Goal-line technology chu a tawp tawpah hman a ni dawn ta a. Zurich-a meeting an neihah International Football Association Board (IFAB) member-te zingah a duhtu an tam ber avangin hman tur a ni chiang ta a. Kan en hnem ber English Premier League-ah chuan season thar, 2012-13 season chawhnu lam atangin an hman tan theih hmel a. Hman a nih hmain, hemi chungchanga zawhna awm thei leh a chhanna lo hriat hmasak hi a finthlâk hle awm e.

1. Kum engemaw zat inhnialna a awm tawh hnuah goal-line technology chu hman a ni dawn ta a. Football Match tinah hman a ni ang em?

International Football Association Board-in hman duhin vote thlu mahse, Football Association tinte chuan anmahni huamchhung competition-ah hman a nih leh nih loh tur chu an la ngaihtuah leh ang.

 2. Kha chen kha FIFA hian goal-line technology hman hi a duh lova, eng vanga a ngaihdan thlak nge a nih?

World Cup 20120, South Africa-ah, Germany leh England an inkhelh tum khan, Frank Lampard chuan goal bar a pet per a, chumi let thla chuan line pelin a sawt a, mahse referee chuan goal-ah a pawm lova. Khami hnu khan nasa taka inhnialna a chhuak a. FIFA president Sepp Blatter ngei pawhin English Football Association (FA) hnenah ngaihdam a dil hial a nih kha. Kha kha FIFA ngaihdan inthlâk tanna niin a lang.

3. FIFA chuan a ngaihdan thlak tehreng pawh ni se, engtinge goal-line technology atana hman tur khawl an hmuh theih?

Company 8 laiin goal-line technology atan hian khawl an siam a. FIFA duhdanin, a tha ber thlan tur a nih avangin an tang hlawm hle. FIFA duhdan chuan, khawl hian ball-in goal-line a pelh chiahin referee-te sana-ah a pel a ni tih a hrilh tur a ni a. Vawihnih enchhinna neih a nih hnuah company pahnih – ‘GoalRef’ leh ‘Hawk-Eye’ te chu uluk zawka enchhin leh an ni a. Khaw chhe hnuaiah te enchhinin, electric eng hnuaiah, goal line bula player an dinin a buai thei em tihte nen lam enchhin a nih hnuah heng company pahnihte hian hlawhtling takin FIFA mamawh khawl an siam thei tih pawm a ni ta a ni.

4. Heng khawl pahnihte chan-chin hi a sawi za deuh theih em?

Tehreng mai. Hawk-Eye hian camera paruk a hmang a, heng camera-te hian field chhunga ball-te chu kil thum atangin a thla an la a, chu chu software hmanga thlunzawmin, ball awmna hmun dik tak a hre thei a. Goal-line a cross ve leh referee sana bunah, second khat pawh tling lovah signal a thawn nghal a ni.

 GoalRef ve thung hi chuan ball chhungah chip te tak te an dah a, chu chip lo man thei tur chuan goal-line bul velah chuan magnet an dah a. Ball-in goal-line a pelh ve lah, second khat pawh tling lovah referee sana a va hrilh ve leh nghal a ni.

5. Company pahnih an pawm a, engtin nge ni zel ang?

He khawl hi FIFA Club World Cup, Japan-ah kumin December thlaa khelh turah hman hmasa ber a ni ang a, chumi hnuah a hlawhtling a nih chuan 2013 Confederations Cup leh 2014 World Cup (Brazil) ah hman chhunzawm zel a ni ang.

Premier League chuan a rang thei ang bera hman nghal an duh a. Eng khawl zawk nge an hman dawn tih erawh chu Club-te duhdan an la hmasa ang a. Football League pawhin a hnuaia club 72 te nen sawihona neiin, hman leh hman loh chungchang an sawiho ve dawn a ni.

Hetih lai hian English FA pawhin FA Cup-ah an hmang ang em tih an ngaihtuah a ngai dawn a. A chhan chu club liante chuan a eng zawk zawk khawl pawh hi hmang dawn se, sum leh pai lamah harsatna an nei dawn lova. Mahse FA Cup-a club tenau deuh zawkin an ground-ah an neih ve leh dawn si loh avangin buaina a awm thei maithei a ni.

6. Champions League lam te hi? UEFA hian a duh lo em?

UEFA president Michel Platini chuan goal-line-a a goal leh goal loh hriat theihna dah hi tul a ti lova. A goal leh goal loh chungchanga inhnialna hi a thleng khat lutuk a, sum tam tak senga hman a tulna a awm lo a ti a ni. Chuti a nih chuan, tuna a lan danah, Premier League leh World Cup-ah chuan he khawl hi hman a ni ang a, Champions League leh Europa League-ah hman a ni lo thung dawn ni awm tak a ni.

Platini hian khawl hman ai chuan Assistant referee tam zawk hman mai a duh a, mahse FIFA President Sepp Blatter chuan hun rei lo teah a ngaihdan a thlak thuai a beisei thu a sawi.

7. Tuin nge a man tum ang?

Chhan hleih theih a la ni lo. Premier League-ah chuan Premier League sum leh pai hmangin club tin ground-ah dah a nih mai hmel a. Chu bakah sponsor pawh awm theih a nih hmel a, ngaihtuahna dang pawh an seng leh maithei.

International match a-ah, England-te ang chuan lawm takin khawl man hi an pe ngei ang a, mahse ram rethei zawkte chuan pawisa chawi belh teuh ai chuan khawl hman loh hi an thlang maithei. Chutiang a nih chuan a buaithlak kual hle maithei a, hetia ngaih ang ngawt hi a ni kher lovang.

 8. Engzat man nge ni reng reng?

Fifa General Secretary Jerome Valcke chuan khawl pakhat hi pound 120,000 leh pound 160,000 inkar vel man ni dawnin a sawi a, chumi aia hniam pawh chuan a la innawr leh theih maithei a ti bawk.