Hansi Flick leh a pu Joachim Low

Estimated read time 8 min read

ZoFooty #FootballKaida

Hansi Flick leh a pu Joachim Low
Zanin dar 12:15 hian Reykjavik-ah Iceland-in Germany an mikhual dawn a, an khelh dan tur thlir lawk pahin Hansi Flick leh Joachim Low te khaikhin pah teh ang.

(Mizo foobtall page hrang hrangah Manchester United an ziak tam bik tih thawm te kan lo hria a, ‘a dik e/ a dik lo e’ rawn tih kan tum lo. Hei Germany chanchin chhiar tur a awm leh ta, kan rawn ti dek dek a ni. Die Mannschaft chanchin chhiar châk loh chuan in lo en liam/en kan mai dawn nia)

INTAWNNA HMASA
FIFA World Cup 2022 khel tur zawnna neih ṭan a nih khan Germany khingpui hmasa ber chu Iceland a ni a, kum March 26 khan MSV Arena, Duisburg-ah inhmachhawnin Die Mannschaft hian inkhel thunun chungin 3-0 in hnehna an chang.

Inkhel kan thlirlet a nih chuan minute hnihna lekah Leon Goretzka-a’n goal hmahruai a khung. Joshua Kimmich-a ball vawrh chu box chhung aṭangin Serge Gnabry-a’n a pe let a, Leon Goretzka-a’n box chhung vek aṭangin chiang takin a ti goal.

Minute sarihnaah goal hnihna a lut lehnghal. Kimmich through ball chu Leroy Sane-a’n a um lut a, Bayern Munich winger hian box chhungah lalutin Kai Havertz a pe a, Chelsea winger hian chiang zetin a pet goal.

Second half-ah goal thumna hmuh chauh a ni a, minute 57-naah Ilkay Gundogan-a’n box pawn aṭangin goal kilah tak a pet goal. Germany hi vannei se goal dang khung thei tur an ni a, Serge Gnabry-a’n goal ban a pet per leh bawk. Low-a hoten chiang takin Iceland an hneh a, fak an phu. Mahse hemi hnu hian Romania 1-0 in an hneh hram a, an mualah North Macedonia 1-2 in an hneh lo bawk.

LOW LEH FLICK
Hansi Flick-a’n Bayern Munich-ah record ṭha tak a neih avang ringawtin Joachim Low aiin a ropui zawk tihna a ni ringawt lo. Flick-a’n tun dinhmun a thlen theih nan hian Low-a hnuaiah hian thil tam a zir tih hriat a ṭha.

Kum 61 mi Low leh kum 56 mi Flick te hi an inkhelh hun laiin midfielder an ni ve ve a, Germany senior team-a khel tur khawpin ṭha lo tawk ve ve mah se junior team tan chuan an khel ve ve a, manager ṭha tak an ni ve ve bawk. Low hi Jurgen Klinsmann-a thachhangdawltu a ni ṭhin a, Germany striker ropui chawlh hnuin head coach hna a chelh zui.

World Cup 2006 zawh aṭangin Low hian manager hna a chelh ṭan a, Hoffenheim coach hna lo chelh tawh Flick chu amah pui turin a lalut. Hriat tel tur erawh Flick-a enkawl Hoffenheim hian Bundesliga an la khel pha lo a, fourth division club niin third divison kaipui mah se 2. Bundesliga (second divison) erawh a kaipui zo lo.

Low leh Flick te hi an inkawp fuh hle. Euro 2008-ah final an lut a, Spain lakah an vanduai. World Cup 2010-ah semifinal lutin pathumna an ni a, Euro 2012-ah semifinal an lut leh bawk.

World Cup 2014-ah Germany chuan Brazil-ah Argentina hnehin FIFA World Cup nomawi an chawi a, Low leh Flick te hnathawh hi a ropui hle. World Cup nomawi vang ringawt pawh hian World Cup 2018 leh Euro 2020-ah Germany che ṭha tawk lo mah se Low hian fak a phu a ni.

Low leh Flick te hian inelna lian vawi li ngawt an hmachhawn dun a. World Cup 2014 zawhah Flick-a’n Germany assisant hna a kal sanin German Football Association-ah sporting director hna chu January 16, 2017 thleng a chelh zui. Low hnuaiah Germany an tlahniam a, Flick erawhin Niko Kovac an ban zarah Bayern Munich head coach hna thawkin season khatnaah a treble champion pui nghal. Season khat leh a chanve chhung lekin Bavarians hi nomawi pasarih a chawipui.

ICELAND AN HNEH ṭUM
March thlaah hian Low hi a la inringtawk a, World Cup zawha ka koh tawh loh tur a tih pathum Thomas Muller, Mats Hummels leh Jerome Boateng te a la ko let duh chuang lo. Iceland lakah an chak chian em avangin Low hi a thusawiah a ding nghet turah a ngaih theih hial. Mah se an chetfuh loh zui avangin Euro 2020 khel turin Muller leh Hummels ta ko tel ta thung.

Germany hian 4-3-3 formation an hmang a, Manuel Neuer hmaah Matthias Ginter leh Antonio Rudiger te an awm a, mual sirah Lukas Klostermann leh Emre Can te an awm. Midfeld pathumte chu Leon Goretzka, Joshua Kimmich leh Ilkay Gundogan te an ni a, tlarhamah Kai Havertz, Serge Gnabry leh Leroy Sane te an awm bawk. Bench aṭangin Timo Werner, Jamal Mulsiala, Amin Younes leh Florian Neuhaus te an lut a, thla nga liam ta lawka thil thleng a ni bawk a, tuna Hansi Flick team nen hian player en mai chuan damnglam tamin lang lo a, bihchian erawh chuan an inanna lai a awm zeuh zeuh zawk chauh a ni.

Flick hian Low ang thoin Antonio Rudiger a dah pawimawh a rinawm a, amaherawhchu Flick hi chuan Hummels leh Ginter te aiaah Niklas Sule hi a dah pawimawh zawk ngei ang. Chutihrualin Ginter hi Covid-19 a kai a, Hummels-a’n season bul a ṭan tlai avangin October thlaa international break awm hunah ngaihdan chiang zawk a awm thei chauh ang.

Germany tlarhnungah PSG defender Thilo Kehrer a la awm bawk a, tlarhnung nei chhe tak chu an ni lo hrim hrim. Vei lama khel turin Robin Gosens a awm a, Iceland an hmachhawn hmasak ṭuma mi Emre Can hi chu en kan a nih chhoh a rinawm. Chumi piah lamaah Can hi defensive midfield leh centre back-ah a khel tam zawk hirm hrim.

Dinglamah Lukas Klostermann a awm a, Flick-a’n midfield laia Kimmich a chhawr chungin Klostermann hian khelhna hmun a la chang thei tlat lo. Liechentenstein nen an inkhelh ṭumin Ridle Baku a chhawr a, Armenia nen Jonas Hofmann a thlang leh bawk.

ENGTIN ZEL?
Flick-a’n 4-2-3-1 a hmang a, Low pawhin Euro 2020-ah chuan he formation tho hi hmang mah se Iceland nen an inkhelh hmasak chuan 4-3-3 a hmang thung. Low-a hote hian 3-0 a hnehna an chan miau avangin a formation hman emaw a khelh dan emaw sawisel a rem lo a, chutihrualin Flick-a player thlan dan tur nen chuan dang hret niin a lang.

An formation hman a inan miau loh avangin Flick-a hnuaiah hi chuan Kimmich, Goretzka leh Gundogan te hi an khelh rual a rinawm loh. Heng player pathum hian hmun ruak pahnih hi an insemah a ngaih theih a, Armenia an hneh ṭum pawhin Gundogan hi bench aṭanga rawn lutin Kimmich a rawn thlak.

Midfield hmaa awm theite chu tarlan tawh angin Kai Havertz, Marcos Reus leh Thomas Muller (inhliam) te an ni a, mamawh dan a zirin Jamal Musiala, Florian Wirtz leh Florian Neuhaus te pawh dah theih vek an ni bawk ang. Germany buaina ṭhin erawh out and out striker an nei lo hi a ni a, chutihrualin Timo Werner-a’n Chelsea tana match a ngah theih chuan buaina tur a awm lo ang.

Germany hian player beiseiawm erawh an nei ve a, Armenia laka goal khungtu Karim Adeyemi bakah Borussia Dortmund forward kum 16 mi Youssoufa Moukoko leh Manchester City aṭanga VfL Wolfsburg zawmtu Lukas Nmecha te an awm. Moukoko leh Nmecha te erawh tun ṭumah hian koh an ni lo.

Mual sir lam aṭanga nawr tur chuan Bayern player Serge Gnabry, Leroy Sane leh Musiala te an ṭha a, chutihrualin attacking midfield leh tlarhmaa awm thei tura hming tarlante hi a ṭul dan a zira awm thei vek an ni bawk.

INKHEL TUR CHU
Germany-in Iceland an hmachhawn hunah hian Marco Reus-a’n khup hliam tenau vangin a inlan thei dawn lo a, Havertz a dam chiang hman lo a nih chuan tu nge forward thlawptu ni ta ang. Chelsea midfielder a khel thei lo a nih chuan Muller a awm bawk si loh avangin Gundogan a awm thei ang a, chutihrualin Man City midfielder ai chuan Musiala emaw Wirtz emaw te hi an nih a rinawm zawk cheu.

Outfield player 20 chauh hruai theih a nih avangin Ridle Baku an hruai ve lo a, right back-ah Hofmann bawk a awm a rinawm. PSG defender Kehrer erawh hahdamna hun a neih a rinawm a, Gosens a rawn kir thei a, Hoffenheim defender David Raum kan hmu a nih pawhin mak tih loh tur a ni ang.

Hansi Flick chuan an match hmasa pahniha an khelh ṭhat chhan uar takin coaching staff thawhhona chu a fak a, amah puitu Danny Röhl leh Marcus Sorg te a fak hle. Bayern Munich manager hlui Flick hian hnehna chan satliah a duh dawn lo a, attacking game khel chung ngeiin hnehna chan a tum dawn. Hei tak hi Flick-a kaihhruai team-te inkhel a hmuhnawm em em chhan chu a ni.

Hei pawh hi zep tel hram teh ang, 4-2-3-1 formation hmang ṭheuh ṭheuh hi an khelh dan hmang a va inang lo em. Hemi foramtion hmang chung hian Wembley Stadium-ah Germany-in England an press ngam lo – Iceland erawh an awm a nem deuh tawh a, Flick a enkawl a nih bawk avangin khualmuala inkhel tur ni bawk mah se na takin an press dawn.

You May Also Like

More From Author