Footballer ropui zingah mahni khelhna club hmelma/elpui lian zual club-a insawn an awm ve chawk a… Hmun khata sawi vek lovin, post khatah pakhat zelin kan sawi chho zeuh zeuh ang.
____
Kum 2007 khan Manchester khawpuia club ropui zawka ngaih pakhat chuan player pakhat an la lut a, ani hian kum hnih hnuah Manchester khawpuia club lian zawka inngai lamah a khelhna a sawn. A hming chu Carloz Tevez a ni.
Argentine striker hian a khelhna West Ham chu 2006-2007 ah a inham tan pui hram a, relegated team zinga sang ber aiin point 3 chiaha sangin an him. A tum leh a theihna1 ngaihtuahin Tevez hian West Ham-a awm zui zel turah a inngai lova, chhuah a duh.
Mahse, West Ham-in an lak luh danah thil kal tluang pangngai lo deuh a awm avangin buaina a awm chho va, a tawi zawngin sawi ila, FIFA leh CAS lam an inrawlh hnuah West Ham-in an lei laia a man dawngtu Media Sports Investment (MIS) lamin West Ham hi £2m an pe a, West Ham-in an chhuah zalen phal ta hram.
West Ham-a season khat chauh a hman hnuah Man Utd chuan kum 2 chhung loan-a khel turin kum 2007 khan an la lut a, kum hnih chhungin match 99 inlanin goal 34 a khung. Sir Alex-an permanent contract ziahpui a tum a; mahse, Tevez hian a duh lo.
A hnuah Tevez chuan a duh loh chhan sawi ve lehin, “Permanent contract ziah ka ngen ka ngen a. Mahse, Premier League leh Champions League-a kan champion hnuah pawh engmah a awm lo. Rome khawpuia UCL Final kan khelh (2009) thleng khan dawhkanah engmah min chhawp lo va (pen leh paper), mikhual awmin ka awm a ni. Chuvangin, khatih lai khan chhuak tura thu tlukna ka siam fel tawh,” a ti!
May, 2009 chho velah United fans tam takin Tevez la nghet turin club leh Sir Alex an nawr. Mahse, Sir Alex chuan Tevez chelh chu harsa turah a ngai lem lo a ni mai thei, “Engmah ka ngaithla lo, chanchinbu pawh ka chhiar lo. Tevez hi Man Utd player a ni tih erawh ka chiang,” a ti. Hemi hnu hian Tevez hi bench ah a thu ta zeuh zeuh a, a changin thlak a ni bawk.
Tichuan, amah beiseitu eng emaw zat awm karah, kum 2009 khan thenawm bengchheng Man City chu thlangin a zawm ta a nih kha. 1999 a Terry Cooke-an Man Utd atanga Man City a zawm hnuah, clun pahnihte inkara lut/chhuak hmasa ber a ni.
Man City in Tevez an lak luh hian, Manchester khawpui lun laiah billboard-a thu ziak lianpui hmangin an lo welcome a, chuta an ziah chu WELCOME TO MANCHESTER tih a ni!
