Aizawl FC coach Paulo Meneses-a’n East Bengal-in player tha tak tak kawl mahse an hlauh loh thu leh player mal ven bik an tum loh thu a sawi a, East Bengal coach Khalid Jamil-a lokirlehna inkhel hi a hmuhnawm loh ring suh !
Mualneitu Aizawl FC hi table-ah parukna ni mekin point 13 an nei a, anni aia game hnih a khel tam zawk East Bengal hian point 18 neiin table-ah pahnihna an ni a, a zawnin game 7 chhung hneh loh nei loin an kal tluang mek.
“Min chhuahtir” – Khalid Jamil
Vawiin khan team pahnih enkawltute hian press mite an hmachhawn a, chuta East Bengal coach Khalid Jamil-a thusawi beng verh ber chu “Aizawl FC kha ka chhuahsan lo a, chhuak turin min ti a ni,” tih hi a ni. Aizawl FC in nomawi an chawi kawnga kum 40 a upa thiltihte kha theihnghilh a harsa a, mipui nawlpui hriat dan erawh chuan Khalid kha nawr chhuah ni loin ama duh thu ngei a chhuak a ni. “ I didn’t leave Aizawl FC. Aizawl told me to go,” tiin Khalid hian a sawi thung. A team hlui chungchang sawiin,” Aizawl FC hi team tha an ni a, nikum ai mah khan an tha tawh zawk,” tiin a team hlui a fak a, ‘pressure’ erawh a neih thu a zep lo.
Meneses-a thukhawchang
Aizawl FC coach Paulo Meneses pawhin an khingpuite an hlauh loh thu sawiin,” Aizawl FC hian defensive game kan khel ngai lo. East Bengal pawh goal thun thei tak nimahse kan khelmualah kan khel dawn a, mipui puina nen hlau loin kan nawr ang,” tiin attacking football khelh an tum thu a sawi.
Team pahnihte hi Kolkata khawpuiah 2-2 in an inhnehtawk tawh a, kha inkhel kha MPL semi-final inkara khelh a nih avangin beisei ang result an nei theih loh thu leh tun tumah erawh a danglam tawh tur thu Meneses hian a sawi bawk.
Champion duh East Bengal
Indian top flight football-a kum 10 chuang champion tawh lo East Bengal in champion an duh a, Indian coach zinga hlawh hnem ber ni turin Aizawl FC atangin Khalid Jamil an thlem chhuak thei. Khalid hian Aizawl FC-a a enkawl thin Mahmoud Amna, Brandon VL Remdika, Lalramchullova leh Laldanmawia Ralte te a chhuahpui a, heng player te hi tun season-ah a hmang tangkai hle.
East Bengal hian goal 17 thun tawhin goal thun hnem ber an ni a, tlarhnungah pawh player an nei tha hle. Brazilian defender Eduardo Ferreira hi defender ni mahse goal hnih a thun tawh a, Katsumi Yusa, Laldanmawia Ralte, Willis Plaza, Mahmoud Amna te aia goal nawr na hi an tam bik lo. An Ivorian midfielder Bazie Armand hian game a la khel kim vek a, India tana khel phak Salam Ranjan Singh, Arnab Mondal, Cavin Lobo, Md.Rafique leh Nikhil Poojari te an nei bawk.
David-a telloin
Naktuk chawhnu a inkhel turah hian Aizawl FC in an midfielder pawimawh David Lalrinmuana an chhawr thei dawn lo a, Mizo club tan channa nasa a tling. ZoFooty Player of the Year lawmman lo dawng tawh hian tun season-ah vawi 5 inlanin goal khat a thun tawh a, an game hnuhnung ber a Chennai City FC an hneh tumin Hero of the Match atan thlan a ni. David Rinmuana hi Chennai City an hnehna inkhela inhliam kha a ni a, training zawm mahse khelh tir chi a nih loh thu Meneses chuan a sawi.
Andrei vs Al-Amna
Season hmasaa Aizawl FC in I-League nomawi an chawi tumin Syrian midfielder Mahmoud Al-Amna hi player langsar ber pawl a tling a, a khel a dam dup a, ‘public darling’ tih theih hial tur a ni. Tunah erawh kum 35 a upa hian East Bengal kawr a ha tawh a, a club hlui lakah theihtawp a chhuah a tul tawh. Amna hian tun season I-League la khel kim vekin goal hnih a thun tawh a, a nghawng lenna Rajiv Gandhi Stadium-ah a inthlahrun a rinawm loh.
Tun season-ah erawh Amna thlaknan Aizawl FC in Andrei Ionescu an lalut a, Romanian midfielder hian mit a la tlung rih hle. Hliamin tlakbuak bawk mahse ke pahnih hmang thiam Andrei hian game 5 khelin goal hnih a thun tawh a, Aizawl FC laimu tih theih a ni.
ZoFooty palaiin “Nikumah fan-te duh rawn leh mit latu chu Mahmoud Al Amna a ni a, tunah in inhmachhawn dawn a, nangmahah zamna emaw, huphurh na te emaw a awm em ?” tia a zawhna chu “Chutiang thilin min tibuai lo. Amna pawh player tha tak a ni a, tha taka khel turin duhsakna ka hlan rualin nikum chu nikum a ni a, kumin chu kumin a ni, a inang lo. Team tan theihtawp ka chhuah thin a, ka theihna zawng zawng nen khelh ka tum ang,” tiin engmah intihbuai tir a tum loh thu a sawi.
+ There are no comments
Add yours