HPC Cup 2018 : A RUH NO NO CHHUAKAH – Lawmkima Hmar

Ramthar 2-0 Pangzawl
RT : Lallianzuala 53’, Lalpekhlua 86’

Ramthar chuan an tiapuite lakah a hmawr bawktu tha an neih chhawrin thumvawr hmanga a chak zawk zawn hial ngai tur khawpa ngaih inkhelah hnehna an chang. A tawp khartu tha neih leh neih chu team pahnihte daidangtu niin a tawpa n result hriltu pawh a ni.

I-League a pathumna an hauh tuma Royal Wahingdoh player pawimawh Zosangkima chu Pangzawl tan player pawimawh niin tlar hma lama an inghahna lian tak, winger tuan rang Malsawma dan beha awmin Ramthar defender te venna hnuaiah ni dang angin a tal pit thei lo va.

Local football ngam tak, Chhinga Veng FC tana MFA Cup lo chawi tawh leh Assam League thlenga tawnhriat nei Hmingthanmawia’n kum dang phak lovin hun pawimawhah goal thuntute hming ziahkainaah a hming a chuantir thei lo.

Cherhlun 4-0 Rahsiveng
Cher : CS Rorelliana 21’, 69’; Isak Zodinsanga 86’; Lalchhanchhuaha 88’

Nikuma pahnihna hautu Rahsiveng chuan a hma kum aia sang thlen tum mahse an chalah chil hnawm sak a ni a, ‘Rahisveng ka ni tlat’ tiin paukhauh chhuah sateh mah se, rilru paukhauh piaha theihna leh thiamna lantir ngaihna phul hmun cham del chungah thil ropui an chhawpchhuak thei lo.

Mipa 11 leh 11 inhmachhawnna khelmual chhungah Khawchhak lung lum tur an sawia aia hlauhawm zawk khawchhak team lakah dawl zawrin an zawr a, chak phu zawkin hnehna satliah lo tak an chang.

Team thawhhonaa inghat, kum 2012 final a Hnahthial hneh lotu Cherhlun tan Rorelliana’n tlar hla lamah ro relin, an player tha neihte rokhawlhna an neih avanga a hruaikim thei lo na chungin an awm a nem phah chuang lo.
…
Quarter-final lut team 8 zingah hian College Veng chiah hi champion tawh niin Runners-up ni tawh pakhat Cherhlun an awm bawk a, Q/F-ah chak ve ve pawh nise team pahnihte hi semi-final a an inhmachhawn dawn avangin final lut ngai lo team-in final an lut dawn.

Han chhut thuakin College Veng, Luangmual, Pukpui leh Zobawk South ten semi-final lutin Luangmual leh Zobawk South an final mai lo’ng maw, tih chu ngaihdan lian tak a ni a. Amaherawhchu, football-ah hian chak chiang sa an awm thei lo va, rin loh zawk vawi tam an chak thinna niin zawl chhete nei lo tan chuan lo rin sawi ngawt chi pawh a ni chuang lo. Chuvangin ‘Pa chauhin a hria’ i ti mai teh ang.
…
Quarter-final Fixture :

(Friday, March 16, 2018)
11:00AM – Haulawng vs Pukpui
02:00PM – Sethlun vs College Veng

(Monday, March 19, 2018)
11:00AM – Zobawk South vs Ramthar
02:00PM – Luangmual vs Cherhlun

Semi-final :

(Wednesday, March 21, 2018)
11:00AM -Sethlun/College Veng vs Luangmual/Cherhlun
02:30PM -Haulawng/Pukpui vs Zobawk South/Ramthar