Lunglei District chhunga veng leh veng, khua leh khuate football-a inelna ngaihhlut hlawh ber HPC Cup 2021 chu April 6 atang hian Thuamluaia Mualah khelh a ni dawn ta.
Hrileng avangin nikum (2020) khan neih theih a ni lova, kuminah erawh a khelh dan phung tidanglamin neih a ni. Lunglei khawpui pawn Zone FA 6 ah Phase – I khelh niin a champion 6 te chuan Lunglei khawpui chhung team te nen Phase – II an khel dawn. Knockout veka khelh a nih dawn avangin match tin hi final tluka pawimawh a ni dawn a, vawikhat chetsual zeuh avangin team tha tak pawh pheh thlukin an awm thei ang.
Tun tumah hian avaiin team 24 an tel dawn a, HPC Cup neih hnuhnung ber (2019) a finalist Zotlang leh Zobawk South chu final hmaa insu thei lo turin seeded-ah dah an ni. Zone champion theuh theuh pawh an inthat hleih thei viau dawn a, tin, kum danga team hlauhawm ni thin South Vanlaiphai, Cherhlun, Hnahthial, Pangzawl etc te chu Hnahthial Dist-ah an awm tak avangin kan hmu dawn ta lo. A khawhar thlak ang reng.
LDFA hnuaia Zone-ah chuan Vanva Zone (Haulawng chhehvel) hi football thiam tamna a ni a, champion chauh an rawn khelh theih dawn si avangin team tha tak tak – Ramlaitui, Mualthuam North leh Zotuitlang te kan hmu dawn lo. An player tha thenkhat te erawh Haulawng tan an inlan dawn thung.
Chhim lam bial Ngengpui Zone atangin Tawipui South, Tlabung Zone atangin Tlabung, Lungsen Zone atangin Lungsen VC-I, Thorang Zone atangin Laisawral, De Zone(Buarpui) atangin Dengsur te an rawn tel dawn.
Tute nge champion ang? : Champion tur hi rin thiam an har khawp mai. Amaherawhchu kum 2015 (Electric Veng), 2018 (Zobawk South) leh 2019 (Zotlang) te ka ring dik!! Kum 2016 leh 2017 khan Pukpui champion ka ring a, vanduaithlak takin player nei tha tak chung siin an vanduai.
Kumin-ah pawh Pukpui hi an tha leh hle a, champion tura rinkai an ni. I-League player Vanlalzuidika’n a ho hman dawn a, attacking midfielder goal thun thei Lalmuanawma Sailo an chhawr thei bawk ang. Champion tih nena a hming an sawizawm fo Lalrozara Fanai chuan Pathian thu nen team a kaihruai a, team thar kan hmu ngei ang. MPL leh 1st Division level-a player tha tak an ngah.
Serkawn hi an camp rei tawh a, an coach Terema hovin thla khat aia tam an inkhung tawh. India ram huap academy chhuak Nuntluanga (Bengaluru & FC Goa), Duhawma (Chennai City FC), John-a (DSK), Ramdina (Hoffenheim, Germany), CVL Remtluanga (Odisha FC) leh HP Lalremruata (FC Goa) te an awm nawk. An naupang seng sawng nain an tha a rual a, an tawrhhlelhawm ang. Chutih rualin Lena Stadium-a practice nasa, Thuamluaia Muala inkhel tur an nih avangin mual zau zawkah an buai ang em? Kum 2015 khan Q/F an thleng a, a hnu lamah an chhuak lo, an tawnhriat neih tlem a lang lo a nih chuan champion thei an ni. Tin, an coach hi kum 2019-a Zotlang champion puitu a ni tih hriat a tha awm e.
Electric Veng hi player nei tha, HPC Cup-ah pawh a zawna vawi 4 ngawt champion thei an ni. Kumin hian player an nei tha zual a, I-League player 3 – Didika Ralte (Real Kashmir), T. Lalruatfela (Indian Arrows) leh Lalengzama Vangchhia (Churchill Brothers) te bakah HPC Top Scorer hlui & Ex East Bengal Tetepuia an nei. India tan pawha vawi tam lo fehchhuah tawh Didika inkhel hmuh tur a awm mai thei. Lunglei Dist aiawhin Badminton tournament a khel rih.
Electric Veng hian Russian return striker an nei, Henry Lalthazuala!! Ani hi East Bengal Academy atanga Russia-a doctor zir ta daih kha a nia!
Lunglei pawn atanga lo tel zingah Haulawng an tha ber. Aizawl leh hmundanga khel chhuak player an neih nual bakah an khaw chhehvela player tha, India tan pawha lo fehchhuak tawh thiau 3 – Laldanmawia (Ramlaitui), Lalchungnunga (Zotuitlang), Romalsawma (Mualthuam North) te an la.
Danmawia hi kum 15 mi a nih laia Subroto U17-a Mizoram aiawh pha, a hnua zu captain zui ta, AIFF Scout-in Brazilian defender tha Thiago Silva nena a tehkhin kha a ni. Goalkeeper atan pawh hmang se football huang a nih phawt chuan a buai lovang!
Romala hi a naupanna ngaihnep chi a ni lo. Kum 2019 Subroto Cup U15 Best Player leh Mizoram champion puitu ball sem vel hi chaw ei thulh thaka en inchhirawm loh tak a ni.
Chunga kan hria, India Messi tih hial khawpa vei hmang thiam a ni a, Hitler-a te ram Germany club Hoffenheim-a hun rei fe zu awm tawh kha a ni. Kum 2019 khan North East huap inelna Dr.Tao Tournament-ah he rawlthar hi a inlan a, Mizoram a champion pui bakah Best Player a ni.
Amaherawhchu, 9 field-a khel thang an nih avangin Thuamluaia Mualah an khawr deuh ang em tih chu zawhna a ni.
Tin, thil pawi tak, mit titlai hma tak tur ni si chu an match hmasa bera team tha Pukpui leh Haulawng an insu nghal tur hi a ni. Tuemaw zawk zawk hi an tla dawn.
Local tournament-a che chhe ngai miah lo College Veng chu Lalrempuia Fanai (North East United) chuan a rawn ho dawn a, Venghlun lamah Buanga of Indian Arrows leh Rohmingthanga Bawlte of Aizawl FC te an awm. Rohminga hi Aizawl FC-in I-League match hnuhnung bera 2-1 a Sudeva FC an hneh tuma goal a thun avangin a ‘confi’ sawt ang.
HPC Cup hnuhnung 2 a final lut v eve, kum 2018 champion Zobawk South hi sawi hmaih chi an ni lo. TS Zadeng leh Jessie Vanlalmuana ringawt pawh hi miin nei se khawdanga fehchhuah ngamna tur khawp an ni. Position tinah ‘E he’ tih tur khawpa player tha, an khawtual mi ngei an rawn nei leh dawn.
Champion lai Zotlang squad-ah a vanglaia India player tha, coaching lama kal ta Pu R. Lalmuankima a awm a, ani bakah hian Chennaiyin FC winger Lallianzuala Chhangte an ziak lut. Hrileng karah mual sira an ball sep lai hmu theia kan awm ringawt pawh hi dam man a awm hliah hliah.
Lunglei hi Mizoram football-a player tharchhuak tam ber an nih avangin player langsar hming sawilan tur a tam, kan sawi vek chuan a sei lutuk dawn a, ‘ka chhiar chhuak peih lo’ in ti leh palh ang.
Hei erawh hre tel ila : Tournament reng rengah champion tura rinkai an champion kher ngai lo. Kum 1994 World Cup-a Colombia thatzia te, an thlen san si loh dan te, kum 2002 World Cup-a France leh Argentina squad turu zia leh, eng teh ual an nih loh dan te kan hria ang. Pele phei hi chuan World Cup champion tur ala ring dik ngai lo hrim hrim!
Tun tum HPC Cup hi khawvela tournament upa ber FA Cup kalphungin, knockout system-in khelh a ni dawn a, FA Cup ang thovin beisei lawk loh result tamna tournament a ni thei ang.
Tichuan : April 6, 2021 chawhnu dar 01:00 hian a khuhhawn na’n palian anga chhal ngam loh, Palaihawl – Ramthar leh Bazarveng an inhmachhawn dawn. Tuemaw zawk zawk an tla ngei dawn, tla tur atan chuan an uiawm hle. A chak chuan inrintawkna an ngah sawt dawn. Ramthar hian HPC Cup-ah record an nei tha zawk.
Kum 2015-a Thlengang team, player 8 nena tournament rawn hmachhawn te phei kha chu CNN Sports-ah an chanchin tarlan a ni hial!
Thil hmuhnawm, mit titlai thlir duh tan Thuamluaia Mual pan mai tur a ni e.
