GOAN MIKHUAL NEIH NI

Hero I-League khelh mekah vawiin chawhnu dar hnih hian Rajiv Gandhi Stadium-ah Aizawl FC in Churchill Brothers an mikhual dawn a, TEN2 ah ‘live’ a pekchhuah a ni ang.

100% RECORD

Tun hnai game thumah tum hnih tlawm mahse Aizawl FC hian Rajiv Gandhi Stadium-an hmang thiam tlat a, Mizo mipuite mithmuhah an khingpuite lakah hnehna an la chan vek bakah goal khat chauh an la chhuah. I-League table ah pathumna ni mekin hmahruaitu Kingfisher East Bengal chu point rukin an thlau mek a, Churchill Brothers hi an hneh a nih chuan Pathianni tlai a Kolkata Derby khel turte tan result hriat nuam a ni lo ang.

Game 7 khelha goal 7 chhuah tawh Khalid Jamil a team atang hian an player pawimawh Lalruatthara chu tun season ah tum li zet yellow card a hmuh tawh avangin ‘suspend’a ni a, a inlan thei lo ang. Aizawl FC tana thu lawmawm tak erawh Mahmoud Al Amna a dam tawh a, a inlan theih a beiseiawm. Ani bakah hian tunhnaia khel tha tak Jayesh Rane leh captain Alfred Jaryan te an pawimawh leh a rinawm.

An match hnuhnung bera Mohun Bagan laka tlawm Aizawl FC boss Khalid Jamil chuan an chaklohna theihnghilh a hmalam pan a tul thu leh Churchill Brothers chu team hmasawn tak an nih avangin an fimkhur a tul thu a sawi a ni.

CHURCHILL VE THUNG

Churchill Brothers hi table ah pariatna ni mekin game 7 khelhah point 5 an hmu tawh a, goal 4 thunin an lamah goal 8 a lut tawh thung. An dinhmun en in zuam awmin lang mahse champion lai Bengaluru FC hneh thei an ni miau a, team chhia an ni lo tih a chiang.

“Aizawl FC hi team tha tak an ni a, game hmuhnawm tak kan hmuh ka ring. Football – ah hian inrintawkna hi a pawimawh em em a, result tha tak kan neih ka beisei,” tiin Churchill boss Alfred Fernandes chuan a sawi a, Mizoram chu tlang ram a nih avangin inkhelh laia thawk a harsat thin thu  sawiin chhuanlam tling erawh a ni lo a ti thung.

Goan club hian inhliam vangin an defender palian Fulganco Cardozo an chhawr thei dawn lo a, an tlarhnung player tha dang Rowilson Rodrigues pawh nupui  a neih dawn vangin a inlan lo ang. Nigerian defender lakluh an tum Benjamin Eniwo Onome chu a visa a la fel theih loh avangin an la seng lut thei lo a, an tlarhnung hi thawmthat an chak lai ber a ni hial ang.

Heti chung hian Trinidad &Tobago international striker hlui Anthony Wolfe leh India rawlthar duhawm Brandon Fernandes te an neih miau avangin zuam ngawt chi an ni lo ang.

(Pic: ileague.org)