu Lalnghinglova Hmar chuan a hmunah a en a, lawmman pawh a sem ve nghe nghe.

Mizo 7 awmna Delhi FC!
Delhi FC Futsal Team-ah hian Mizo 7 awmin an vai hian Tata Trusts Centre of Excellence (COE), Mizoram chhuak vek an ni a, kumin kum laihawl khan Delhi FC hi an zawm a ni.

Delhi FC-a Mizo 7 awmte chu

  1. Jojo Zaihmingthanga, Kanan Veng, Aizawl
  2. Lalpekhlua, College Veng, Aizawl
  3. Isac Zomuanpuia, Sihphir Arpu Veng.
  4. Lalremruata, Sihphir Arpu Veng
  5. F. Malsawmdawngpuia New Champhai
  6. Lalrosanga Hrahsel, Serkawn, Lunglei
  7. Lalhmunmawia, Mualpui, Aizawl

First Half ah 2-1
He inkhelah hian Mizo player Lalpekhlua chuan Delhi FC tan goal hmahruai a khung a, fans ngah Delhi thawm a țha hle. Jayesh chuan mawi takin Mohammedan SC siphurh a sut a, team pahnihte an inhnehtawk chhunzawm hle a ni. 1-1 in first half a tawp dawn emawa tih laiin Delhi FC Captain leh top scorer nilai Nikhil Mali chuan Delhi FC hma hruai puiin 2-1 in Delhi FC in first half ah hma an hruai a ni.

Delhi FC chungnunna Second half!
Delhi FC bawkin second half bul an țan țha a, indirect freekick ațangin Naal chuan goal khungin hemi hnu hian Captain Nikhil Mali a inlar leh a, goal țha bik a khung a, dinhmun himah Delhi FC a dah a ni.

Inkhel a hmuhnawm chho a, mahse Delhi bawkin goal an khung leh a, corner atangin Peka leh Nikhil Mali ten mawi taka defence an țhiah hnuah Nikhil Mali chuan goal a khung leh a, hattrick a siam. Nikhil Mali hian tun tournament-a match tinah hattrick a siam a ni.

Mohammedan SC tan Snedden chuan an siphurh sut țhen mah se Delhi FC bawkin goal an khung leh a, Nikhil Mali chuan panenka in mawi takin penalty a pet goal.

Hun tawp dawnah Mali chuan tun tournament-a a goal 24 khungna khungin 7-2 in Delhi FC a chak pui a ni.

Image: (Tata Trusts COE naupang hluite & Pu Tetea Hmar)

LR : Gwgwmsar Goyary, Dawnga, Isac, Jojo, Pu Tetea, Remruata, Amawia, Peka, Rosanga