HPC Cup 2018 final : CHHIM KEITE vs KHAWCHHAK LUNGPUI – Lawmkima Hmar

(Friday, March 23, 2018)
1:15PM – Cherhlun vs Zobawk South
Live Telecast : JB Cable Network & Zonet

Naktuk hian Lunglei District-a Inter-Village Football Tournament ngaih hlut ber HPC Cup final chu khelh a ni dawn ta a, ‘Chhim Keite’ – Zobawk South leh ‘Khawchhak Lungpui’ – Cherhlun te an inhmachhawn ang. Hetianga thalaite hmakhaw ngaia sum thehchhuak thintu High Power Committee (HPC) an fakawm.

Hmanah chuan : Thuamluaia Muala Astro Turf an phah hnua Inter-Village Football Tournament hmasa ber khelhah Cherhlun hian final lutin vanduaithlak takin final-ah chhiat tak tak nei ngai lo Hnahthial kha 1-0 in an hneh lo hlauh.

An reh vang vang hnuah kumina rawn inlar lehin an chhe lovang tih ring mahila an lakah beiseina a sang lem lo. An match hmasa berah 11 daih chang changa Thaizawl chu thlan tui tam tak sengin 2-1 in an hneh hram a, mahse, khawpui team Barzarveng an hmachhawn meuh chuan 5-0 in an sawp thei tawh! Amaherawhchu, an khel fuh palh a niang a, tih turin team dawrawm tak tak Sazaikawn chu 1-0 a hneh chang changin, an chaka Round of 16 lut thei, chak mamawh Sekhum chu 6-1 in an sawp leh mai bawk!

Tichuan, Round of 16-ah nikuma finalist, ‘Rahsiveng ka ni tlat’ tia tu palzam mah duh ngai lo Rahsiveng chu 4-0 in an nghaisa a, Quarter-final ah an champion mai ang a, tih tur khawpa team inkhairual Luangmual chu 2-1 a tukzal lehin semi-final ah kum 2012 a Theiriat laka 3-0 an hnufum tawh hnua lehthala champion thei College Veng chu extra-time-ah 2-1 in an hneh leh bawk. An khingpuite mil tawk zelin an khel thiam a, team tha sawp a, team tenau an hreh hram hram thin hi an makna lai tak chu a ni.

‘Chhim Keite’ – Zobawk South hi tunhnai kum thum chhung khan player an neih that avanga champion tura rinkai an ni thin a, kum thum chhung a zawnin semi-final thleng vekin final thleng pha lo tawkin an tla chiah chiah zel a. Kum 2015 khan Electric Veng chu 1-0 in an hneh lo va, a kum lehah Electric Veng bawk tawng lehin penalty shoot-out ah an hneh lo va, tichuan, nikum khan Rahsiveng lakah 2-1 in an tlawm leh hlauh bawk.

Tun tumah hian football an ngainat hrim hrim avanga tun tuma rawn telte nen group khatah awm hovin insawpin bul an tan a, Hrangchalkawn chu goal hnih theuha an inchangkim turin 21-0 in an swp phawt a, chak beisei ngam lo chunga hlim taka khel Mualthuam South pawh 16-1 in an khawihhnang zui leh a, an group-a team tha ve tak Sethlun chu 3-1 hnehin Vanhne pawh 3-1 in an chungtlak leh bawk.

A stage sang chinah an chakna an hloh then a, Round of 16 ah buai nuaih nuaih kara Zoramliana goal lir teng teng hmangin 1-0 in Farm Veng an hneh hram a, Ramthar nen Quarter-final ah inhmachhawn zuiin chawlhlawk hmaa 3-0 a hma an hruai hnuah second half-a goal 2 an chhuah leh avangin hun tawp lamah an lungphu a rang hman viau. Kum danga an tlak thinna semi-final ah erawh an theihna pholangin a kim lova second half hun tam zawk khel chungin champion lai petchhuaktu, team phur tak Pukpui chu 2-0 in an hneh a, an goal an venghim tluan thei bawk. Hma an sawn zel tih a lang.

Team pahnihte chu : Khawchhak ramri depa awm Cherhlun game hi a ngan talh mai a, kawng herh leh ring herh dam chiang lo tana hmachhawn chi an ni lo. Ram dang nena inep rana awm, dawihzepte an tluk a, a huaisente an dinchhuahna hmuna awm an nihna chu mual chhungah an chaw lut a, an khelhah ‘tisa’ a tam a, zawi hneng hneng leh tih dem dem a amw lo.

Mahni goal venhim ringawt ngaihtuah a, himna ringawt thupuia nei chi an ni lo. Ball an chen veleh rang taka a sir tawn atanga nawr a, an centre forward te sut en atanga winger ten goal an thun thinna team an ni a. An game a rorum rualin nat der leh tluk mai mai duh lo mi, Oxygen hip luta Carbondioxide thawchhuak theuh theuh tia, a tlawm zawka tan duh lo bur niin an khel hian mut a tichhuak ngai lo.

Team game-a innghat an ni a, hetih rual hian final kalkawnga goal 9 lai thuntu an winger CS Rorelliana hmuh hmaih theih a ni lo va, Group Stage-a goal 5 thuntu hian Knock-out stage-ah goal 4 a thun thei a, boruak sang a zo. A sir tawn atanga Isak Zodinsanga nena an nawr chu lehlam tan dan chah huphurhawm tak a ni.

An tlarhnung phui chhan, defensive midfielder khansang, kum 17 mi lek Lalthankhuma, suspend a nih avanga inlan thei lo tur hi a tlukpui an awm dawn loh avangin an tuar hlek dawn a, Mohun Bagan Football Academy player hi an captain KC Biaksangpuiia nen QF leh SF a yellow card an hmuh ve ve avangin final-ah kan hmu dawn lo. Hetih rual hian suspend avanga semi-final a inlan thei lo centre defender Lalchhanchhuaha a rawn let thei dawn a, hming chhinchhiah awl Halelui-a nena an din dun chuan parda zar ang leka tawn tlang awlsam an ni hauh lovang.

Zobawk South hian kuminah hian tan la leh zualin coach atan SYS Football Academy coach Pu R. Lalmuankima an la a, hma an sawn.

Mizorama League sang ber MPL-a hming chhukai thiau Isaac Lalruatpuia, Laltlansanga Zadeng, Lallianzama leh Jessy Vanlalmuana te an nei a, tun tuma an player langsar ber erawh Assam League leh Lunglei Super League-a hming chher tak Robert Lalhmachhuana a ni. Tlarhnunga an player rinrawl, dam dapa khel thin, khawmual leh boruaka mai ni lo, tui hnuai thleng pawha paltlang har tak tur hi suspend a nih avangin final-ah kan hmu dawn lo. Zobawk South an champion lo a nih chuan Robert-a awm loh vang a ni ang.

BVT FC winger Isaac Lalruatpuia hian group stage-ah goal 15 lai thun mahse knock-out ah erawh a ke a chawl deuh a, goal khat chiah ala thun. Assam tana Santosh Trophy-a inlan pha ngat Jessy Vanlalmuana hmuhnawm mahse chawmtu a nei tha tawk lo va, Chanmari West forward Lallianzama hi a tha a, mahse, HPC Cup-ah erawh a lian zo thin lo.

Hei erawh hria ila, Zobawkah hian mahni chauh pawha inkhel kalphung her danglam bawih thei an kat nuk. A ni telin hma an sawn tih hai rual a ni lo va, Round of 16-ah goal khat chiah an thun theih laiin Quarter-final ah goal thum an thun a, semi-final ah phei chuan a kim lova thun rei tak khel chungin goal khat an thun belh theih bakah an goal thun 2 te an hum tluan thei.

A chak zawk tur inrinsiakin inchawi dawn ta ilang chuan, final thleng tura goal 21 thuntu Cherhlun lama phur taka ka dah chu rilru fima ka inngaihtuah hnuah la let lehin tun dinhmun an thlen theih na”na goal 49 thuntu Zobawk South lamah ka dah ang!!