HERO I-LEAGUE: AIZAWL FC HMAAH CHENNAI CITY FC INLAN DAWN

Hero I-League khelh mekah champion lai Aizawl FC chuan home game an khel leh tawh dawn a, naktuk chawhnu dar hnih hian Chennai City FC an mikhual ang. En turin Aizawl FC President Pu Robert Romawia Royte chuan a bik takin Mizo mipui a tam thei ang ber kal turin a sawm a ni.
.
Inchhuang thei awm lo team pahnih:
Aizawl FC leh Chennai City FC te hi I-League bikah vawi hnih an inhmachhawn tawh a, vawi khat ve ve hnehna chang tawhin inchhuang thei an awm lo. An inhmachhawn hmasak berah January 28, 2017 khan Chennai-ah Chennai City lamin sihnih faiin hnehna an chang a, a vawi hnihna February 25, 2017 khan Aizawlah Aizawl in sikhat faiin hnehna an chang ve thung. Hei bakah hian Federation Cup-ah nikum May 7 khan Aizawl hian 3-2 in hnehna an lo chang tawh bawk a, a pumpuiah vawi thum inhmachhawn tawhin Aizawl in vawi hnih hnehna an chang a, Chennai City in vawi khat hnehna changin inhnehtawk tum an la nei lo a ni.
.
“Point thum lo beisei rawh u” – Paulo Meneses
Aizawl FC coach Paulo Meneses chuan naktukah hian point thum hmuh ngei tuma an beih tur thu a sawi a, mipuite tawiawmna hmanga an beih a pawimawh thu sawiin “Point thum lo beisei rawh u.” a ti. A sawi zelna ah Portuguese coach chuan inkhelh apianga chak tuma an beih thin thu sawiin tihsual chang nei mah se an tumah an chian avangin hnehna an chan chhunzawm zel a rin thu a sawi a, a player-te a rintawk thu sawiin FC Goa lam pana chhuak ta H. Lalmuankima thlakna an lak maitheih bak chu player thar lak tumna a neih hran loh thu a sawi bawk.
.
Tin, Mohun Bagan an hmachhawn tuma hliam teanu vanga inlan thei lo David Lalrinmuana chu inkhel thei tura a inrin hman a rin thu sawiin striker thar Lalkhawpuimawia pawh squad-ah a tel maitheih a rin thu a sawi bawk.
.
“Hmun sangah ka player-te an buai lo ang.” – V. Soundaranjan
Chennai City F C coach Soundaranjan chuan Aizawl FC chu team hmachhawn huphurhawm berte zinga mi an nih thu sawiin an tum ber tur chu chak loh loh a nih tur thu a sawi a, a tul chuan draw game khelha hnehna chan theih a nih tak leh ‘bonus’ anga a ngaih tur thu a sawi. Season liamta khan Aizawl-ah a player –ten harsatna an tawh thu sawiin hmun sangah thawk harsa an tih thu a sawi a, kuminah erawh harsatna an neih a rin loh thu sawiin an theihtawp an chhuah tur thu a sawi a ni.
An player pawimawh French striker Jean-Michael Joachim chu NEROCA an hmachhawn tumin minute nga lek khel mah se Aizawl FC hmachhawn tura a khelh theih a rin thu a sawi a, Timor Leste striker, goal khat thuna assist vawi hnih nei tawh Robeiro de Almeida Murilo erawh inhliam vangin a inlan thei lo ang.
.
Aizawl FC tan game pawimawh:
Sawi tawh thin angin Aizawl FC hi champion lai an ni a, an lallukhum hum him turin an khelh dan hian mipui mit a tlung tawk lo. Tun season-ah game ruk khel tawhin vawi thum an chiah an la chak a, vawi khat draw in vawi hnih an chak lo tawh. An game hnuhnung berah Mohun Bagan an hneh loh avangin inrintawkna an neih let leh theih nan tun hi game pawimawh a ni a, game tin pawimawh vek mah se kar lehah East Bengal an hmachhawn dawn avangin tun hi inrintawkna an neih theih nan game pawimawh bik a ni.
.
Tun season-ah Churchill Brothers, Minerva Punjab leh Gokulam lakah hnehna an chang tawh a, hengah te hian 1-0, 2-1 leh 2-0 a chakin East Bengal nen 2-2 a an inhnehtawk bakah Lajong leh Mohun Bagan lakah 1-0 leh 2-0 in an tlawm tawh bawk. Game ruk khel tawhin goal sarih an thun tawh a, goal ruk an chhuah tawh thung. An hmatawngten goal an la thun tam tawk lo a, an tlarhnung a la phui tawk lo bawk. Chennai City chhuanvawr Joachim an ven uluk a ngai dawn a, Soosairaj nen an inkawp hi Aizawl tlarhnung tan an hnawksak tham ang.
.
Tunah hian player inhliam an neih loh lai a ni a, squad tha ber nen inkhel an hmachhawn thei ang. Chutih rualin a ngai ang bawkin mipui kan pawimawh leh dawn a, team chakna hnar pakhat chu mipui kan nih avangin Mualpuiah awrawl tawp tawpa au tur kan kalkhawm that leh a tul dawn a ni.
.
Chennai City fiahna hnuhnung:
.
Chennai City hian tun season-ah away game an khel hnem a, game kua khel tawhin away-ah game sarih an khel tawh. Aizawl bakah East Bengal an tlawh tur tih loh chu an khelmualah vek an khel tawh dawn a, naktuk inkhel tur hi khualmualah an tihtheih lantirna tur fiahna hnuhnung a ni.
.
Anni hian game kua khel tawhin point kua an hmu tawh a, anni ai khel tlem, an hmachhawn tur Aizawl aiin point khatin an la hmu tlem. Khualmualah an khel tam avangin an result hian duhthu a sam lo deuh a tih theih a, chutih laiin goal nga khung tawhtu Joachim erawhin goal thun a sim thei lo. An game hmasa berah Indian Arrows chu sithum faiin an hneh lo a, Gokulam nen sikhat ve ve inpe a inhnehtawkin, Minerva Punjab leh NEROCA lakah 2-1 ve ve in an tlawm zui. Hemi hnu hian Churchill Brothers lakah sihnih faia tlawm lehin Mohun Bagan chu 2-1 in an hneh mial a, Lajong nen goal inpe lo in an inhnehtawk bawk. Heng bakah hian an khelmualah game hnih khelin East Bengal lakah 2-1 in an tlawm a, NEROCA nen goal inpe lo in an inhnehtawk bawk a ni.
.
Game kua an khelhah hian vawi hnih chakin vawi thum draw an nei a, vawi li an chak lo tawh. Goal riat thunin goal 11 an chhuah tawh a, point kua an hmu tawh a ni.
.
Chawhnu len pahin Mualpuiah:
Aizawl FC hian mipui puihna an mamawh a, kan state leh Mizote India ram football inelna sang bera min pholangtu an nih avangin an chet that chuan Mizo hming a tha tel thin. Mipui thatna, mikhual tan inkhelh harsatna hmun an tih thin Rajiv Gandhi Stadium, Mualpuiah chawhnu dar 2 inkhel en turin kal la, Inrinni, office chawlh ah hian tlai len pahin inkhel hmuhnawm rawn en rawh le.