Hrileng kara khelh a nih avanga Covid HPC Cup 2021 tia thenkhatin a hming an phuah fiam HPC Cup 2021 final-ah Electric Veng chuan chawlhlawk hmaa TC Lalruatfela goal awm chhun thun hmangin si khat faiin Pukpui an hneh a, avawi 5 na’n an champion.
Tun tum final hi dream final an tih ang chi hi niin tournament tan hmaa a mi nawlpuiin champion tura an rinte zinga mi an final a, mit a tlai, beng erawh a tlai tel lo! Fans nei tha veng final-ah a hmunah inkhel entu an awm thei ta si lova.
A hmuna entu awm lo inkhel chu a changtunu awm lohna film ang mai a nihna chen a awm. Mual pawnah nen lam mipui pungkhawm tur vengin Police an duty. Mahse, hrileng leh Police-in Lunglei football ngainatute an dang seng lo! Mual hnaih In rel mek leh sak zawh tawh atang te, In chung remchang lai leh thingkung atangin inkhel entu haw haw tham an awm tho.
Inkhel an tan, longball dinchanpui thin Pukpuiin an khelh dan phung an thlak a, a lirin an khel ta daih! Tv Pazawna leh a naute an buai lek lek. Mahse, Electric Veng hi team nghet, khelh dan phung nghet nei an ni a, an buai rei lo.
Half chance an neih tawn zeuh zeuh hnuah Pukpui captain, Aizawl FC tlarhnung phuarkhwmtu ni mek Vanlalzuidika a chesual zeuh a, anmahni goal lam hnaihah ball a hloh. Electric Veng forward te phit chhuak thutin TC Lalruatfela’n a tlan chak zar zovin veilam sir atangin a la lut a, a goal zui. Tun tum HPC Cup-a Electric Veng goal thun 12 zinga 5 chu Indian Arrows forward thun hi a ni.
Tawnhriat ngah Pukpuiin an nawr let a, chawlhlawk hma lawkin penalty hmu ngei turah an inngai. Dinglam sir atanga a kanga ball an vawrhkluh chu Electric Veng captain Lalduhawma’n a khawih fuh ngei niin a lang. Mahse, Duhawma leh Referee Joseph Hmangaihzuala te inkarah player 2 an tla zep a, Referee an hliah! A pawi zo ta.
Second half tirteah Electric Vengin an sahuai an ser a, midfield khaikhawmtu Lalhmangaihsanga la chhuakin Lalrindika Ralte an dahlut. An game a that phah lo! First half an phak lo zawk niin a lang. An khelh dan pangngai longball-a let leh Pukpuiin an nawr bet a, senior striker Zonunsanga’n goal line bul chetah hun tha a nei. Mahse, Chanamri West FC striker hlui hi a ke a rang tawk ta lo; a pet hman ngei tura ngaih chu an thai sawn sak zeuh!! Awi ka nu, ka ui lutuk.
Didika’n half chance vawi 2 a neih hnuah throughball a um lut fuh a, defender zawng zawng a paltlang hnuah‘a goal sa nena pawha inthleng phal loh tur khawpa a hun tha elkhen chu engmah lovah a chan! A veilama chak taka rawn tlan ve TC-a chu naute tiin duhsak takin a pe leh; an rawn chilhbuai. Pe lo mahse TC-a hi Top Scorer a ni pha daih tawh tih a hriat loh vang a ni, ngaidam rawh u.
Hun tawp lamah Pukpuiin vanneihna an pai tak mialah tiin an player thlak kual mahse danglamna thlen thei player an nei lova, Electric Veng lawmin an au zui ta a ni.
Team pahnihte : Electric Veng leh Pukpui hi an squad a inchhah hleih bakah player an inneihthat hleih deuh. Electric Vengin bench-a I-League player Didika Ralte, East Bengal Academy player thin Henry Lalthazuala leh semi-final thlenga khel an midfielder tha mi Lalrinchhana te bench-a an dah theih laiin Pukpui erawhin mangang tawpa goal thun turin Goalkeeper atana an lo hman thuak thuak tawh player a hmatawnga an luhtir a ngai!
Hrileng avangin quarter-final atangin inkhelh hun sawn hma vek a ni a, chuvangin April 20 a final khelh tura ruahman pawh April 17 ah khelh a ni. Finalist te hian final atana inbuatsaihna ni khat chauh an nei. Chuti chung chuan Pukpui hian an system an thlak. Ni khat chhunga game thlak hman an nihna avanga an ropui rualin an thiam dan ber game an thlauhthla kha a uiawm.
B. Laldinthara chu Pukpui player langsar fal a ni a, free-kick pet thiam hian free-kick atangin tun tum tournament-a a goal 3-na a thun teuh hle. Electric Veng goalkeeper Lalthlamuana khan ava bengper tha tehlul em! Nakinah pawh a thlan lunga ziah lansak hial tham a ni.
Free-kick kha an hun remchang neih that ber a ni tih an hre lo nge Pukpui player te kha box hnaiha free-kick hlawhchhuak tum zawngin an tal lo hle. Duh duha hlawhchhuah ngawt theih a ni bawk si lo.
Electric Veng defence dinglam atangin ball a tlang fo tih an hmu nain nawrna lam bik nei lovin an bei zui a, an winger tlan chak thin Laldinsanga Royte leh Lalremsanga te duhthusamin an fit chhuak hman lo niin a lang bawk.
Electric Veng ball lakluhna awmchhun TC-a vengtu bik an awm lo kha a pawi bawk. Pu TC Chhandama fapa hi a chak fal a, Uipa tuai ang maiin a za zek zek bawk. Amah rinchhanin ball an la lut thin. A finishing a la tawih vak lo nain match 4 atangin goal 5 a thun thei. A nep lo. Pukpui hian amah vengtu tur bik, a zung tur thleng pawha umzui peih player nei se result a danglam mai thei.
Hun tawp lama setpiece (corner & free-kick) an hmuhin Pukpui an fing tawk lo. An centre-back khansang, ball kanga hlauhawm tak Zuidika leh Malsawmzuala chu a pettu zawkah an tang fo. Tunge lo tauh goal ang?
Electric Vengin second half tirtea Tea lachhuak a Didika an luhtir khan an game kaltluang lai a tithuanawp. Round of 16 atanga midfield inkawp fuh lutuk thiahin a awm a, a chak lo zawkah tang ta se chhuanlamah an hmang thei ang. Didika ball pet erawh sawisel tur a vang thin. Pheichheh-Dika nge nge.
Churchill Brothers midfielder Lalengzama (Zamzamtea) a khel tha. Ball a hloh loh bakah lehlam player ball per hlek a la hman zel a, an tumpui player te ball a chhuhsak tam bawk.
Electric Veng tlarhnung player H. Lalhlimpuia leh rawlthar left-back Lalbiakhlua an khel tha fal a, lehlam tibeidawngtu an ti. Hlima hi a jersey hma a puar deuh tawh nain Top Division-a khel tur khawpin theihna a nei a ni tih a lantir. A tlan phut phut lo; a thei tawh rih lo bawk. Mahse, a lu-ah ball a tla a, a kea ball-in a va fuh zel!! Amahah ball hip thei a awm ta em ni? Ball kal dan tur rang takin a chhut a, a lo danchahna hmun turah a lo awm thin.
An left-back Biakhlua kha kan hmu ang. Ha nau hi a fip rel a, a phiar fat a. Kham pang-a thing ding, To haw apianga thlipuiin a nuai ziah, a nuai thluk theih loh kham kova ding tlat ang hi a ni. A player ven, a u u u lehte rual vel tur Remsanga leh Dinsanga ten an awmna an han thlak thin tak nain a lak ata an talpit tam lo khawp mai.
Kum 2015-a goal 12 thuna kum 2016 a goal 17 thuna Top Scorer ni zui ta Lalchhanhima (Tetepuia) chu a position ni lo winger atan hman a ni. A khawr. TC-a nen an position thlak ta se tun ai hian goal an thun tam zawk ang em?
Engpawhnise, tum 2 result tha an neih tawh loh hnuah rawn champion pui thei Tv Pazawna’n hna ropui thawkin an veng tan chawimawina Nopui a hawn. Veng mipuite pawhin a thiltih ropui tak hre renga “A kawppui awm mi’ an zawnsak a hun ve ta e.
Tichuan : HPC Cup vawi 10 khelh tawhah kum 2014 hnu lamah Electric Veng hian vawi 5 final an lut tawh a, an la champion vek. Semi-final vawi 3 thlenga, vaiwkhat final lut tawh Pukpui an vanduai rih.
Pukpui fak loh theih loh an ni. Card an hmuh nasat thin avanga stage sanga player tha an chhawr theih loh avanga vanduai thin an ni. HPC Cup khelh hnuhnun ber 2019 khan semi-final an thleng. Red Card 2 hmuin Yellow Card phei chu 36 an chawi!! Kuminah erawh final thlengin Yellow Card 7 chauh an hmu! Red Card – Nil. Anni aia team discipline lama hmasawn an awm lo. FIFA-in a ngaih pawimawh lutuk FAIR PLAY AWARD an dawng thei hi a ropui hle.
Didika : Didika a rawn lang nawlh khan boruak a siam. Ani hi Baje Mual product a ni. Kum 2002-a, naupang fal taka U16 tournament a khelhpui Lalhlima te nen an khelho leh.
India ram huap pawha footballer lar e ti lovin a nupui ni ta Vanlalruati hian an nih chhoh vel lai khan inkhelh a thiam tih a hre lova, a lar tih pawh a lo hre ngai lo!! A thianten an hrilh! Kolkata Rickshaw driver hovin an hriat tehreng nen!
KG-I – VIII thlengin school an kal dun a, Middle School an kal lai phei chuan pakhatna an in nih chhawk thin. Didika pa Pu Rohmingthanga Ralte chuan an monu aiin a fapa hian tlemin a thiam thei zawk niin a sawi. A fapa a tan zawk chiang!
A tawp berah chuan : A thui ta deuh. HPC Cup kan buatsaih rual chiah hian Siaha-ah Maraland Cup an buatsaih a, 1-na lawmman Rs. 3,00,000 niin 2-na pawhin Rs. 1,50,000 an la dawng!! An 2-na lawmman hi HPC Cup champion te dawn aiin Rs. 50,000 laiin a la tam zawk. Buatsaih a nih tirh kum 2011 atang khan HPC Cup champion te hian Rs. 100,000 an la dawng char char. Kum 10 a liam ta a, ennawn a hun ve ta e.
Electric Veng 1-0 Pukpui (FT)
EV : TC Lalruatfela 17′
Man of the Match : TC Lalruatfela (Electric Veng)
Fair Play Award : Pukpui
Best Player : TC Lalruatfela (Electric Veng)
Top Scorer : TC Lalruatfela (Electric Veng)
Most Promising : Alan Ramkinlova (Ramthar)
