HPC CUP 2017 FINAL KHEL TUR A HRIAT TA – Lawmkima Hmar

High Power Committee (HPC), Lunglei leh Lunglei District Football Association tangkawp ten an buatsaih, 7th HPC Cup 2017, semi-final vawiina khelhah champion lai Electric Veng leh Rahsiveng ten final an lut!

Electric Veng 2-1 Pukpui FT
EV: C. Lalduhawma 28′, 84′
PP: Vanlalzuidika 90’+3

Man of the Match: C. Lalduhawma (Electric Veng)

Semi-final hmasa zawkah a zawna vawi 3 champion tawh Electric Veng tlak ni a thleng ngei dawnin mipui lamin ngai mahse, champion lai hian phu takin champion tura rinkai Pukpui lakah hnehna an chang.

Tui let hnua an that ber tum tawng mek Pukpui hian an midfielder Lalmuanawma Sailo leh Lalbiaknia Royte te hmangin midfield-ah rorel mahse, a pawimawh lai attacking third-ah an zuihral a, mual hmun thuma thena hmun hniha thuneihna chang chungin killer pass an nei thei lo. A kanga an bakk vawrh luh lah Lalhlima leh Johny-a an lo tauh ral zel si a, mipui beisei ang Pukpui hmuh tur a awm lo.

Ball chang tlem zawk Electric Veng in an nawr chhunah hlauhawm an siam thei zel a, Indian Junior Team-a lo tel tawh winger Duhawma’n buai nuaih karah minute 28-naah tauh goal in game awmze nei an khelh zawkzia a lantir a, ball pawt let nasa Pukpuiin a chhanletna tur nei lovin chawlhlawk an hmang.

Second half-ah pawh inkhel a danglam tehchiam lo, ball chang tamtu aiin ball tlem te changtu an hlauhawm zawk. Pukpuiin wing an hman tangkai loh avangin an goal nawr a na lo. Hun tawp na’n minute 6 chauh a awm tawh tihah dinglam sir atanga Ramtiama ball vawrh luh chu Duhawma bawk hian a thun leh, a chak zawk tur a chiang.

Pukpuiin goal thun lova hun tawp thlen duh lovin player position siksawiin an vai nawr a, hun pek belhah Navy Seal, Guwahati defender Vanlalzuidika chuan an si phurh a sut then a, goal dang thunbelh turin hunin a daih ta lo.

Electric Veng hi team tha tia sawi tur ni lo mah se an thisenah champion a beh tlat tawh avangin a zawna vawi 4 na’n an champion a nih pawhin thil mak a ni lo vang.

Rahsiveng 2-1 Zobawk AET
RSV: Benjamin Ramchanpuia 13′ (og), T. Rohmingsanga 90’+7
ZB: Robert Lalhmachhuana 76′ (p)

Man of the Match: Remruatthanga (Rahsiveng)

Inkhel mut tichhuak takah Zobawk South in Lianzama awm loh an tuar a, rokhawlhna a neih avanga inkhel bul tan thei lo Isaka awm hma chu an inkhualtelem a ni ber.

An khelhpuite laka inkhel thunun lo chunga sawp thin Rahsivengin team tha an khelh ni-ah an hun tha neih chhun hmang tangkaiin hnehna an chang leh a, player hraw pui pui nei Zobawk uiawm takin an tla. PHE FC vanglai daih tawha Remruatthanga kha vawiinah pawh hmuntina awm thei ang maiin a tal vel a, Man of the Match atan thlan a ni.

Inkhel dul takah Ramdina cross-ball chu Zobawk defender Bena’n an lamah ti lut palhin Rahsivengin hma an hruai thuai a, goal mouth action dang awm mumal lovin chawlhlawk an hmang.

Chawlhlawk hnu erawh a dang zar a, Zobawk midfielder TS Zadeng chu a awmna hmun tur dik takah awmin left-back Lalduhawma leh left winger Isak Lalruatpuia te hmangin vawi tam Rahsiveng tlarhnung an tih thaih zui.

Mahse, Zobawk hian harsatna an nei, chu chu Rahsiveng rawlthar goalkeeper Remlallawma leh goal ban an tang dun tlat kha a ni. Vawi 2 a goal ngei tura ngaih chu goal banin lo dang hramin a vawi thumna pawh goal chungkhamin uiawm thlawnah a lo chhuahsak!

Mahse, player nei tha zawk, fitness tha zawk Zobawkin inkhel an thunun tial tial a, mahse, an game a fing tawk lo. Centre forward tha tak Santosh Trophy meuh pawha Assam tana fehchhuak pha, boruaka a tluk awm lo Jessy Vanlalmuana nei reng chung siin hniam te teah ball an cross.

A nawra nawr bet ta na na na chuan an khelhthat zawk rah sengin Isaka’n penalty a hlawhchhuak a, free-kick specialist Robert-a’n goal-ah a chantir. He nau game putling tak khel hian 35 yards vel atanga free-kick petin goal a thun teuh thin hle a.

Minute 90 chhunga chak zawk an awm theih tak loh avangin Extra Time an thleng a, player leh fitness thlirin Zobawk dinhmun a duhawm zawk. Mahse, result in mi a bum!

Bench atanga lut Rohmingsanga’n sawisel tur awm map lova chiangin an hun tha neih hmasak berah goal a thun, Zobawk in nawr chhunzawm ve lehin long-range atanga an goal thun chu referee leh linesman te inrawn hnuah goal a pawm a ni lo.

Hemi hnu hian Zobawk game a mumal tawh lova, na taka nawr tumin bei thin mah se, Rahsiveng midfielder Daniel Lalnunpuia ball chelh theih an tuar lova, an game a muan phah leh thin. Rahsiveng sriker tlan chak Ramdinmawia’n keepr Nunfela awm tawh loh hnua goal ruaka a thun thelh kha a uiawm tak zet.

Champion tum ruh em em, Zobawk South in Extra time tawp thlengin an si phurh an sut zo thei ta lo va, tunhnai kum 2 chhunga HPC Cup-a player nei tha ber tia sawi ngam chu uiawm takin a kum zawnin semi-final ah an tla ve ve.
ge thil dang zawk?

Final Fixture
(Friday, June 16, 2017)
01: 30PM – Rahsiveng vs Electric Veng