GROUP A FIAHNA: CHENNAI CITY FC V CHURCHILL BROTHERS – Rooney Opa

Hero Federation Cup 2017 Group A chuan vawiin hian group match an khel zo dawn a, tlai dar 4-ah Chennai City FC v Churchill Brothers inkhel kan hmu ang a, dar 7-ah Aizawl FC v East Bengal en tur a awm bawk ang.
.
Group A atang hian point ruk hmu tawhin Aizawl FC in hma an la hruai a, semifinal an inhlangkai tawh. An hnuai chiahah hian point li nen East Bengal an awm a, anni hi point khat hmutu Churchill Brothers in dawtin point la hmu ve lo Chennai City FC chu a mawngphah an ni a, an tla tawh a ni.
.
Chennai City FC v Churchill Brothers:
Tlai dar 4-a inkhel turte hi beisei nei tawh lo Chennai City leh semifinal luh la beisei tawk tawk Churchill Brothers an ni a, Chennai City hian beisei tur nei tawh lo mah se point hmu miah loa mualpho taka haw an duh bik a rinawm loh a, Churchill Brothers tan lah semifinal luh theih beiseina chhete an neih hi umzuiin a theih anga nasa a chak an tum a pawimawh ang. Chutih rualin semifinal luh leh luh loh hi an kutah a awm tawh lo a, East Bengal an chak emaw, an inhnehtawk emaw a nih chuan chak mah se an tan awmzia a awm dawn lo a ni.
.
Chennai City tan hian forward Charles de Souza a pawimawh leh dawn a, amaherawhchu, game hnihah goal hnih chiah la thun thei an nih avangin beisei erawh a chau angreng hle. Ani pui tur hian Edwin Vanspaul, Dhanpal Ganesh teho an khelh that a tul ang. Tlarhnungah Anyichie Celestine leh Abhishek Das te chu an innghahna an nih leh a rinawm.
.
Churchill lam hian an tih theih zawng chu chak a ni a, a chhe berah sithum fai tala an chak a tul ang. East Bengal nen an inhnehtawk tawh avangin head to head ah an intluk a, annin Chennai City hneh se, Aizawl FC in East Bengal lo hneh ta sela, goal difference a East Bengal hneh tur chuan sithum tala an chak a tul dawn a, hei hi East Bengal an chak loh chuan tih a ni a, an chak lohna zat azirin goal lut ngai hi a danfglam thei awm e. Anni hian an chhuanvawr Ghanefo Kromah an rawn hmachhuan leh ngei dawn a, thlawp turin Chesterpoul Lyngdoh, Brandon Fernandes teho an tangkai leh ang. Tlarhnungah an innghahna tur chu Adil Khan a ni leh bawk ang.

Posted in AIFF, Ramchhung.

Leave a Reply

Or