HERO I-LEAGUE: MINERVA PUNJAB TAN AIZAWL FC AN LIAN

Hero I-League khelh mekah Aizawl FC chuan League hmahruaitu Minerva Punjab FC chu 2-1 in Rajiv Gandhi Stadium-ah an hneh a, champion nomawi humhim an tumna kawngah inrintawkna an hloh tawh an chhar leh ta. He inkhelah hian Aizawl FC tan Kareem Omolaja Nurain leh Andrei Ionescu te chuan thunin Minerva Punjab tan Girik Mahesh Khosla chuan goal khat a thun ve bawk.
.
Tute nge khel ?
.
Aizawl FC XI : Avilash Paul; R.Laldinliana, Masih Saighani, Kareem Omolaja, Lalramhmunmawia; H.Lalmuankima (Lalthathanga Khawlhring 84’), Alfred Jaryan (Hmingthanmawia 71’), David Lalrinmuana, Andrei Ionescu; William Lalnunfela (Yugo Kobayashi 71’), Leonce Dodoz
.
Subs : Rochharzela, Yugo Kobayashi, Lalthathanga Khawlhring, Syhlo Malsawmtluanga, C.Lalrosanga, Hmingthanmawia, Lalawmpuia
.
Minerva Punjab XI : Rakshit Dagar; Sukhdev Singh, Bali Gagandeep, Eric Dano, Abhishek Ambekar, Kamalpreet Singh; Amandeep Singh, William Opoku, Kassim Aidara, Toshiya Hosoe (Lago Bei 39’) (Girik Mahesh Khosla 72’); Chencho Gyeltshen
.
Subs : Arshdeep Singh, Nadong Bhutia, Randeep Singh, Moinuddin, Mahesh Khosla, Deepak Devrani, Lago Dogbo Bei
.
Aizawl FC in player thenkhat an siksawi a, a vawikhat nan an player thar MPL6 Best Defender R.Laldinliana lutin ani bakah inhliam vanga chawl Andrei Ionescu leh David Lalrinmuana te an rawn let a, Mama bench-ah kan hmu bawk. Beisei pha lo Japanese striker Yugo aiah inhliam dam leh William Lalnunfela a lut bawk.
.
Goal luh lohna 1st Half:
.
Table a pakhatna nilai leh champion lai ten thiam zawk nih an inchuhna inkhelah hian champion lai Aizawl FC in bul an tan tha zawk a, tan atanga minute 5 lekah David Rinmuana chuan freekick petin Minerva Punjab defender hlui Kareem chuan tha zetin a tauh a, Minerva Punjab goalkeeper Rakshit Dagar chuan a lo dang hram. Mual laiah David leh Andrei Ionescu te an inkawp tawh a, Aizawl FC game a tha in chance pawh an insiam hnem zawk hle. Inhliam damkawr David a tangkai a, mual dinglam atanga a ball pek chu William chuan a tauh hnuah defender Masih Saighani chuan goal-ah a pet a, Rakshit a lo ding khawng leh hlauh.
.
Minerva lamin hmahruaitu mah nih se draw tuma khel an ni tih a hriat a, defender panga nen khelin goal chance pawh minute 20 ah an hmu ve chauh. Hei pawh hi Ghanaian midfielder William Opoku atanga chhuak niin a pet erawh goal zawnah a kal lo bawk. Minute 22-ah titi lian tham siamtu thlengin David-a freekick atanga ball kal chu Masih chuan goal-ah thun mah se referee Raktim Saha chuan foul a ham hlauh. Hei hi goal ngei tura ngaih niin foul na hmuh tur a awm loh avangin RG Stadium-ah entu mipui an lungawi lo hle.
.
Chawlhlawk hmain Minerva hian goal zawnah ball an pet lo a, player hlauhawm ber chu kum 20 a upa Ghanaian midfielder Opoku niin ani hi Aizawl FC defender te tan a hnawk a, tun season-ah goal 3 a thun tawh. Middlesbrough midfielder hlui Opoku hi Zofooty in player en bik tur zinga kan rawn tarlan kha a ni a, Mualpuia Minerva player hnawk ber a ni. Amaherawhchu, ani pawh hian goal zawnah a pet thei bik lo.
.
2nd Half-ah goal thum:
.
Chawlhlawk hmain goal lut lo mah se chawlhlawk zawhah goal thum kan hmu a, Aizawl FC tan Kareem leh Andrei ten thunin Minerva Punjab tan Khosla chuan a thun ve bawk. Chawlhlawk zawh hian Aizawl FC bawkin game thununin Tea ball vawrh chu Dodoz chuan lo thun tumin hetah hian Aizawl FC in penalty shout an nei a, inkhel thununtu Raktim Saha chuan a ham lo. Inkhel boruak a tang lo a, rei tak goal hlauhawm sawi tur a awm loh vang vang hnuah minute 71-ah Aizawl FC in harhtharna changin Andrei through ball tha zet chu Dodoz chuan la in keeper a pet khum hnuah Minerva defender in a lo pet chhuak hman a, heta corner kick an hlawh chhuah hi Dodoz chuan petin Minerva defender hlui Kareem chuan mawi zetin a tauh lut.
.
Goal an thun hnuah Aizawl FC an phur a, goal thun belh tuma nawr zui nghalin minute 86-ah William thlaktu Japanese forward Yugo ball vawrh tha zet chu Dodoz chua umlutin defender pakhat a bum huah Andrei tan a pe a, Romanian midfielder hian goal kir sirah mawi zetin a pet lut. He goal a luh hnu hian awlsam takin Aizawl FC an chak mai dawn emaw tih laiin hun pekbelh minute 5-ah Aizawl FC defender tihsual nang chingin Khosla chuan goal ruakah a thun a, an siphurh sut then mah se goal dang thun lehna hun a awm tawh lo a, Aizawl FC in hnehna an chang ta a ni.
.
Enge hmabak ?
.
Tihian, Aizawl FC hian point sarih hmu tawhin December 31 hian Gokulam an hmachhawn leh ang. Minerva Punjab in point 13 an la hmu rih a, January 6-ah Gokulam bawk an hmachhawn ve bawk dawn a ni.
.
ZoFooty Statistics:
.
Aizawl FC 2-1 Minerva Punjab FC
61% Ball Possession 39%
11 (7) Shots (On Target) 7 (2)
459 (344) Passes (Completed) 230 (153)
14 Fouls 16
1 Offsides 1
5 Corner Kick 5
1 Yellow Cards 2
0 Red Cards 0
.
MOM: Leonce Dodoz (Aizawl FC).
.
Powered by Darchiauva Hardware, Mission Veng.
.
Enge an sawi ?

Aizawl FC coach Paolo Meneses chuan goal pawm loh chungchang sawiin goal ngei nia a ngaih thu a sawi a, chutih rualin referee thutlukna a sawisel em em chuang lo. Tin, I-League a vawi khat nana inlan Dinliana a khel tha a tih thu sawiin inhliam damkawr Andrei leh David te pawh a fak hle.
.
Chak ta lo zawk Minerva coach Khogen Singh chuan a player ten hmun sanga inkhel thang lo an nih avang leh artificial turf an hman than loh avangin harsatna an neih thu a sawi a, referee thutlukna chungchangah chuan amah chuan a hmuh chian loh thu sawiin Indian referee hrim hrim ten hmasawn an ngai nia a hriat thu a sawi bawk a ni.