GENNARRO GUTTUSO (Part –I)

AC Milan manager ni mek, Italian midfielder rothap, mual a hmuh rual a thinrim nghal ut ut thin nia sawi, Genarro Guttuso chanchin hi ziah tham fe a awm a, chung zinga amah ngeiin a sawi thenkhat, a tahtawl te tein tarlang chho dawn teh ang.

Mi phawsawlh ngaisangtu :

“Mi thinrim chiang taka ka hmuh hmasak ber chu kum 8/9 vel ka nih laia ka nu thinrim hmel ka hmuh kha a ni. Italy midfielder Salvatore Bagni thlalak ka pindan bangah ka tar a, ani hi pa maksak tak niin ka ngaisang em em thin.

“Amah ka ngaihsanna chhan pakhat chu, midang tih loh ang deuhin a ngalrekah a mawza a pawtthla daih a, a khup thlenga pawh chhoh a tum tawh lo hrim hrim. Ngal venna engmah bun lova, a chawn leh ngalrek lang veka a khel kha a pui hi ka ti thei khawp mai.

“Ka nuin banga thlalak ka tar chu la thla turin min ti a, ka ui hle. Nghet taka ka tar thlalak chu ka pawtthla ta thuai a, chumi rual chuan bang rawng hnawih chanve lai ka a tla tel! Ka nu thinrimin min beng thum dawm dawm nghal.

Duh duh dana awm :

“Player ka nih lai khan ka duh dan danin thil ka ti thin a, tu thurawn mah ka la ngai lova, ka pawm ngai hek lo. Ka duh danin ka khel a, nitin ka chaw ei ngai buh leh ar awm ti ka ei a, ka inbuk ziah bawk thin. Kum engemaw zat chhung chu zu lam chi reng reng ka khawih ngai lova, tuisik chauh lo chu ka in ngai lo! Zanah pawh ka duhna lam lamah ka theuleu mai thin.

“Ka thil tih apiangah hlawhtlin ngei ngei ka tum a, chu chu ka thisenah a bet tlat. He thil hi kan chhungkaw inthlachhawnnain a ken tel a ni. Ka chhungte pawhin hetiang rilru hi an pu vek.

“Inkhelh hma zanah at ka so thin! Zankhuain TV/Movies ka en a, inkhelh dawn ni, chawhnu lamah ka muhil thin. Hei vang hi a ni mai thei, ka pindanah midang an awm ve ngai lova, keimahin ka awm thin. Ka lak urhsun lutuk vang a niang.

“Kum 2003 Champions League semi-final a AC Milan-in Inter Milan kan khelh dawn tum kha ka la hre reng. Ka phur lutuk helhhawlh kha chawlhkar hnih chhung chu Sofa-ah ka riak.

Thian thian a awm lo :

“Thiante nena inhmachhawn zawnga inkhelh mai mai pawh kha ka duh ngai lo, a chhan chu ka inkhelhpui, lehlam pawla tang apiangte nena kan inhauh buai ngei ngei thin vang a ni. Milan leh club danga ka awm laia ka khelhpuite lakah pawh hetiang tho hi ka ni.

“Ballboot ka bun a, jersey ka hak tawh chuan ka khingpuite kha tute nge an nih ka ngaihtuah tawh ngai lova, chuvangin ka thiante hmachhawn ka duh ngai lo. Eng thil nge ka tih, tih ka hre ngai lo. A hnu daihah, ‘E he, hetiang hian ka lo ti a maw? Chutiang chuan ka lo sawia maw?’ tih a ngai leh thin a, ka ni nuaih zel.

“Chuvangin ka tan chuan inkhel lova mahnia lo tlan leuh leuh kha a fuh ber. Savun hampuar kan inchuh tawh chuan keimaha ramsa hi a rawn che tawh mai thin