Germany : Vawi 3-ah vawi 3 an chak #FootballKaida

ZoFooty #FootballKaida

Germany : Vawi 3-ah vawi 3 an chak

Hansi Flick hnuaiah Germany chuan match thum an khel ta a, hnehna an chang vek bakah goal 12 khungin goal an chhuah lo. Bayern Munich manager hlui Flick atana hei aia ṭhaa bul ṭan dan a awm lo a, amah pawhin za zain ka ka lungawi a ni, a ti reng a ni.

Nilaini zan khan Germany-in Reykjavik-ah Iceland an hmachhawn a, 4-0 in hnehna an chang. Mikhual team tan Serge Gnabry (4′), Antonio Rudiger (24′), Leroy Sane (56′) leh Timo Werner (88′) ten goal khat ṭheuh an khung. Hansi Flick-a hote hian point 15 hmuin group J hmahruaitu an ni a, match li khelh tur la awmah an hnuai chiaha awm Armenia aiin point liin an hmu tam zawk. Germany ṭantu World Cup a hmun ngeia en tum chuan Qatar panna flight ticket a book ngam tawh e.

(Germany bawk! Die Mannschaft ṭantu lo tan chuan a ninawm hial dawn a, football ngainatute tan erawh hun awl hnawh khatna ṭha tak a ni ve ang. Chutihrualin BBC han lut ila, Germany chungchang chu 117 words-ah an ziak zo der. England chungchang erawh post pakhat aia tam a awm a, inkhel review-na zawk pawh 781 words a ni daih bawk. Engpawh chu nise ZoFooty lamah BBC aia chipchiarin Germany chungchang chhiar tur a awm alawm ti mai ang. Europe bikah chuan international break a zo ta a, coach ṭha bik Pep Guardiola, Thomas Tuchel leh Jurgen Klopp te khelh dan kan chhui zui thei tawh ang)

BUL ṬANTUTE
Liechtenstein 0 – 2 Germany
Germany: Leno – Baku (Hofmann 60′), Sule, Kehrer, Gosens – Gündogan (Goretzka 73′), Kimmich (c) (Wirtz 82′) – Musiala (Reus 60′), Havertz (Gnabry 60′), Sane – Werner
Unused subs: Trapp, Rüdiger, Schlotterbeck, Adeyemi, Raum, Dahoud
Out: Müller (thigh), Neuer (hamstring)

Germany-in Flick-a hnuaia an hmachhawn hmasak ber chu Liechtenstein an ni a, FIFA ranking-ah 189-na niin chak ngeina tur inkhel a ni hrim hrim. Chuvangin Antonio Rudiger a hahdamtir thei a, midfield laiah Ilkay Gundogan leh Joshua Kimmich te inkawptirin Leon Goretzka a hahchawlhtir thei bawk. Player naupang zawk Jamal Musiala pawhin bul a ṭan. Chutihrualin bench aṭanga player luh dan enin khel ve hrim hrim rawh se, tih lam ni loin an chhawr tlak dawn em tih a zir uluk hle.

Europe ram inelna sang chinah hi chuan khel ve hrim hrim rawh se, tih hi a awm thei dawn em ni? kan ti maithei. Euro 2020 ṭan hma khan Gareth Southgate-a’n inelna taka squad-a a telh miah lote pawh friendly match-ah a chhawr a ni kha, khatiang ang chi kha kha, tun ṭuma khel ve hrim hrim rawh sekan han tih ang chi chu a ni.

Germany 6 – 0 Armenia
Germany: Germany: Neuer (c) – Hofmann, Süle, Rüdiger, Kehrer (Raum 83′) – Kimmich (Gündogan 61′), Goretzka – Gnabry (Adeyemi 72′), Reus (Wirtz 60′), Sane (Musiala 60′) – Werner
Unused subs: Leno, Trapp, Baku, Schlotterbeck, Klostermann, Neuhaus, Dahoud
Out: Gosens (foot), Havertz (illness), Müller (thigh)

Armenia hi FIFA ranking aṭanga teh chuan 88-na an ni daih a, mah se an inhmachhawn hma hian group hmahruaitu an nih miau avangin Flick-a tan pawh fimkhur a ṭul. Captain Manuel Neuer a rawn dam tawh a, first match khelh ṭhat dan milin player a rawn rem. Right back-ah Ridle Baku tan hmun a awm ta lo a, bench aṭanga rawn lut Jonas Hofmann a ring ta zawk. Defence laiah Rudiger a rawn awm thei lo a, Robin Gosens a inhliam avangin PSG defender Thilo Kehrer chu vei lamah a kaltir a ni.

Flick-a’n Bayern Munich-a a player rin pahnih Kimmich leh Goretzka te a dahkawp a, striker hnunga awm tur Havertz a damloh avangin Marco Reus a rawn lut. Serge Gnabry pawhin bul a ṭan a, Musiala aia tawnhriat nei ṭha zawk Gnabry hian bul ṭan hi a phu ve hrim hrim bawk. Post hmasa lamah pawh tarlan tawh a ni a, Germany-in hma tawng an neih ṭhat tawk loh avangin Timo Werner aia rintlak tur an awm lo.

Iceland 0 – 4 Germany
Germany: Neuer (c) – Hofmann (Klostermann 46′), Süle (Gosens 60′), Rüdiger, Kehrer – Kimmich, Goretzka (Wirtz 80′) – Gnabry (Havertz 46′), Gündogan, Sane (Musiala 60′) – Werner
Unused subs: Leno, Trapp, Raum, Schlotterbeck, Adeyemi, Neuhaus, Dahoud
Out: Baku (rested), Müller (thigh), Reus (knee)

Match thumna a ni ve ta bawk a, Flick-a’n a player ṭhenkhat hahchawlhna hun a pe turah an ngai. Starting eleven an han puan chiah chuan chutiang aw zawng a lo ni lo. Inhliam vanga Borussia Dortmund captain Reus a khelh theih loh avangin Gundogan a rawn lut ta zawk a, player dang zawng an ngai vek.

Thlirna dang lehah chuan Flick hian Bayern player a ngai pawimawh hle. Match hnuhnung pahnihah Bayern player a koh zingah Musiala chiah bench-ah a dah a, hei pawh hi minute 60-na ve veah a luhtir. Bayern-a a khel ṭhin dan thoin attacking football an khel a, hun rei lote chhunga Germany lan dan a dang ta vek hi a ropui lai chu a ni.

GOAL HNIH PHAWT
Minute lina lekah Gnabry-a’n goal hmahruai a khung a, assistant referee-in offside ti mah se VAR hmangin goal-ah pawm a ni. A goal dang hi chiang zawka kan thlir chuan team goal mawi tak a ni a, Bayern player pali an inrawlh.

Lammuala inkhel tawh Niklas Sule ball vawrh luh chu Kimmich-a’n box chhungah a la thla a, Leroy Sane pein Manchester City winger hlui hian vawi khatah lei hrulin a pe lut a, Gnabry-a’n awlsam takin a khung. Inkhel ṭhinte tana chhinchhiah tur ‘VAWI KHAT’ tih lai hi a, Sane khan vawi khatah chuan pe lo se Gnabry kha a offside dawn.

Mahni muala khel an ni bawk a, minute 16-naah Ísak Bergmann Jóhannesson-a’n German keeper Neuer-a tan hna a siam. Iceland hian Hofmann-a awmna lam dinglam aṭangin an nawr a, chutihrualin Sule-a’n angle a khar danah keeper a pui ṭhat avangin tlarhnung player-ten an hna an ti ṭha viau.

Minute 24-naah Germany-in goal hnihna an khung a, Kimmich-a freekick chu Rudiger-a’n a tauh goal. Chelsea defender hian a tauh ṭha thlawt a, Kimmich-a’n ‘world class midfielder’ a nih zia a pholang zel.

Goretzka pawhin a hun ṭha neih goal-ah ṭha takin pet mah se Iceland keeper-in a dan sak a, Sane freekick erawh goal kham chung daihah a kal. Minute 43-na thil thleng erawh Germany tan inenfiahna tham a tling a, Iceland-in Germany tlarhnung ṭhiat ṭha mah se Burnley winger Jóhann Berg Gudmundsson-a’n a pet ṭha tawk lo.

GOAL HNIH DANG
Second half ṭan aṭanga minute thumna lekah Iceland-in Germany tlarhnugn an ṭhiat nawn a, Jóhann Berg Gudmundsson ball petin goal ban a per a, hemi per let hi Albert Gudmundsson-a’n goal-ah chantir mah se offside vangin pawm a ni lo.

Iceland-in siphurh sut an tumna lamah an nawr chiam a, counter attack-ah Germany-in chance ṭha an neih phah. Timo Werner-a’n Chelsea tana a khelhpui Havertz hnenah ball ṭha pe mah se keeper chiah hmachhawntu Havertz hian goal pawn chiahah a pet.

Minute 56-naah erawh Sane-a’n dan rual loin kawh zetin a pet goal a, ball petu hi Goretzka a ni. Box chhungah Icelandic player pasarih zet awm mah se Sane hian goal khung theihna turin hun thawl a nei tho.

Germany striker-ah Werner aia ṭha an awm lo han ti ṭhin mah ila Chelsea forward hi chet nawi ṭum a nei leh ṭhin. Gundogan-a through ball ṭha bik chu Hofmann thlaktu Lukas Klostermann-a’n dinglam aṭangin box chhungah ṭha zetin a pet lut a, Werner hian goal ruakah chiang takin a pet over.

Flick-a naute khel a nung a, Kimmich-a corner pet chu tauh chhuak mah se midfielder ball thiam Gundogan-a’n awlsam hmel taka la thlain (Fred chuan a ti per ṭuk maithei) Goretzka tan a pe a, Bayern midfielder hian kawh zetin a pet goal. Goretzka leh keeper inkarah Musiala a lo awm avangin pawm a ni lo a, Bayern midfielder a vanduai hle.

Timo Werner-a’n chance ṭha a hlah nawn leh a, Iceland keeper Hannes Þór Halldórsson a rim mawlh mawlh hle. Germany-in goal thum khung tawh mah se na takin an nawr zel a, minute 88-naah Werner hmangin an khung belh. Chelsea forward ball pet hi keeper-in a dan fuh tawk loh avangin goal ban a fuh a, lehlam goal ban bulah a kual lut. Ball hnaih bertu Havertz-a’n lo pet goal ta daih se chuan offside vangin pawm a ni lo, Chelsea midfielder hian insumtheihna a nei tlat (Nani kha chu a insum thei lo a, Ronaldo goal ropui tur a ti goal zeuh. Offside avangin an pawm lo a, Portugal captain a thinur nasa a nih kha).

KHAI KHAWM ILA
World Cup-a champion turin Germany an ṭha tawk em tih zawhna a awm thei nghal a, a chhanna chu a la hriat loh, tih a ni mai. Germany awmna group hi an ṭhat loh avangin Hansi Flick-a hote fiah theitu tur an awm dawn lo a, chutihrualin an khelh dan thlirin World Cup-a champion rinkai tur zinga mi chu an ni.

Goalkeeper hi Germany ṭhatna a ni a, defence erawh an ṭha tawk ṭhin lo. Match thum an khel tawh aṭanga chhut chuan Matthias Ginter te la awm bawk mah se Rudiger leh Sule an inkawp chhoh theih mai a rinawm. Left back-ah Robin Gosens a rintlak turah a ngaih theih a, right back erawh club lama an chet ṭhat dan a pawimawh ang. Tun dinhmuna right back inchuh turte chu Hofmann, Klostermann leh Baku te an ni.

Midfield laia awm dun tur chu a chiangah a ngaih theih a, Kimmich leh Goretzka te an club khelhna a inan miau avangin Gundogan-a tan khelhna hmun chan a harsa ang. Chutihrualin Manchester City midfielder Gundogan hi squad tih chhahna ṭha tak a ni thei dawn a, attacking midfield lam pawh a chuhpui hial thei. Mahse, Marco Reus, Kai Havertz leh Thomas Muller te an awm a, khelhna hmun chan a har ve khawp ang.

Mual sir aṭanga nawr tur chuan Leroy Sane leh Serge Gnabry te aia ṭha Germany-in an kawl rih lo a ni mai lo a, khawvel huap pawhin an zahpuiawm loh. Bench lamah Musiala a awm bawk a, attaking midfielder-a awm thei ho hi mual sira pawh theih an ni bawk. Flick-a’n lawmna tur dang a la nei a, kum 18 mi Florian Wirtz-a chevel mit a tlung hle. Bayer Leverkusen midfielder Wirtz hi lo chhinchhiah ula, World Cup athlen meuh chuan kum 19 mi a ni tawh dawn a, tawnhriat a neih belh tawh dawn bawk avangin tun aia hmun pawimawh a chang hial thei ang.

Germany media lam buaina chu striker bawk a ni a, Werner an ringtawk lo. Mahse, Flick erawhin Werner hi match thum an khelhah a khelh tluan tir vek a, match tinah goal a khung ve bawk. Coach berin a rin miau chuan RB Leipzig tana striker ṭha bik ni ṭhin khan a theihna tak tak phochhuah hun a la nei thei ang. Werner duhthu a sam tawk loh vang te pawh a ni ang, Germany Under 21 lama Youssoufa Moukoko khelh dan te kan thlir pah nghal.

Moukoko hian San Marino 6-0 an hneh ṭumin goal hnih a khung a, Latvia 3-1 an hneh ṭumin goal khat a khung leh bawk. Borussia Dortmund forward hian theihna sang tak a nei a, amaherawhchu kum 16 mi a nihna hai rual a la ni lo. DFL Super Cup-a Bayern Munich nen an inkhelh ṭumah pawh khan Moukoko hi a khel chhe lo a, chutihrualin Werner el pha tur chu a la ni lo.

Engpawh chu ni se, Pathian zara kan dam chuan October thlaah Germany inkhel kan thlir lawk ang a, kan review leh bawk ang. Comment lamah ngaihdan a sawi zui theih e.