HERO I-LEAGUE: AIZAWL FC LEH EAST BENGAL INHNEHTAWK -Rooney Opa

Hero I-League khelh mekah Aizawl FC leh Kingfisher East Bengal te chu vawiin khan Rajiv Gandhi Stadium-ah inkhelin goal awm lo in an inthathen. He inkhela Hero of the Match chu Aizawl FC goalkeeper Avilash Paul a ni.
.
Tute nge khel ?
Aizawl FC tan inhliam David Lalrinmuana aiah Hmingthanmawia a lut a, Chennai City FC hmachhawn tuma bultan Syhlo Malsawmtluanga leh Yugo Kobayashi aiah Dodoz leh William an lut bawk. Tin, Lalkhawpuimawia chu substitute bench-ah a awm bawk.
.
AFC: Avilash Paul, Masih Saighani, Kareem Omolaja Nurain, R. Laldinliana, C. Lalrosanga, Albert Zohmingmawia, Alfred Kemah Jaryan, Andrei Ionescu, Hmingthanmawia, Zikahi Leonce Dodoz, William Lalnunfela.
.
Subs: Lalawmpuia, Lalramhmunmawia, Rochharzela, K. Lalthathanga, Syhlo Malsawmtluanga, Yugo Kobayashi, Lalkhawpuimawia.
.
KEB: Luis Xavier Barreto, Arnab Mondal, Lalramchullova, Eduardo Ferreira, Salam Ranjan Singh, Mahmoud Al Amna, Katsumi Yusa, Bazie Armand, Laldanmawia Ralte, Prakash Sarkar, Jobby Justin.
.
Subs: Mirshad K, Deepak K, Cavin Lobo, MD Rafique, Willis Plaza, Brandon Vanlalremdika, Yami Longvah.

Inkhelh hma boruak:
Aizawl FC in season hmasa ah ropui takin I-League nomawi an chawi a, an champion theih nana mi pawimawh coach Khalid Jamil chuan East Bengal a pan san. Animai bakah player pawimawh Amna, Danmawia, Chullova leh Brandon te a luhpui a, Aizawl FC tantute rilru a dam thei lo. Inkhelh hma in chanchinthar lakhawmtute bulah Khalid hian ama thua chhuak nilo in Aizawl FC in an chhuahtir niin a sawi a, hei hian mipui tilungawilo in inkhelh hma atangin boruak a tang a, inkhel en turin nidang zawng aiin mipui an kal thahnem bawk.

1st half hmuhnawm:
Mipui 7280 hmaa inkhelah hian Aizawl FC in bul an tan tha zawk a, inkhel hmuhnawm kan hmu. Tan atanga reilote ah Aizawl in nawr nghalin boruak sang tak hnuaiah Andrei freekick chu Dodoz chuan lo tauhin a lut teuh hle a, goal line atangin East Bengal lamin an lo petchhuak hman hram.
.
East Bengal hian minute 23 lekah substitution siamin Prakash Sarkar aiah Brandon Vanlalremdika luhtir a ni a, Aizawl FC atanga a lakluh ho an lut kim. 1st half-ah hian game rang tak kan hmuin goal mouth action kan hmu deuh reng a, Albert ball khalh tha tak chu Wiliam nen an inpek kual hnuah Alfred tan ball tha a pe a, a shot chu goal pawn chiahah kalin mipui an au hman tawh, a goal lo chiah chiah vel a ni.
.
East Bengal lamin nawr let ve in Katsumi freekick chuan goal kham a per a, a let leh lam hi Katsumi bawkin petin Alfred chuan a lo tauh chhuak leh hlauh. Hemi hnu hian East Bengal lamin game thunun chhunzawmin goal hlauhawm erawh an nei thei mai bik lo a, Aizawl tan Alfred chuan tha taka petin East Bengal goalkeeper Luis Barreto chuan lo dang mah se a manbet zo lo a, goal ban pawn chiahah a lir chhuak ve leh.
.
Aizawl lam hian mual dinglam atangin an nawr thin a, Salam Ranjan tan hna hautak an siam hnem hle. Defender Dinlianan through ball tha taka a pek, Albert an a lo laka Andrei a pek leh, a duh anga a pet loh avanga Dodoz in a pet over takte kha a uiawmin game boruak titangtu tha tak a ni.
.
2nd half a dul:
Chawlhlawk hma in game hmuhnawm tak kan hmu a, beiseina sang tak nena chawlhlawk zawh nghaktute erawh kan lawm a kim meuh lo. 2nd half-ah hian game dang hmuin inkhel a dul a, goal hlauhawm sawi tur a awm vak lo. Team pahnihte an fimkhur dun a, mual laiah an intichhe tawn a, goal thun tuma beihna a tam lo hle.
.
Chawlhlawk zawha chance tha ber tih ngam chu East Bengal tan Brandon pet niin Avilash Paul chuan mawi takin a lo nam chhuak. Huntawp dawnah Aizawl in chak ngei tumin an nawr thin a, defensive khel thiam Khalid Jamil-a pawlte an nghing lo. Striker Wilis Plaza te pawhin an mualan chhuahsan duh mang si lo a, goal lut lo in an inthathen ta a ni.
.
Inkhelh zawh boruak:
Inkhelh zawhah Aizawl coach Paulo Meneses chuan East Bengal coach Khalid Jamil chu chibai tumin tum hnih zet a pan a, Khalid hian a lo chibai duh lo. Hemi hnu hian Aizawl FC tantu thahnem tak chuan East Bengal haw turd an tumin stadium pawnah an inpunkhawm a, an thawm a tha in police pawh thahnem tak an pungkhawm nghe nghe a ni. Inkhelh banah Paulo Meneses chuan a naute an khel tha a tih thu sawiin chak phu an nih thu a sawi a, East Bengal in hun an khawhral lutuk vanga a lungawi loh thu sawiin “Chak tumin an khel lo” a ti.
.
Khalid Jamil chuan Paulo nen an inchibai loh chungchangah sawi tur a nei lo tih sawiin a tihpalh a nih thu a sawi a, a naute khelh danah a lawm tawk thu sawiin hma takin press conference a chhuahsan zui a ni.