Independence Day Football Tournament Final-ah Chanmari FC 2-1 a hnehtu Aizawl FC leh FC KUlikawn 3-1 a hnehtu Mizoram Police te naktuk dar 2:30 hian A.R. Lammual-ah an inkhel ang. Heng team pahnih te hi Group A-ah an awm dun avangin an lo inkhel tawh a, Rajiv Gandhi Stadium-ah 1-1 in an in draw a ni. Final-ah erawh A.R. Lammual-ah an inkhel dawn a, inkhel hmuhnawm tak tura ngaih a ni. Closing function erawh dar 2:00 a tan tur a ni a, thutna tha chang duh tan chuan kal hma a finthlak viau awm e.

Hmanah chuan…
Aizawl FC hi tun hnai maia club ding an ni lova, kum 1984 khan din a ni tawh a. Chumi anih avang chuan Independence Day Tournament NOMAWI pawh hi an lo kawl ve ran tawh a ni. Kum 1988 leh kum 1996 te khan an lo Champion tawh a, kum 1996 khan Final-ah Republic Veng GSA hnehin an Captain chu kha tihlaia player tha J. Lalmuanpuia (Muanpuia) a ni. Aizawl FC tharah erawh Muanpuia te hmuh tur awm tawh lo mahse tunhma Aizawl FC ang bawkin player tha awm thei ang chu an la lut zel avangin team tha ber zinga chhiar tel nghal an ni. Hemi anih vang hian club din thar leh hnu I-Day football Tournament (2011) awm hmasak berah telh nghal an ni a, mahse vanduai thlak takin first round-ah an tla thung. Kumhnihnaah erawh final an lut a, team tha an ni tih an nemnghet chiang viau awm e.

MRP FC pawh hi Mizoram Premier League awm dawn vanga club thar a tih theih a. He club erawh hi chu an thar dan a dang deuh a, MPL-ah 1st Bn MAP leh 3rd Bn MAP tana hmun a awm loh avangin MRP FC a inzawm khawm an ni a, player tam zawk hi 1st Bn MAP FC club ami te an ni.

I-Day 2011-ah khan 1st Bn MAP te hian Semi Final an lut a, Royal Wahingdoh hneh ta lo mahse Mizo Club zingah chuan a tha bera chhal ngam an ni. 2010-ah erawh 1st Bn MAP leh 3rd Bn MAP te hi Second Division-ah an awm ve ve a, hemi anih avang hian I-Day Second Division Football tournament zawk an khelh a ngaih phah a, heng team pahnih te hi final lutin 2-2 a an in draw hnuah 1st Bn MAP hian penalty shootout-ah 7-6 in hnehna an chang a ni. 2010-ah First Division I-Day tournament a Champion pawh 1st Bn MAP Football Academy annih tho avangin Police te hi Local Football-ah chuan an chungnung hle a tih theih awm e. Chutihrualin Academy erawh hi chu an dang deuh th hriat a tha.

Tun Tournament bikah tunge tha zawk!
Aizawl FC hi MPL Playoff khel zo hlim annih avangin match fitness an neitha a, chutihrualin he playoff vang hian harsatna an tawk ve bawk. Playoff a an player te chet mawiloh avangin an player leh club enkawltu thenkhat an hrem bakah player inhliam an nei bawk a. Chutihrualin kan sawi hmaih theih miahloh tur chu an player mai baka Aizawl FC an hrem hnuah hian result an neitha em em a, chakloh hmel an hmu tawh lo a ni. Tun tournament bikah hian an kheltha tawk lova, chutihrualin an result erawh a tha a tih a theih. An kheltha lo tih hian an chhia tihna lam a kawk lova, heng ang result emaw a aia tha emaw neiin hei aia thaa khelh theihna tur squad an nei tihna zawk a ni.

Mizoram Police erawhin Match Fitness an neitha tawk lova, team hnih atanga team khata insiam annih avangin Coach pawn player selection a tihfuh tawkloh chang a tam bawk. An player en chuan tun an thleng hi thil mak a ni lova, mahse an khelh dan en chuan tun dinhmun an thleng thei hi an vannei tih theihna lai a awm bawk awm e. Mizoram Police hi Aizawl FC ang bawkin an squad a chak tha em em a, Aizawl FC ai pawha an that zawkna chu experience an ngah zawkna leh an puitlingna hi a ni.

Player chungchang!
Aizawl FC lamin an player pawimawh Ricky-a (Left Back) Semi Final a red card a hmuh avangin an chhawr thei dawn lova. He player hi player langsar tak tiha sawi tur ni lo mahse a pawimawh em avangin amah thlak zo an awm angem tih hi zawhna lian tak a ni. MPL Playoff-ah kha chuan Ricky a awm loh tum chuan Right back a awm Thomas an khelh tir a, Right Back-ah Zuala an khelhtir thung a. Mahse right back lama player tha tak Thomas-a te pawn Ricky-a chu an thlak zo lo a tih theih a. A thlak thei tura ngaih theih chu Zirtea hi a ni daih thung. Mahse hei chu Coach thu thu a ni.

Keeper-ah MS-a a awm hmel a, ani hi chu a ngaihtuah awm lova. Defence lam erawh Ricky-a awm dawnloh avangin sawi thiam a har a, Defence laia Dina leh Zohmaa (Tetea) te inkawp a tha a. Thomas-a pawh right back-ah a rintlak fu bawk. Half lamah Johny, Tluanga leh Francis te thlak zo tur an awmin a lang lova. 4-3-3 an hmang annih chuan anni pathum tan hi chuan hmun a awm hmel. Attacking lam erawh duhthusam a ni lova, Michael-a a form tawk lo mahse rin ngam a ngaih hmel a, chuti anihloh chuan a thlak thei tur chuan Captain Malsawmzuala leh Ramenga te an inhliam avangin Papuia chauh a awm thung. A sir lam pawh duhthusam a ni lova, Brandon-a naupanna a lang zeuh zeuh a, pressure sangah chuan Rammawia a hnawksak zawk anga. Brandon-a erawh second half lamah a thiamna leh thatna a phochhuah theih a rinawm bawk. Zorema erawh 1st Bn Academy player hlui anih angin a lut a ngai a, a chhan chu Academy hian 1st MAP hi MFA League 2nd Phase-ah khan an hnehloh a, a bakah chuan hnehloh an la nei ngai lo. Mak tak maia Academy player ten 1st Bn MAP player te an ngam tlat avnagin Zorema luh hi a fuh a rinawm.

Mizoram Police tan Rinchhana (Itana), Ropuia leh Remruata ten SemiFinal an khel theihloh hnuin an rawn let leh tawh dawn a. An lut nghal anih nghat chuan Semi Final a an defence mawng pawp pawh a phui ngei ang.

Keeper-ah Hriata a ngaihtuah awmlova. Defence awm dan tur erawh hriatthiam a har a. Ropuia, Remruata, Hruaia leh Itana te chu tha ber tura ngaih an ni.

Defenderte an rawn let thei annih chuan Sama Hnamte pawh midfield lamah a awm leh thei tawh anga, midfielder taima Ṭ-a nen an inkawp a rinawm. Winger pahnih Fakzuala leh Biaktea te chu chiang sa turin a ngaih theih a. Fakzuala ball thiamna leh Biaktea tlan chakna te hi lemlam pawl tan chuan dan huphurhawm tak a ni. Attacking lamah Fakawma hmel hmuh a la beiseiawm chuang lova, a chhan chu a elpui ber Chhuantlinga’n SemiFinal goal pui tak a khung vang a ni . Chhuantlinga kawppui tur erawh Valpuia a ni chiang anga, anni nek chhuak tur khawp striker hi MRP FC mai bakah club dang pawh hian an neilo niin a lang.

Independence Day Invitation Football Tournament
Programme
TIME: 2:00 PM, 13th August, 2012
Compere: Francis Paul (Gerrard-a Pa)
Welcome Speech : Lal Thanzara, President, MFA
Report : Lalnghinglova Hmar (Tete-a), Hony. Secy., MFA
Speech:Lal Thanhawla, Hon’ble Chief Minister
Kick Off : 2:30 P.M.