GENNARRO GUTTUSO (Part – II)

Estimated read time 6 min read

Beach kamah ! :
“Team aiawha ka inlan hmasak berna hmun chu tiaupho (beach) a ni! Kum 12 ka nihin mumal takin football ka khel ve chauh a, hemi hma hi chuan tuipui kamah kan khel thin.

“Lawng atanga tuialhthei an lakchhuahna bur chu goal banah hmangin sangha mantuten an hual velna karah, lung hriam, tuikep leh sangha phuhlip rapbetin kan chhir khu rem rem thin. Hetiang hmuna kan inkhel thin hian a hnu zelah game rorum khel thei turin min pui nasa hle.

“Pan lai nun kha a lo nuam a ni. Kan duh hunah San Siro, Wembley, Maracana leh La Bombonera-ah te kan inkhel mai thin!! A chhan chu kan inkhelhna hmun tiaupho leh kawngpui dung kha a hunlaia stadium lar deuh hming kan puttir zel mai.

“Tunah chuan ngaih pawimawh zawng pawh a lo danglam ta a, kan hunlai nen a inang tawh lo. Nu leh paten hna an thawh rei avangin an fate pawh school-ah tlai dar 5 thleng te an awm a ngai a, naupangin inkhelhna hun an nei tlem.

“Italy hmar lamah phei chuan thiante nena a rem lai laia inkhelh (street football) ang chi kha a rem tawh lo; football zirna hmuna inziak lut tan lo chuan inkhelh a theih lo tluk a ni.

“Hun khirh leh harsa ka tawh chang chuan ka maimitchhing a, kan tualchai thinna hmun tiaupho leh kan nundan te ka chhuikir thin. Khang tuipui kam leh khawlaiah te khan kum 11 leh a chanve ka nih thleng ka tualchai thin.

“Chhungkua leh chenna in ka neih loh vang a ni lo; kan inkhelh ve theihna awmchhun; thian kan siam ve theihna hmun awmchhun a ni tlat. Khatih hunlai khan patlingin nilenga rim taka hna a thawk chungin tlemte bak a hlawh ngai lova, naupang tan phei chuan football khelha intihhlim bak duhthlan tur a awm chuang lo. Hlawhtlin theihna te tak te chauh nei chungin tun dinhmun hi ka thleng niin ka hria.

Thawhrim rah :
“Kum 12 a upa ka nihin Perugia academy ka zawm a, kum 5 chhung ka awm. A tir lam thla engemaw chen chu ka mal ngawih ngawih a, hrehawm ka ti hle; tawng pawh ka tawng ngai meuh lo. Mahse, inhum ruhin; ‘Helai hmun hi ka tana hmun tha ber a ni’ tiin keimah leh keimah ka inhnem thin. Thil awlsam erawh a ni lo.

“Inelna hrang hrangah kan tel a, kum bithliah inelna kan telna reng rengah a ber nihna kan hauh deuh vekin ka hria. Keimah pawhin hma ka sawn nasa a, nitin khan a ber nih duhna leh hmasawn chaknain ka tuihal a ni ber.

“Mahse, kan hunlai kha Serie A club ten kum naupang zawkte tana khelhna remchang an pek mang ngai loh hunlai kha a ni a, hmun pawimawh chan a har. Coach thenkhat chuan mi bik, theihna chungchuang nei niin min sawi thin a, mahse, a nih hauh lo. Ka thawhrim rah liau liau a ni zawk ang. Midang hriat lohva nasa taka beia, ka ke tichak tura ka tlan (running & pedalling), gym-a ka luh leh thil danga peng lo tura ka inthunun vang a ni.

“Hma ka sawn ve zel avangin Italy U18 tana khel turin koh ka ni a, France-ah kum 18 hnuailam inelnaah ka inlan a, he tournament hi Europe ram hrang hrang atanga naupang inkhelh thiam zawng ten a hmunah a thutchilh. Rangers (Scotland) atanga lo kal chuan min duh ve hle a niang, min sawm. Hmin ka har lem lo, kum 19 ka nihin Glasgow khawpui hi ka pan.

“Glasgow khawpui hi professional footballer anga thawk ka lak hmasak berna hmun a ni. Perugia tana ka khelh lai khan rilru lamah ka duap thin. Mual chhungah tihsual hlauthawng reng rengin ka khawsa a, ka ke hi a sai hlawk hlawk fo.

“Scotland ka thlen hnuah erawh thil a danglam. Player langsar tak tak Brian Laudrup, Jonas Thern leh Paul Gascoigne te bula ka khel thei kha ka inchhuang a, an bulah hian timna nei hauh lovin ka khel thei ang, tih rilru ka pu!

“Gascoigne kha mi nun dingdihlip, pa maksak leh ing-euh tak ni mah se thurawn min petu ber a ni a, Glasgow khawpuia ngampa taka ka awm theih na’na mi pawimawh tawpkhawk a ni. M chhaih leh sawisak (fiam) lamah a lar a, a nawlpuiina an hriat loh chin dan mak deuh deuh a nei teuh. Kei pawh Rangers a ka luh hlim khan min lo lawmna chi khat atan ka mawza min hnim sak!

Kawrchung nen :
“Kum 1950 bawr chho atang khan Rangers hian tihdan nghet tak an nei; player te chu training-na hmunah Suit leh Necktie nena an inthuam a ngai!

“Rawlthar lungmawl mai ka ni a, thawmhnawin ka rilruah hmun a chang lo. Pathiannia thawmhnaw pangngai ka ha lai hmuh fuh chu mi vannei tak an ni. Player dangte hak ang ka hak ve ngei erawh a ngai.

“Tichuan le, nikhat chu Paul (Gascoigne) chuan Glasgow khawpuia thawmhnaw thuina hmun leh man to berna hmunah min kalpui a, Suit 7/8 la turin min ti. Puanthuitu te nen chuan kan club chuan inremna neiin Rangers player ten chu dawra thawmhnaw an duh zat zat chu lain season tluanin an hlawh atanga tlem te tea pek turin an la thei tih a sawi.

“Suit bakah kawr, necktie leh thawmhnaw dang ka mamawh tur nia ka hriat chu ka hmarcha mal ta hmiah hmiah a, a man ka zawh chuan £10,000 man a ni heu mai (1997 kuma £10,000 hlutna chu a sang ve ang).

“A hnuah kan club leh puanthuitute chuan inremna an lo nei reng reng lo tih ka hrechhuak. Paul khan thawmhnaw hak mai tur ka nei lo kha min khawngaihin ka inthlahrun loh na’n min lo bum a, ka thawmhnaw lak man zawng zawng ama pawisain a pe lo pe vek chu niin!!

“Paul Gascoigne kha hetiang mi hi a ni. Tunah chuan hman ang kha ni tawh lovin zu bawihah a tang a, a chanchin erawh kan sawichhuak fo. Mi rilru lian leh zau, mi hriatthiamna ngah tak a ni. Mual chhung mai ni lo, mual pawnah pawh kan hlimpui ber a ni thin.

C Tlanthianghlima

Football tui ve tak

You May Also Like

More From Author

2Comments

Add yours

+ Leave a Comment