Kumhlui thlah zana halpuah an hal avanga hliam tuar Norway leh Galatasaray player Omar Elabdellaoui chu damdawi inah a la awm mek. Norway vice captain hian an inah vanduaina a tawk a, Kum 29 a upa defender hian an in chhungah halpuah halin a tum loh deuhin a keng puak a, a hmai tikangin a mit a tichhe tel a, a inkhelh chhunzawm leh thei ang em tih hriat a ni lo.
Turkish newspaper Hurriyet tarlan danin Manchester City player hlui hian a mit (eye) a chan mai thei tih sawiin a mit a khawih chhiat dan chiang tak an tarlang lova. Nikhua a hria a, zai a la ni lo tih an tarlang bawk. Elabdellaoui hian kum 2020 khan Greece club Olympiacos atangin Galatasaray a zawm a, damdawi inah hian an manager Fatih Terim leh team captain Arda Turan ten an tlawh nghe nghe.
Ram changkang zawka kan ngaih Europe ram te hian kumthar lawm na’na halpuah leh halmawi hal hi an uar hle a, kumin kumthar ruala halpuah an hal avangin Europe-ah mi 4 in nunna an chan nghe nghe a ni.
France khawchhak lama thingtlang khaw pakhat Boofzheim-ah patling kum 25 mi chu rocket an halin fuhin a boral. Rocket hian a lu tan chhumin a bul hnaia lo awm ve tlangval pakhat chu a hliam bawk.
Belgium khawpui pakhat Antwerp bul lawka awm Pulle-ah pawh rocket halin a den fuh avangin tlangval kum 28 miin nunna a chan a, Italy hmarthlang lama Asti-ah mipa naupang kum 13 a upa chuan halpuah puak avangin a pum hliam na tak tuarin a hnuah a boral zui bawk.
Germany state pakhat Brandenburg-ah tlangval kum 24 mi chuan ama siamchawp halmawi halin a thil hal hian amah a kang a, a nunna a chan a, putar kum 63-a upa pakhat chuan halpuah keng puakin a kut a chan bawk a ni.
