HERO I LEAGUE: NAKTUKAH AIZAWL FC IN CHURCHILL BROTHERS MIKHUAL DAWN

Hero I-League khelh mekah naktuk hian champion lai Aizawl FC chuan an home game hmasa ber an khel dawn a, Goan club Churchill Brothers an hmachhawn ang.
.
Head to head:

Aizawl FC hian Goan club hi vawi thum hmachhawn tawhin an la hneh vek a, Season hmasa I-League-ah khan Aizawlah 3-1 a chakin Goa-ah 3-1 bawkin hnehna an chang leh a, Federation Cup 2017-ah 2-1 in Aizawl FC an chak leh bawk. Tun season-ah an vawikhat inhmachhawnna tur niin mualneitu lam tan chak a inbeiseiawm hle tura ngaih a ni.
.
Tun Season:

Tun season-ah Aizawl FC in match khat khel tawhin East Bengal nen 2-2 in an inhnehtawk a, point khat an la hmu mek. Churchill Brothers in match hnih khel tawhin an la chak lo ve ve a, goal an la thun lo bawk. Goan club hneh lohte hi Shillong Lajong leh Mohun Bagan te niin Lajong lakah sihnih faiin an tlawm a, Bagan lakah singa faiin an tlawm bawk. Tun season an match neih tawhte hi away vek niin tunah away-ah bawk an khel leh dawn a ni.
.
Point thum hmuh ngei kan tum ang – Paulo Meneses

Aizawl FC coach Paolo Meneses chuan vawiinah thuthar lakhawmtute kawmin Aizawl FC in, “Kan khelh dan ngaiin kan khel dawn.” a ti a, East Bengal lakah point khat an hlawhchhuah tawh avangin tunah chuan point thum hlawh ngei an tum thu a sawi. A player pawimawh Andrei Ionescu chu inhliam vanga a la inlan theih loh tur thu sawiin ani bakah hian S. Malsawmtluanga, Jojo leh Rochharzela te pawh an la khelh theih loh tur thu a sawilang bawk a ni.
.
Captain Alfred Kemah Jaryan chuan mipui te anmahni tawiawm leh turin a sawm a, fan-te chu mi 12-na an nih thu sawilangin, “Season hmasa ah ropui takin min tan thin a, Chanmari tantu an ni emaw, Chhinga Veng tantu an ni emaw, Zo United tantu an ni emaw, I-League a nih tawh chuan min tan turin an lo kalkhawm thin a, an lu sang taka chawia haw tir theih hi kan tum ber a ni.” a ti. “Anni tan kan khel a, club tan kan khel a, State pum tan khel a ni.” a ti bawk.
.
Tun hi kan insiamthat tanna ni rawh se – Alfred Fernandes

Churchill Brothers assistant coach Alfred Fernandes chuan tun season bul an tan fuh loh thu sawiin match hniha vawi hnih chak lo record chu thaichhiat na atan an hman ngei a beisei thu a sawi a, “Kan inkhel tur hi kan bultan dan chhe tak lak ata kan insiamthat tanna ni rawh se.” a ti. RG Stadium a inkhel tur hi a pawimawh zia sawiin season tawp thlenga an kal zel dan tur hriltu a nih theih thu a sawi a, player-te rilru hnual lutuk tur ven nan chak ngei an mamawh thu a sawi. Hei bakah hian away hlira an la khelh vang leh an match hnuhnung ber pawh tun Pathianni kalta mai a nih avangin player an chauh thu a sawi zauh bawk.
.
Naktuk hian chawhnu dar 2 ah Aizawl FC hian tun season a an home match hmasa ber an khel dawn a, entum an thathnem dawn avangin kal hma a finthlak ang.