HPC CUP-AH ELECTRIC VENG ENG A CHUAI TA – Lawmkima Hmar

Lunglei; March 12, 2018 : Vawiin khan HPC Cup 2018, Inter Village Football Tournament, Round of 16 chu Thuamluaia Mualah khelh tan niin inkhel 3 a awm a, a zawna vawi 4 champion tawh Electric Veng (A) chu petthlakin an awm.

Vawiin hian Zophaia ‘Zofate Chawlhbuk’ sak tum Mizo zirlai leh Journalist ralthuam pawh keng lote, Assam Police in rawng taka dimdawina pawh nei lo va, kut an thlak duhlohna leh hliam tuarte tawrhpui nan player zawng zawngin Ribbon dum an hreng vek a, inkhel entu engemawzat leh official ten thawmhna dum an inbel bawk a ni.

Haulawng 1-1 Theiriat (FT)
HL : C.Lalengliana 47’
TR : C. Zomuankima 45’+1

*Penalty shoot-out-ah 3-2 Haulawng an chak.

Lunglei khaw pawn atanga team tel 13 zinga knock-out round lut 4 zinga pakhat Haulawng leh an tiapui Theiriat inhmachhawnin Haulawngin hlauhawm vawi hnih an paltlang hnuah kawngka zim atangin Quarter-final an lut.

Theiriat tan chawlhlawk hma hun pekbelhah Zomuankima’n thunin hei hi second half tirteah Haulawng tan player daihzei Engliana’n a sut. Team pahnihte chak tumin innawr tawn ngiang mahse goal dang a luhzui tak loh avangin penalty hmanga a chak zawk chinfel a ngai zui a.

Penalty shoot-out-ah hian Haulawng tana pet hmasa bertuin a hlah avangin dinhmun chhe takah an ding hman a, amaherawhchu, Theiriat hian a zawna vawi 3 ngawt an hlah zui ve tak avangin Vanva Zone champion lai hian 3-2 in hnehna an chang ta a ni.

Ramlaitui 1-2 Sethlun (FT)
RLT : Lalhmunmawia 73’
ST : C.Lalruatfela 31’(p), 69’

Lunglei khawpawn team hlauhawm Ramlaitui vanduai ni a thleng a, thim thuahhnihin a bawm niah, team pahnihte goal thun lova an inhnehtawk mek laiin an captain Dinpuia’n vawi hnih lai penalty a hlah. A mak a na!

Sethlun hian hranghlui chan chang mek, kum 1998-a Christian High School, Serkawn (tuna BHSS ni ta) a pawl 8 zir tawh, Ruatfela hmangin chawlhlawk hmain penalty atangin hma an hruai a, a bet zawka tang chungin minute 69-naah an belchhhah. Inkhel tawp na’n minute 17 a la awm tihah goal thunna remchang a lo thlawna vawi tam tak luanral tirtu Ramlaitui tan Hmunmawia’n an si phurh a sut then.

Mahse, mi lian pui pui awmkhawmna Sethlun team an tangkhawng a, an goal an venghim tluan. Dinpuia’n Sethlun goalkeeper J.Lalruatkima hma a team te dinpui zo lo va, vawi hnih teh meuh a penalty pet dansak a nih avangin Gallery khata Ramlaitui tantu kalkhawm ten mittui nen mual an chhuahsan a ngai ta a ni.

Electric Veng ‘A’ 0-2 Pukpui (FT)
PP : Laldinsanga Royte 82’, R. Lalrosanga 90’+2

Player neihthat lama nikum phak lo Pukpui chuan vawi li champion tawh Electric Veng chu hneh theih an ni tih thiltiha lantirin tlai thim dawn hnaiah Pu Rosanga te pafa goal thun hmangin si hnih faiin an hneh!

HPC Cup-a a zawna vawi 4 champion a, Inter-Branch YMA Football Tournament champion lai hian MPL5 a Best Defender Lalhlimpuia nei mahse an goal a him lo va, East Bengal striker Lalchhanhima (Tetepuia) awm loh hnuah goal tlakchham avangin meikhupin an zinkawng an zawh tawp.

Electric Veng hi Group of Death-ah awmin team tha Venghlun, Zotlang, Thingsai leh Zohnuai te hneh fai veka group leader nihna hauhtu an nih avangin an lakah beiseina a sang a, hun tawp lama an theihna lantir thinte hi huntawp lamah tukzalin an awm!

Pukpui hian nikum phak lo mahse team chhia an ni lo va, an fitness avanga fak hlawh thin tan Assam Electricity Board defender Lalzuidika leh Zo United defender rinrawl Puipuia te chu an himna kulhpui an ni. Second half tir lama an manager ni thin, kum 46 mi Pu Rosanga an luhtir chuan fiamthu thawhna a ang lek lek a, game pawimawh taka a lut chuan mak tih hlawh mahse a lo mak lo.

Pu Rosanga hian tlar hma luahin a fapa Dinsanga’n veilam sir atangin a chawm a. Inhnehtawk taka inhmachhawn a, penalty hmanga a chak zawk chinfel a ngai mai dawna a lan mek lai, hun tawp na’n minute 8 chauh a awm tawh tihah Dinsanga hian goal a thun ta. Electric Vengin an nawr na zui hle, mahse, hun pek belhah an nawr nasat luat tuarin HPC Cup-a goal thuntu upa ber ni turin Pu Rosanga hian an goal hnihna a thun a, HPC Cup-a Electric Veng rorelna tihtawpin a awm ta a ni.

Khelh hmabak :

Naktuk March 13, 2018 (Tues) hian Round of 16 match 3 khelh chhunzawm a ni leh dawn a, zing dar 9:00 Thuamluaia Mual an Home Ground-a chhiar ve ve College Veng leh Bazarveng inhmachhawnin, chhun dar 12:00 ah player tha rual fuankhawmna Zobawk South leh chhiat tak tak nei ngai lo Farm Veng an inhmachhawn ang, chawhnu dar 3:00 ah Mohun Bagan midfielder hlui Tetea Tlau hova fehchhuak Zotlang leh Mohun Bagan Academy player 2 – KC Zothanchama leh KC Larchhuakmawia te kawltu, 2nd Battalion MAP hmunpui Luangmual an inhmachhawn bawk ang

Posted in Ramchhung, Tualchhung.

Leave a Reply

Or