Lille defender Gabriel Magalhaes chuan duhtu a ngah chho hle a, Manchester United, Napoli leh Everton te chuan an duhna an tihlan hnuah a hma a thawm lo nei tawh Arsenal chu nizan khân Gabriel ngaihven hian Lille hotute lamah an ṭuan ve leh ni a sawi a ni.
Report in an tarlan dânin nimin khân Manchester United aiawh leh Gabriel-a agent te chuan England-ah (a hmun an tarlang lo) inbiakna an nei a. Mahse United hian lei dilna (official bid) erawh Lille hnenah an la thehlut lo a, chutihrual chuan Napoli lamin €22m + €3m bonus in Lille hnenah lei dilna an thehlut tawh thung niin an tarlang bawk a ni.
Red Devils hian €27m vel in lei dilna an thehlut dawn tih thâwm a awm mêk bawk a. Hemi karah hian Arsenal lo lang ve lehin anni hi Nicolas Pepe chungchanga Lille nena lo indawr ṭha tawh leh ṭhianṭha a lo innei tawh an ni a, center-back 6’3 ft. a sâng hi lakluh tuma an nawr tak tak a nih chuan an tân kawng chu a inhawng ve viau tura ngaih a ni bawk.
Brazilian center-back kum 22 mi hi vei pêt (left footer) a nih avang hian duhtu hi an tam zual niin a lang a. Tunlai football khawvelah manager te pawh an inherrem ve zel avang hian tlarhnung a laia ding tura a vei lama awmah hian vei pêt kher hi an duh chho ṭan a. Chu chu center-back vei pêt ho bazar-a an hming a rawn lan chhoh hlawm chhan pakhat a niawm e.
