HERO I-LEAGUE: AIZAWL-AH AIZAWL FC LEH MOHUN BAGAN INHNEHTAWK – Rooney Opa

Hero I-League khelh mekah Aizawl FC chuan Mohun Bagan mikhualin sikhat ve ve inpe in an inhnehtawk. Aizawl FC tan Lalthathanga Khawlhring chuan thunin Mohun Bagan tan Manandeep Singh chuan penalty atangin a sut a, he inkhela Hero of the Match chu Aizawl FC winger Leonce Dodoz a ni.
.
Tute nge khel?
.
Aizawl FC XI : Avilash Paul; R.Laldinliana, Masih Saighani, Lalhriatrenga, C.Lalrosanga; David Lalrinmuana, Alfred Jaryan; Albert Zohmingmawia, Andrei Ionescu, Dodoz; Yugo Kobayashi
.
Subs : Lalrinzuala Khiangte, Rochharzela, F.Liandala, Lalthathanga Khawlhring, S.Malsawmtluanga, Lalawmpuia, William Lalnunfela
.
Mohun Bagan XI : Shilton Paul; Arijit Bagui, Eze Kingsley, Rana Gharami, Ricky Lallawmawma; Nikhil Kadam, Cameron Watson, Raynier Fernandes, Sk.Faiaz; Akram Moghrabi; Dipanda Dicka
.
Subs : Sankar Roy, Chesterpaul Lyngdoh, Surchandra Singh, Bikramjit Singh, Gurjinder Kumar, Beikhokhei Beingaichho, Manandeep Singh.
.
1st half a dul:
.
Rajiv Gandhi Stadium, Mualpuia inkhelah hian chawlhlawk hma in inkhel boruak a tang lo hle a, team pahnihten chance sawi tur an nei mang lo. Tan atanga reiloteah Aizawl FC forward Yugo chuan yellow card hmu in Bagan forward Dicka chance tha neih tur chu Andrei chuan lo titlu in referee in foul a ham lo a, bultan na ah tackle a tamin inkhel hmuhnawm kan hmu dawn niin lang mah se a rei tial tiala team pahnihte mual laiah an intithlawn tawn.
.
Aizawl tan inhliam damkawr David a chetha in a pass tha tak chu Albert chuan mawi taka laletin a pet goal lo a, a hnuah Andrei corner atangin Yugo chuan lo tauh thelhin Dinliana chuan a lo thun thei lo a, a hnuah Dodoz chuan tha taka khalh tlangin goalkeeper zawnah a pet hlauh bawk.
.
Team pahnihten goal an thun thei lo a, goal awm lo in chawlhlawk an hmang.
.
2nd half a hmuhnawm:
.
Chawlhlawk zawhah team pahnihten inkhel boruak dang min entir a, penalty, goal leh red card kan hmu. Aizawl lamin an nawr hmasa a, Andrei shot chu Arjit Bagui chuan a kutin lo tawkin referee in penalty a pe lo. Minute 73 a ni a, mual veilama khel tha tak Dodoz chuan tha taka ball la in Puitea a pe a, a shot hi Shilton Paul chuan dang mah se a sawt lut ta tho a, sikhatin Aizawl in hma an hruai.
.
Aizawl in hma an hruai rei lo a, Bagan in an nawr let leh hi Moghrabi chuan box chhungah ball lalutin Avilash Paul chuan save a tumna lamah Moghrabi hi tlu in holam takin referee in penalty a pe. Hei hi Manandeep Singh chuan petin an siphurh a sut.
.
Hemi hnu hian Aizawl chuan goal thun leh tumin nasa taka nawrin Dodoz chuan a ball lak tha chu Yugo chuan pe in hei hi Andrei chuan hnai set sawtah petin goal ban a per a, a out hlauh. Chumi hnuah Bagan defender Ricky chuan tha taka petin a goal teuh hle a, Avilash Paul chuan a lo nam chhuak hlauh.
.
Inkhel a zo dawn hnai, Aizawlin an nawr nasat laiin Alfred chuan Akram a rap niin a lang a, red card pek a ni. Inkhel a zo a, goal dang luh belh tawh lo in point khat ve ve insemin team hnihte an tin ta a ni.
.
Inkhelh zawh boruak:
Inkhelh zawh hian referee thutlukna avanga lungawi lo in inkhel entuten referee an sawisel nasa a, an tawng bawk a, bottle ruak leh thildang vawm luh niin referee Senthil Nathans chu a bika ven a ngai hial. Referee hian Aizawl chu penalty chiang tak a pek loh bakah Mohun Bagan chu penalty ho tak a pe a, Alfred a hnawhchhuah dan lah a lungawi thak loh le. Tin, inkhelh laia a thutlukna tam takah Aizawl tana tha lo zawnga thutlukna a neih avangin an lungawi lo hle.

Posted in News.

Leave a Reply

Or