Gael Bigirimana – Africa Raltlan Chu

Estimated read time 4 min read

Kum 2004 khan Coventry City thuneitute chuan mihang naupang pakhatin an club a khelh a rawn dil ringawt mai an hmuh chuan mak an ti hle mai a. Rei tak chhung chu sawi tur hre lovin an ka ho ringawt mai a ni. Chu naupang chu a inrintawk hmel em em mai chu kum 11 mi Gael Bigirimana a ni.

Coaching Staff te chuan chuti maia naupang an lak mai ngai loh thu leh an club-a a khelh duh chuan midang ang bawk a Scout ten an report phawt a, chumi hnua trial te a neih phawt hnua a tlin chuan an lak chauh tur thu te an hrilh a.

Ani pawh chu a sikul kalna te an zawt a, a address kimchang an lak hnuah Coventry atanga scout ten an la rawn tlawh tur thu an tiam a. Bigirimana pawh chu hlim takin a tlanhawng a, mahse, thilmak a thleng ta!

Hlim taka a tlan haw lai chuan Coventry Coaching Staff zinga mi pakhat chuan a lo tiding ta chat mai. A hnua a sawi leh danin, “Khatia a tlan haw ka hmuh khan a tlan chak em em mai a, player ropui ni turin theihna a nei niin ka hria a, ka lo tiding ta mai a ni.” a ti.

Gael chuan he thil thleng chungchang hi sawiin, “Ka tlanchak vangin min tiding niin an sawi a, mahse ka tlan mai mai (jogging) a ni si a. Min ko let a, ball boot te, shin guard leh inkhelhna hmanrua ka neih leh neih loh min zawt a, ka nei lo chungin nei tiin ka chhang a.” a ti.

A tukah chuan trial an neih pui nghal a, amaha talent tha tak awm chu hmuh hmaih lovin Coventry City Academy a zir turin an la ta hmiah mai a ni.

Coventry tan Bigirimana

Bigirimana chuan, “Season tawp a ni tawh a, player thar lak hun pawh a ni lova, mahse mak tak maiin min lalut hlauh mai a. Thilmak a ni. Thilmak!” a ti thlawt a ni. Mahse Coventry hian an tisual lo tih hriatna chu kum 7 a ral meuh chuan kum 18 mi Bigirimana chu Football League Association Apprentice of the Year atan thlan niin Coventry tana vawi 21 a khelh tawh ah hming a chher hle a ni.

Bigirimana hi player selfish lo taka sawi a ni a, aman a tih goal theih reng pawh a thiante siam talh a tum thin avangin coach hauh pawh a tuar zauh zauh thin. Mahse ani chuan, “Ka teammate te hi ka unaute ang an ni a, an hlawhtlinna chu ka hlawhtlinna a ni a, ka goal thun teuh aiin ka thiante goal thun tur ka siamsak teuh theih hian ka lawm em em a ni.” a ti.

Coventry coach Andy Thorn pawhin fakin, “Gael hi player taima tak a ni a. Kum lamah la naupang mah se a tumruh a, a mimal nunah harsatna tam tak a paltlang tawh avangin a tuarchhel em em a. Kum 13 mi a nih lai pawhin a rualpuite chu an ‘tough’ tawk lo tiin a senior te bula training min dil hial a ni.” a ti.

Championship Apprentice Award nen

Khelmual pawnah pawh Gael hi a entawn tlak hle a, Football sikul hrang hrangah te kal kual in harsatna tam tak kara a tumruh avanga a thlenchin ang thleng a nihzia a sawi uar hle a, naupangte chu tumruh tur leh beidawng mai lo turin a fuih thin a ni. Gael Bigirimana hi Burundi rama piang a ni a, an rama indona rapthlak tak avangin England ah hian an raltlan a ni. An ramah chuan a theih ang apiangin a inkhel ve thin a, Ball Boot a neih zawh ve loh avangin kelawngin a inkhel mai thin. England-a a kal hma in Uganda ah reilote a awm a, chutah chuan a vawikhatnan Ball Boot bun chungin a inkhel ve a, nuam a tih thu hahipin a sawi thin.

Gael Bigirimana hi Christian tha tak niin inkhelh dawn apiangin khelmualah tawngtaina a hmang ziah thin a, a ma tan mai bakah a thiante tan leh an tumpui te tan a dilsak thin a ni. “Khawvelah Pathian remruat loh thil pakhatmah a awm lova, engkim hi kan thatna tur atana thleng vek ani” tih hi a changvawn a ni.

A tawp nan hetiang ang infiammi chanchin ropui tak mai hian ka rilru a khawih em em a, in hriat atan ka rawn chhawpchhuak ve a ni e. New Essien an tih hi nakin lawkah chuan a hming kan la lam reng lovang tih tunge sawi thei? Coventry Coach Andy Thorn-a thusawi hmang hian titawp teh ang, “Bigirimana can have a ‘massive, massive future in the game’, Gael’s is an amazing story and just shows with the right dedication, work ethic and commitment what you can actually achieve.”

Rooney Opa http://rooneyopa.blogspot.com

Football ngaina em em mai, a khelh aia ziah tui zawk ka nih avangin zofooty.com hi ka tan a hlu a, ka theihna zawng zawng ka hmanna pakhat a ni. Tin, Mizoram football thanlen nan engkim thawh huamtu zinga mi ka ni ve e.

You May Also Like

More From Author

56Comments

Add yours
  1. 37
    Zaia Roite

    Post ngaihnawmin a bengvarthlak takzet. Ispiring stories hi chhiar tur awm reng se a tha. Post tur hian hun erawh a duh rei a. Mizo tawnga dah tur pawhin uluk a ngai deuh bikin ka hria. I post tha takzet e, han ti zel rawh.

  2. 48
    A LilFoe

    Siamtha nghal e.(Gael Bigirimana hi Oct 22,1993 ah a piang a 1994 ah chuan Coventry City pan thei a la ni meuh lo ang..lo type sual palh a ni e!!)..hehe..

  3. 55
    Puia Riquelme

    Good post…mahse 1994 ah kum 11 anih chuan tunah kum 29 vel ani dawn a,future a nei tha tih khi chu ka pawm lem lo..:-) mahse a entawntlak khawp mai

+ Leave a Comment

Gael Bigirimana – Africa Raltlan Chu

Kum 2004 khan Coventry City thuneitute chuan mihang naupang pakhatin an club a khelh a rawn dil ringawt mai an hmuh chuan mak an ti hle mai a. Rei tak chhung chu sawi tur hre lovin an ka ho ringawt mai a ni. Chu naupang chu a inrintawk hmel em em mai chu kum 11 mi Gael Bigirimana a ni.

Coaching Staff te chuan chuti maia naupang an lak mai ngai loh thu leh an club-a a khelh duh chuan midang ang bawk a Scout ten an report phawt a, chumi hnua trial te a neih phawt hnua a tlin chuan an lak chauh tur thu te an hrilh a.

Ani pawh chu a sikul kalna te an zawt a, a address kimchang an lak hnuah Coventry atanga scout ten an la rawn tlawh tur thu an tiam a. Bigirimana pawh chu hlim takin a tlanhawng a, mahse, thilmak a thleng ta!

Continue reading “Gael Bigirimana – Africa Raltlan Chu”

You May Also Like

More From Author

+ There are no comments

Add yours