Liverpool laka tlâwm Arsenal chu tlu nawn lovin Villa Park-ah hnehna an chang a, Bukayo Saka goal khung hmangin Aston Villa chu si khat faiin an hneh.
UEFA Champions League khelh tuma ṭan la mêk Arsenal hian first half-ah mual neitu Aston Villa lakah game thunun in Bukayo Saka goal hmangin minute 30-naah hma an hruai a, he goal hi Arsenal in Premier League chanchina goal 2000 an khungna a ni.
Second half-ah mual neitu Aston Villa chuan hun tam zawkah ball an chang tam a, chutihrual chuan Arsenal tlarhnung an ṭhiat hleithei lova. Arsenal zawkin counter attack aṭangin goal an khung teuh hle a, Alexandre Lacazette chuan chance ṭha tak hmu in duhthlan tur pahnih a nei a, shot emaw dinglam a chângtu nei lo Martin Ødegaard pêk a ni. Arsenal captain hian shot thlang zawkin a tisual ta niin a lang a, Villa defender ten an rawn dang hman a, goal an khung belh ta lova.
Steven Gerrard-a nau te hian hun pek belh, minute 94-naah Arsenal goal zawnah an pêt ve chauh a, zanina inhliam Aaron Ramsdale aia khel Bernd Leno chuan lo bêng chhuakin hun a tâwp zui a. Arsenal in point 3 hlu tak hmu in Aston Villa erawh a zawnin an tlâwm ta thung a ni.
Aston Villa hian khelh 29 ah point 30 hmu in 9-na an ni chhunzawm a, international break zawhah Wolves khelmualah an lût dawn a ni.
Mikel Arteta enkawl team hian khelh 28 ah point 54 hmu in 4-na an ni chhunzawm a, an chunga awm Chelsea nen an khelh zat inangin Blue hian point 59 an hmu a. 5-na awm mek Manchester United chuan khelh 29 ah point 50 an hmu thung a ni.
A zawna khual muala game 5 chak zâwn mêk Gunners hian April ni 4, 2022 (Thawhṭanni) zan zanlaiah Crystal Palace an luhchilh zui dawn a ni.
Aston Villa 0-1 Arsenal (FT)
Bukayo Saka 30′
