GROUP A FIAHNA: AIZAWL FC V EAST BENGAL – Rooney Opa

Hero Federation Cup 2017 Group A chuan vawiin hian group match an khel zo dawn a, Tunah hian Chennai City FC v Churchill Brothers an inkhel mek a, dar 7-ah Aizawl FC v East Bengal en tur a awm bawk ang.
.
Group A atang hian point ruk hmu tawhin Aizawl FC in hma an la hruai a, semifinal an inhlangkai tawh. An hnuai chiahah hian point li nen East Bengal an awm a, anni hi point khat hmutu Churchill Brothers in dawtin point la hmu ve lo Chennai City FC chu a mawngphah an ni a, an tla tawh a ni.
.
Aizawl FC v East Bengal:
Group hmahruaitu Aizawl FC in East Bengal an hmachhawn tur hi tun tournament a inkhel en chaawm berte zinga mi a ni ngei ang. Aizawl hian game hnihah vawi hnih chakin point ruk an hmu mek a, goal nga thun tawhin goal thum an chhuah tawh. East Bengal hian goal thum thun tawhin goal khat an chhuah tawh a, point li an hmu mek thung.
.
He inkhela chak zak zawk hi group hmahruaitu an ni dawn a, inkhel pawimawh a ni. Aizawl hian an winger-te ah an innghat nasa leh dawn a, goal thum khung tawh Laldanmawia Ralte chu en bik chi a ni ang. Tin, tlarhnungah Kingley leh Zotea te an pawimawh leh ang a, mual laiah Amna leh Alfred an khelh that a tul ang. Team pahnihte hi an inhnehtawk pawhin semifinal an lut ve ve dawn a ni.
.
East Bengal tan semifinal lut turin goal chhuah loh a tawk a, group hmahruaitu nih an duh erawh chuan an chak ngei ngei a tul ang. An chak lo a nih chuan Chennai City leh Churchill Brothers inkhel result a zirin an la tla ve thei a ni. Anni hian innghahna tur an ngah a, Robin Singh, Wedson Anselme te hnungah Bikash Jairu, Mehtab Hossain te ho an awm leh ngei hmel a, tlarhnungah Bukenya, Rahul Bheke teho an khelh that a tul bawk ang.
Posted in AIFF, Aizawl Football Club, Ramchhung.

Leave a Reply

Or