AC Milan Italian striker Antonio Cassano chu a lung (heart) ah kaw te reuh te a awm avangin zai a ni dawn. Kum 29 a upa Cassano hi AC Milan leh AS Roma te inkhelh zawh, Pathianni zîng lamah khan damdawiinah dah luh a ni.

AC Milan in thuchhuah an siamah chuan, Cassano hian Roma nen an inkhelh zawhah a ṭawng leh chet dan velah buaina a nei a, damdawina dah a nih hnuah a thluak leh a lung endik a ni a, a lung pindan pahnih (atrium) inkarah kua a awm tih hmuhchhuah a ni ta a ni. Hemi kua hian a lungin thisen a sem tur a tibuai thei a, hnawhphui a ngai dawn a ni.

A hlauhthawnawm loh e

Cassano natna ang hi thil thleng ngai lo a ni hran lova, hlauhawm lutuk pawh a ni lem lo niin doctor te chuan an sawi. Amaherawhchu a natna hi a dam hunah pawh football khel leh thei tur chuan hun a duh deuh dawn a, club lamin thuchiang la sawi thei lo mahse thla 4 aṭanga thla 6 chhung tal chu a chawlh a ngai dawn a ni.

Tunah hian a dinhmun a ṭha a, harsatna dang a nei lo tih an puang bawk.

Galliani: Cassano dinhmun a him

AC Milan chief executive Adriano Galliani  a ṭawngchhuak a, Cassano chu Milan team-ah a dinhmun a him a, hlauhthawn tur a nei lo tih a sawi. Galliani chuan, “A tirah kha chuan ka rilru a hah em em a, a inkhelh theih tawh loh mai ka ring hman hial a ni. Doctor ten thla engemawzat a mamawh tur thu an sawi a, a inkhel leh thei ngei ang. Amah pawh a ṭha a, a chetṭhat lai taka a inhliam chu pawi a tih thu min hrilh nghe nghe a ni. Milan player pawimawh a ni a, Milan-a a dinhmun hi a him a ni.” a ti.

Fiamthu duh tak nia sawi Cassano hi a harh ṭha a, damdawiinah pawh fiamthu a thawh deuh reng niin a sawi bawk.

Footballer te hi inkhel kan en theihna chhan chu an ni mai a, player ṭha te hi chu club mai bakah fans te tân an hlu em em a ni. Cassano natna hi inkhelhnaa inhliam pangngai ang chu ni chiah lo mahse ngaihtuahawm lutuk a ni lo niin a lang a, hei hi Milan fans te mai bakah, Italy fans te leh football ngainatute tan thu lawmawm tak a ni awm e.