Roberto Di Matteo a pawlte hi a tir lamah chuan si an phur hmasa zawk a, mahse hun tawp lamah chuan si 4 lai an thun lei lawi si thung. Goal lut hmasaber hi Lampard-a’n Penalty a khung vang a ni a, minute 18-naah Hazard-a ball lakluh ṭha zet mai chu Gunter-a’n a lo tihtluk vangin penalty a chawi a, Lampard-a’n chiang em em maiin a thun a ni. Mahse, Reading lam an zuai nghal mai duh lo! Chelsea tih goal aṭanga hun reiloteah Pogrebnyak chuan Reading tan a head goal a, 1-1 in an inhnehtawk, chutah a goal aṭanga minute 4 emaw vel lek a ral tihin Terry-a’n goal aṭanga pen 20 vel lekah McAnuff a tihtluk vangin freekick a chawi a, Guthrie chuan kawh tak, hniam tak siin a pet a, Cech chuan a save hman lova, goal a lut a, 2-1 a ni ta a ni.

1st half-ah hian Hazard hian chance ṭha tak a ṭhelh a, chutih rualin Pearce pawhin an hmahruaina a belhchhah ṭep bawk. Chelsea hian chak loh an duh lo a, 2nd half ṭan hnu lawkah an player lei thar Oscar chu a vawikhatna atan an luhtir a, a ṭang ngang aniang, yellow card a hmu nghal ṭhawt! Minute 70-naah nalh zet maiin Cahill chuan hla deuh aṭangin a pet lut a,a mawi kher mai! An in draw tawh mai dawn emaw tih laiin minute 81-naah goal thun dan la theihngilh lo Torres chuan Ashley Cole a ball ṭha tak chu goalah chantirin 3-2 in hma an hruai a, minute 90+5-ah an game hmasa zawka goal lo khung tawh Ivanovic chuan a khung leh a, 4-2 in Chelsea an chak ta a ni. Away leh Home game-ah point thum ve ve an hmu nghal a, tunah hian table-ah hmahruaitu an ni a, European Champion hian season tawp thlengin an dinhmun hi hum thei tak maw?

Eden Hazard! Ava han ropui tak em! United lei tum lehthal ṭhakin an lei a, an tifuh chiang kher mai! He inkhelah hian goal 4 an khung a, chung zinga goal 3 chu a siam an ni a, penalty 2 a hlawhchhuak tawh bawk. Season ṭan aṭanga game 2-na, inkhel hmasa lamah chuan khelh ṭhat a harsa an tihlai hunah a khel ṭha tluan nghal parh a, season tawp thlengin khel ṭha thei tak ang maw? Fernando Torres hi khawvela player manto zinga mi a ni a, season thara match hnihnaah goal 1 a khung nghal a, chhunzawm thei tak ang maw? Ivanovic hi defender a ni a, mahse game 2-ah goal 2 a khung tawh bawk.

Kaithar Reading an khel a ṭha a, an fighting spirit a ṭha hle bawk. Kaithar hi an phur serh sawrh duh hle a, mahse Sunderland pawh khan Arsenal an chelh ding tlat thei bawk. Match hnih khat lek khelhchhiat vangin a hmawrbawkna a chhe vek kher lo. Football-ah chuan bul ṭanṭhat hi a chanve zo a ni ve kher lo!