HPC CUP 2018 THUNAWI – Lawmkima Hmar

HPC Cup 2018 Inter-Village Football Tournament chu khelh mek niin March 8, 2018 hian Group match khelh zawh a ni dawn a, team inthlitfim hma thil eng engemaw, titi phungleng ang deuhin vawrh mai mai teh ang. Tu pawi kan sawi em nang.

Team Naupang :
A team ang zawng chuan Zohnuai an naupang ber a, an team pumpui kum chawhrual chu 15.2yrs a ni. He team-ah hian kum 12-na hmang mek 3 awmin kum 14 a upa an tam ber a, 5 an awm. An coach (player ni bawk) Jacob Lalronghaka chu an zinga upa ber niin kum 20 leka upa a ni. Ani chhiar tel hian kum 18 tling tawh 4 chiah an awm.

*Kum 2015 khan team maksak Thlengang chuan HPC Cup hmang hian Mizoram mai ni lo khawvel deng chhuakin CNN-ah nen lam an chanchin hmuh tur a awm a nih kha. Khatiang deuh kha awm chho zel mahse khatiang em em kha chu an ni tawh lo thung.

Kuminah chuan Zohnuai hian Thlengang kha an ang ber a, ‘Thlengang of Lunglei’ ti ila, a awm lo hran lo vang.

1) He naupang rual team hi an VC ten entry fee pek sakin a bak chu anmahni an inngaihtuah a ni ber a, an game hmasa berah VC ațangin Refreshent senso tur an dil a, a hnu lamah chuan an inthlahrun avangin an dil chhunzawm ta lo.

2) Țawiawmtu an nei chaurau a, khawpui chhung team hian Spray pawh an nei lo!

3)Equipment an nei mumal lo va, Venghlun an hmachhawn țumin an player 5 vel laiin Shin Guard an nei lo. Yellow Card an hmuh phah. Pakhat phei chuan lehkhakhawng vuah a tum.

4) An player tam zawk hi School naupang niin zirna kalphung tharah an fail theih loh avangin an inkhel duh an tlan bo.

5) Hetiang hi an dinhmun ni mahse nuihzat chi an ni lo. Tun țuma talent haichhuah loh phochhuak nasa ber an ni hial ang. Group of Death-ah awmin chak result an neih a rinawm lo va, vawi 4 champion zawn tawh Electric Veng ‘A’ lakah 15-0 a tlawmin, Zotlang (7-0) leh Venghlun (7-1) hneh lo bawkin Thingsai an la khel dawn.

An left-winger kum 14 mi K.Lalramchhana mawlh hi a khel a hmuhnawm a nia o, naupang kawlhrawng hian Venghlun nena an inkhel tumin a zia a chhuah a, an âwm zawna Oxygen hîp pha awrh hian Venghlun player te hmaa ball thai kualin, an kapkara la lut a, a bum kual vel kha a hmuhnawm. Hemi țum hian goal a thun nghe nghe. An inkhelh dawn avanga a nghawnga Tatoo rawn siam chawp, an goalkeeper kum 14 mi tho Zosangliana nen khan player danglam bik an ni.

Insawpna :
Group match angah hi chuan an la inpawlhsawp a, insawpna pawh a thleng fo reng a ni. Kuminah hian Lallianzama (Chanmari West FC), Isaac Lalruatpuia (Bethlehem Vengthlang FC), Jessy Vanlalmuana (Ramhlun North FC), Laltlansanga Zadeng (Assam Electricity Board?), etc te kawltu hian Hrangchalkawn chu 21-0 teh meuhin an sawp a, hei hi kumin atan chuan insawpna nasa ber a la ni.

Hemi tuk hian Hrangchalkawn player te hian harsatna tawkin an motor pakhat, an thil pawimawh dahna chu a chhiat avangin player an kim theih loh bakah Equipment an nei kim lo va, hun engemawchen nghah an nih hnuah player 9 in bul an țan. 11 chuan bul tan thei se result a danglam ngei ang.

Hemi țum hian Isaac lalruatpuia’n goal 9 thunin match 3 ațangin goal 14 a thun ta a, goal thun tam ber a ni mek. Inkhel hi minute 14 a tihtawi a ni.

Khawpawn team an fakawm :
Tun țumah hian khawpui chhung player an fit loh tlangpui bakah an vengten an țawiawm țha tawk lo va, veng pakhat phei chu an VC ten chhuah phal lo mah se mahni intum chawpin an chhuak lui tho va, ‘Kan inhliam palh pawhin VC ten mawh an phur lovang’ ti ang zawngin intiamkamna neiin hming ziahtir an ni.

Khawpawn team (khawlian vak lo) te pawhin fans an nei țha a, eng hunah pawh, tu team pawh khel se an ințawiawm țha viau zel. Heng zingah hian nikuma Quarter-finalist, Subroto Cup 2017-a player 2 thawh thei, Ramlaitui chu an țha filawr a. Kum 2011 Census-a chhungkaw 111 awm a, mihring 550 awmna khua ațang hian an khelh apiangin thawmhnaw var inbel mual nghawrnghing tham fans an awm ziah.

Player țha ber :
Hei hi thlan har tak a ni. Indian Super League leh I-League match bakah I-League Second Division inbuatsaih lai a nih avangin player langsar an tel tlem a, tin, phai academy-a player awmte an haw hleih theih loh avangin kum dang angin hming langsar an tam lo.

Khelh tawh chinah chuan Sethlun player match thum a khelh ațanga hat-trick vawi hnih siam, assist vawi khat nei tawh PC Lalhruaisanga hian mit a la ber (mimal ngaihdan). A ke ding leh veilam a hman thiam bakah a hlei tling a, lehlam rilru tibuai thei tawk lekin a fet thiam lehzel bawk a..

Nuihzatthlak (inchhuah mualphona ni lo se) :
Sekhumin 2-0 a Țhaizawl an hneh țumin Sekhum hian Jersey 11 chiah an rawn nei a (an theihnghilh niin an sawi). Tichuan, substitution siam a ngai tho si. An rawn dil angin a chhuak turate jersey chu a lut turin a hak phalsak a ni a, jersey No. 15 ha a chhuak a, Jersey No. 15 ha tho a luh dawn avangin chhinchhuah uluk a ngai. Eg. Mual ațanga chhuak tur J-15 chu J-15 (A) tia chhinchhiah niin a jersey haa amah thlaktu tur chu J-15 (B) tiin.

Tichuan le, inthlak a ngai ta. Kekawr leh kawr inhak thleng a ngai. Mual chhunga awm zawk chuan mual pawna awm, amah thlaktu tur chu a kekawr hlipin a pe (boxer a ha), a kawr erawh ala hlip hman lo. Țan a na a, ball a nun leh mai bawk si avangin Fourth Official-in inkhel zui turin a ti, boxer (kekawr) nen a khelh a ngai. Mahse, a kap a lo țet. Awi! Mual chhunga awm ve si chuan a tlan loh theih si loh, kap hup chung chuan chetțhat ava har dawn em!

*Buarpui leh Rahsiveng inkhelh țumin Khuai rau chu mualah an rawn tla thla thut a, inkhel tihtawp lailawk niin khuai zuk hlau player te mualah an bawp țhap.

Enge an sawi :
“Deadball kha uar deuh rawh u, Deadball uar loh chuan goal a thun theih loh.” – Thaizawl Coach (2-1 a Cherhlun an hneh loh țuma a team te a fuihna)

“Ani hi school tlan bova rawn kal a ni sia, luhtir ve ila, nang chu next-ah i lut dawn nia.” – Zohnuai player (Venghlun an khelh țuma a sawi)

“Miin engzatin nge in chak loh, an tih chuan 2-1 (Two One) in kan chak lo tih tur.” – Hrangchalkawn player( 21-0 a Zobawk ‘S’ in an hneh țuma a sawi).

“Khatiang kha chu a goal sa nen pawh i thleng phal dawn em ni.” – Terema, Dawn Coach. (An striker in Theiriat laka goalkeeper chauh hmachhawn chunga a hun țha neih (clear cut chance) vawi 8 a bawhpelh țuma a sawi a ni.

Pu Terema hi player tam tak chherchhuak a, Indian Messi kan tih mai Lalchungnunga mi hmuh theih tura kaihhruaitu a ni).

Pic : Zohnuai team

Posted in Articles, Tualchhung.

Leave a Reply

Or