Mizoram sports journalist hriat hlawh ber zinga mi Francis Paul (Gerrard-a Pa) chu tukin zing dar 5:00 khan (July 14, 2020) khan lungphuchawl avangin a thi a, vawiin chhun dar 12:00 hian vuiliam a ni ang.
Pu Paul TK Donga fapa Francis-a hi kum 42 mi a ni a, Roman Catholic niin a chenna Neuva Section, Zuangtuiah vuina hun hman tur a ni.
ZoFooty-in July 9, 2011-a S. Malsawmtluanga hoa website thar kan hawn tum khan Gerrard-a pa hian min telpui a, a tul aianga ZoFooty puih a inhuam thu a sawi a, tun thlenga kan website min ngaihvensaktute zinga mi a ni.
Gerrard-a pa hian ZoFooty thatna turin thurawn tam tak min pe a, kan ui takzet a ni. Mizoram football-in rahbi thar a kai theih nan Gerrard-a pa hi sulsutu pawimawh a ni a, football ngainatute bengah Red Ribbon Football tantirha a commentary ngaihnawm tak a la cham reng ang.
Doodarshan-ah kartin chhuak Sports Magazine a buatsaih thin a, LPS lamah sports hmangin sulhnu tha tak a hnutchhiah bawk. Football chauh ni loin infiamna khawvela a hmunruak zau tak hi hnawhkhah mai theih a ni dawn lo.
[Pic : Gerrard-a pa leh AIFF Instructor Scott O’Donell]
Gerrard – a pa hi a vanglaiin football – ah 1st division player a ni pha a, Mizoram Football Association – ah kum 10 vel Executive Committee Member niin sub-committee hrang hrangah hruaitu a ni thin bawk. Football hmasawnna tur duhin a thiante nen Mizoram Football Management Group dinin Aizawl FC dinthar leh nen tha thawhin tuna a neitu ni ta hi sawm lutin tun dinhmun hi an thleng thei a ni.
AIFF leh MFA hmalaknain India rama a hmasa ber atan Mizoramah Grassroots Development programme tan a nih khan Development Officer hmasa ber a ni bawk. Hei bakah hian MFA leh Mizoram football tan sulhnu chhinchhiahtlak engemawzat a hnutchhiah a ni.
Liverpool tantu a nih avangin Francis Paul hi a lar a, Reds club legend Steven Gerrard hming chawiin a fapa hmingah Gerrard a vuah a, Gerrard-a pa tihin a lar zui. A club tan ber Liverpool-in Premier League nomawi chawi lai a hmu lo tur hian hnuk a ti ulh takzet.
Gerrard-a Pa kan ui takzet che, Pathianin i chhungte thlamuanin awmpui rawh se tih hi kan tawngtaina a ni.
Muangin chawl ang che.