Manchester United player thar pahnih Kagawa leh Van Persie ten Old Trafford ah Manchester United kawr nen BPL an khelh hmasak ber zan ah goal an khung nghal a, Everton 3-1 in Aston Villa mual ah an va chak a, Swansea in season duhawm hman chhunzawm zel in 3-0 in West Ham an hneh a, Wigan in 2-0 in Southampton hneh in , Tottenham leh West Brom 1-1 in an draw a, Norwich leh QPR pawh 1-1 bawk in an in draw bawk.

Tottenham 1-1 West Brom : Season bul tan tha ngailo Tottenham in an khelmual White Hart Line ah West Brom an mikhual a, kar kalta ah Tottenham hian Newcastle an hnehlo tawh a, West Brom erawh Liverpool sawp tu an ni thung. Inkhelh an tan atang in an inhneh tawk hle a, Tottenham in Bale cross atang in ball hlauhawm deuh deuh an nei nual a goal erawh an chantir theilo, West Brom player te in remkhawm dan a fuh a, player tlanchak awm khawm Tottenham player te an veng thei zel, 1st half ah goal a lut lo. 2nd half ah pawh goal hlauhawm tak sawi tur a awm lem lo a, midfield inbeihna a tih theih awm e. Min 62 na ah West Brom star Shane Long chu Lukaku chuan a rawn thlak a, Tottenham lam in Vander Vaart aiah an player thar ni ta Adebayor an luh tir ve bawk. Min 74′ na ah Assou-Ekotto chuan 25 yards vel atang in a shot chu West Brom defender te lo deflect na a zarah a goal a, West Brom lam tlawm mai an tum biklo an nawr ve nghal a, theih tawp a an beihna rah chu min 90′ na ah Morrison chuan box chhung ah buai nuaih nuaih karah a pet goal a 1-1 in an in thathen ta a ni.

Aston Villa 1-3 Everton : West Ham hneh lo tu Aston Villa in Everton an mikhual a, Man Utd hneh tu Everton hian beiseina sang tak nen Villa Park an lut. Inkhel an tan chiah tih ah Pienaar chuan 20 yards atang in mawi tak in a pet goal a , 1-0 a ni nghal mai. Mikhual Everton zawk an phur a, ball pawh an keng hnem mah zawk. Min 31′ na ah Man Utd nen a an intum tum a head goal tu Fellaini chuan a pet goal a, Shay Given in a chhuah ho a tih theih awm e. Min 43 na ah Everton striker goal khung thei tak Jelevic chuan goal a khung leh a 3-0 in half time ah Everton in hma an hruai. 2nd half ah Aston Villa an rawn tang ve hle a, goal erawh an khung hleithei lo. El Ahmadi chuan a team thar tan min 75′ na ah goal a khung a, goal dang luh belh lo in 3-1 in Everton an chak ta a ni.Everton hian March thla atang in 11 games Premier League unbeaten record an nei ta bawk a ni.

Swansea 3-0 West Ham Michael Laudrup a enkawl Swansea chuan 3-0 in West Ham an hneh leh ta a, Premier league game hnih ah goal 8 lai an khung ta der mai.Min 20′ na ah Rangel chuan Swansea tan goal a thun a, West Ham keeper Jasskalein tisual a ni. Swansea player thar Michu chuan tun season ah a goal 3 nan min 29′ ah goal a khung a, 1st half ah 2-0 a ni. 2nd half an tam a mual nei tu zawk West Ham an che chhe hleithei chuang lo!! Min 64′ na ah Routledge cross atang in Graham chuan Swansea tan goal 3-na a khung ve leh a, goal dang a luh belh lo a, 3-0 in Swansea an chak. West Ham hian kar hmasa lam ah Aston Villa lo hneh tawh mahse an home an an chak nawn zo ta lo a ni.

Premier League inkhel a hmuhnawm chho tial tial a, season tir phur lai a ni bawk a, team lian leh te inkhel ah pawh game ah an inthlau lo thei hle a, hei tak hi BPL ti hmuhnawm tu a ni awm e, season an tan chauh a, player an la in leikhawm reng bawk nen, tun season ah tunge ding chang ang tih hriatthiam a har a, player lakluh thar te khel tha nghal em em mai hmuh phei chuan dam man a awm hliah hliah a ni ber mai (football tuipui tu te tan chuan).