HERO I-LEAGUE : AN BU ZAWLAH AIZAWL FC AN TLAWM

Posted on December 18, 2017 by C Tlanthianghlima

5 min read

Vawiin tlaia Hero I-League inkhelah Radeem Tlang a goal hmangin Shillong Lajong in Aizawl FC si khat faiin an hneh. He inkhelah hian goal awmchhun thuntu Khasi tlangval Tlang hi Hero of the match atan thlan a ni. Tihian Lajong-in vawi nga khelhah point 10 hmuin table-ah pahnihnaah an invawrh chho a, Aizawl FC in game thumah point li neiin paruknaah an awm thung.

Tute nge khel ?

Aizawl FC: Avilash Paul, Lalrinzuala Khiangte, Masih Saighani, Kareem Omolaja Nurain (Hmingthanmawia 66’), Lalramhmunmawia, H. Lalbiakthanga (Andrei Ionescu 67’), Alfred Kemah Jaryan, H. Lalmuankima, Lalthathanga Khawlhring (Rochharzela 82’), Zikahi Leonce Dodoz, Yugo Kobayashi

Subs: Arup Debnath, Lalrozama Fanai, Rochharzela, Andrei Ionescu, Hmingthanmawia, Lalruatfela, William Lalnunfela.

Shillong Lajong: Phurba Tempa Lachenpa, Rakesh Pradhan, Kynsailang Khongsit, Novin Gurung, Juho Oh, Laurence Doe, Daniel Odafin (, F. Lalrohlua 73’), Hardy Cliff Nongbri, Redeem Tlang (Samuel J Lyngdoh Kynshi 90+3’), Aiman Saleh Abdullah Al-Hagri, Shaibolang Kharpan (Alen Deory 60’)

Subs: Neithovilie Chalieu, F. Lalrohlua, Samuel J Lyngdoh Kynshi, Alen Deory, Samuel Lalmuanpuia, Allen C Lyngdoh Nongbri,, Kenstar Kharsong.

Mualneitu Aizawl FC in inkhel hmasaa inhliam David Lalrinmuana an chhawr thei lo a, Lajong an hmachhawn hnuhnun ber tuma goal thuntu William Lalnunfela leh inhliam vanga thla khat vel zet chawl tawh Andrei Ioneschu te bench-ah an awm thung.

Shillong Lajong tan Mohun Bagan an hmachhawn tuma inhliam captain Samuel Lalmuanpuia bench-ah a awm a, Darlung rawlthar F.Lalrohlua hming kan hmu bawk.

Goal awmlohna first-half

Minute 45 chhungin chungnung zawk sawi tur an awm lo a, team pahnihte’n goal thun theihna hun tha nei ve ve mahse an hmang tangkai zo lo. Champion lai Aizawl FC in ball chang tamin goal thun theihna hun tha ngah zawk mahse Bobby Nongbet-a naute’n an dangchat thei. Tunhnaia khel tha thei tak H.Lalmuankima a khel chhe lo a, minute 9-naa a ball pek tha tak chu changtu nei lo Yugo Kobayashi chuan goal zawnah a pet thei lo.

Rawlthar tha rual tamna Lajong tan kum 24 a upa Yemen international striker Aiman Al-Hagri a hlauhawm thei hle a, Aizawl FC defender Masih Saighani tihsualah ball tha hmuin Avilash Paul chuan a dang hman hlauh. Hemi hnu lawk hian Al-Hagri hian hun tha nei lehin a finishing tha ngat se chu Mualpuiah goal lawmin Lajong an au ngei ang.

First-half tawp dawnah Aizawl FC insiamthain goal nawr mahse Red Army te an autir zo lo. Bawngkawn tlangval Mka ball cross an dan per chu Kareem-a keah tla in goal zawnah pet mahse an dansak ve ve a, hemi hnu lawk hian Dodoz-a’n Mka ball cross tauhin Lajong siban nghaktu Lachenpa chuan a lo dang.

Kawr sen ha veltu goal khat

Chawlhlawk chhungin team pahnih enkawltute’n goal thun tumin an naute an fuih a, Bobby Nongbet-a hlawhtling zawk. Aizawl FC defender te tana buaipui tham tling Al-Hagri an goal a thawkchhuak ta nge nge a, minute 60-naah box chhung atanga a ball pet an dan per chu Khasi tlangval Radeem Tlang chuan goal kilah mawi takin a pet lut. Goal an thun hnuah Lajong tan Al-Hagri leh Tlang te an hlauhawm chhunzawm a, an ke ngil tawk loh avangin goal an thun belh lo mai a ni.

RG Stadium-a home record nei tha Aizawl FC in bench atangin an player neih that te luhtir mahse goal an thawkchhuak thei lo a, bench atanga lut Andrei Ionescu ball cross chu Churchill Brothers laka goal awmchhun thuntu Yugo Kobayashi chuan hnai set sawt atangin goal kham chungah a thlawh. Japanese striker hian game ropui a khel thei lo a, Mualpuia Aizawl FC fans te hmaah ‘foreign striker’ a nihna a lantir theih loh avangin mipuiin an duhkhawp lo hle.

Aizawl FC in beiseina sang tak nena an lakluh Ivorian forward Dodoz pawh pulhri vei ang maiin a che hleithei lo a, second-half ah goal thun theihna hun tha tum hnih ngawt nei mahse goal chhungah ball a dah thei lo.

April ni 21, 2016 hnuah a vawikhat nan Mualpuia I-League match khelhah Aizawl FC an tlawm a, Shillong khawpuia nomawi chawia zai te kha point an hmuh zawh loh avangin lungngaiin khelmual an chhuahsan. Aizawl FC hian December ni 27 (Nilaini) hian Minerva Punjab an mikhual leh ang.

Enge an sawi ?

Inkhel zawhah chak zo ta lo Aizawl FC coach Paulo Meneses-a’n chak phu zawk an nih thu sawiin goal thun theihna hun tha an hlah nasa chu an chak loh chhan a nih thu sawiin inkhel hmasa aiin entu mipuite an tam avangin lawmthu a sawi a, an tawiawmna an mamawh zel dawn thu a sawi bawk. Mualpuia mipuite lawm hlawh lo Yugo Kobayashi chungchang sawiin Portuguese coach chuan a striker khelh that tawk loh chu ama thiam loh anih thu sawiin player a neih dan a zirin substitution a siam thin thu sawiin a striker a chhan.

Shillong Lajong coach Bobby Nongbet erawhin Meneses-a ngaihdan hi a tawipui lo a, chak phu zawk an nih thu a sawi. A captain Samuel Lalmuanpuia inlan loh chungchangah goal nei hmasa zawk an nih avanga luhtir lo a nih thu leh champion sawi nan chuan a la hma deuha a hriat thu a sawi.

ZoFooty Statistics (Powered by Darchiauva Hardware, Mission Veng)

Aizawl FC 0-1 Shillong Lajong
Radeem Tlang 60’

60 % Ball Possession 40%
13 Shots 11
4 On Target 5
482 (356) Pass (Completed) 295 (193)
11 Fouls 11
2 Offside 1
5 Corner kick 2
2 Yellow card 2
0 Red card 0