Independence Day Celebration Invitation Football Tournament khelh chhunzawm leh a ni a. Vawiin hi ni 4-na a ni a, match hnih bawk awm lehin match hmasa zawkah Chanmari FC-in 1-0 in Luangmual FC an hneh a. Goal awmchhun thuntu hi Chanmari FC Captain Rochhingpuia a ni a, penalty atang a thun a ni. Match hnuhnung zawkah FC Kulikawn-in 2-1 in Oil India Ltd. (Duliajan), Assam an hneh a. FC Kulikawn tana goal thuntu hi Red Ribbon Top Scorer B.Zoramthara a ni a, goal hnih a thun a. Tin, Oil India Ltd. tana goal thuntu hi team Captain Ruata a ni a, penalty atang a pet goal a ni.

First match : Luangmual FC 0-1 Chanmari FC
(Rochhingpuia 2′)

Chanmari FC hi team naupang te an ni a, nikuma din chauh kha a ni a. Luangmual FC erawh 1955-a din daih tawh kha a ni a, kum 57 zeta upa a ni thung. Chanmari FC hian an match hmasa berah FC RS Annexe an draw a, point 1 an hmu a. Luangmual FC erawhin Kulikawn FC an hneh a, point 3 an hmu thung.

Tute nge khel?
Luangmual FC : Saitluanga (Keeper), Ruatdika, Mamawia, Ruatthara, Felpuia, Lalmama (B-a), Rsa, Isaka (Denga), Dinliana (Biaksangzuala), Puitea, Mka
Chanmari FC : Danny (Keeper), Mpa, Thangpuia, Rinchhana, Zomuana, Chhinga (Hlutea), Msa, Somtea, Tluanga (Rammawia), Lawmtea, Dawngtea (Tata)

Inkhel chanchin
Inkhel tantirh atang game a tang nghal a. Chanmari FC hian hmatawngah pathum an rawn dah a. Lawmtea, Dawngtea leh Tluanga te an awm a. Tata erawh bench-ah an thut tir a. Luangmual FC lamin Puitea, Dinliana leh Mka te an rawn hmang leh a. Chanmari FC lamin bul an tan tha a, an striker te an che rang a, Tata aia Tluanga an dah lut an tifuh a. A chhan chu Luangmual FC defender thate chhaihbuai thei tur chuan striker sang leh chak an ngai a ni. Luangmual FC defender Mamawia’n Dawngtea a titlu a, minute 2-na lekah Chanmari FC lamin penalty an hmu a ni. Captain Chhinga a rawn penchhuak a, chiang takin a rawn pet goal a ni.

Luangmual FC lamin hneh an inrin zawk avangin si an phur hi an chiai phah a tih theih a. Duh angin an nawr thei bik lova, Chanmari FC lam lahin rin aiin an ngam a, counter attack leh set piece-ah an hlauhawm thei hle a ni. Luangmual FC lamin penalty an hmu veleh a, Captain Mamawia a rawn penchhuak a. An lama penalty chawitu a ni a, a pet goal chuan a hmingchhe tur a rawn hliah dawn tih a hria a. Mahse, a pet goal lo hlauh mai. Chanmari FC Keeper Danny-a’n mawi takin a saved hlauh a ni.

An innawr tawn a, Chanmari FC players te an thawkrim a. Chutih rualin Luangmual FC lam an tangulh deuh emawni aw a tih theih a. Game a tang a, players te pawh red card hmu lo tawk velin an han innawr leh deuh zak zak a. Game hmuhnawm tak a ni a, half chance hmuh tur a tam khawp mai. Mahse goal dang a luh belh lova, 1-0 in Chanmari FC an chak ta a ni.

Sawi zui ang
Mi tam tak chuan Chanmari FC hi club naupang an la ni a, chuvang chuan club hlun leh players nei tha, season hmasa pawha I-League 2nd Division qualifying khel pha Luangmual FC hi an hneh an ring lova, an match hmasa berah 4-1 ngawtin Kulikawn FC an hneh bawk nen. Mahsef football hi zawng a ropui a, chak tur zawk sawi lawk theih a ni lo a ni. Chanmari FC lam hian Tata aia Tluanga an luhtir an tifuh a, Luangmual FC defender te chhaih buai tur chuan players cherang leh fit a ngai a ni. Chutih rualin Luangmual FC defence a pherh hle bawk. Champion an tum anih chuan an inenfiah deuh chu a ngai ang. Chanmari FC players leh coaching staff te an fakawm a, an thawkrim a, an game plan a fuh a, an chak phah a ni. Luangmual FC lam hian players an nei tha a, an fitness pawh a tha a, an inpuahchahna pawh a tha a. Mahse vawiinah lamah erawh an khel tha lova, he an chak lohna hian an siamtha ngeiin a rinawm. Tihian tun dinhmunah match 2 ve ve an khel tawh a, Chanmari FC hian point 4 an hmu a, Luangmual FC lamin point 3 an hmu thung.

Second match : Oil India Ltd. 1-2 FC Kulikawn
(H.L Ruata 19′) (B.Zoramthara 8′ & 65)

Oil India Ltd hi Duliajan, Assam Club an ni a. Mizo players pahnih Zaidinmawia leh Remruata te an awm a. Tin, Mizo hnahthlak, Halflong a mi, Matthew-a a awm bawk a ni. Club tha tia sawi tur em em ni lo mah se club pangai tak erawh an ni thung. Zaia, Birjab leh Raju te hi India tan Junior level vela lo khel tawhte an ni. FC Kulikawn erawh Mizoram club hlun leh tha an ni a. Match hmasa lamah Luangmual FC lakah an mualpho tawh a, chuvang chuan chak an tum hle a ni. Squad pawh an siksawi nasa a, Luangmual FC an hneh lo tuma players 6 ngawt bench-ah thuttir a ni.

Tute nge khel?
Oil India : Jitu (Keeper), Mithun, Raju, Biplob, Sishu, Zaia, H.L Ruata, Wary, Jayanta, Manas, Birjab
FC Kulikawn : Sawma (Keeper), Chullova (Lachuma), Zama, Notea, Nunpuia, Bobby (Tluanga), Pipi-a, Valtea, Tluanga, Hnehzova (Angaia – Keeper), Thara

Inkhel chanchin
FC Kulikawn players te fitness a tha a, an inpuahchahna a tha bawk a. Inkhelh tantirh atang an game a rang nghal hle a. Oil India Ltd. lam hian an rawn kal dawn tih hi an hre har a, an hriat velah an rawn kal a, tournament tan hnuah an rawn thleng chauh a. Mizo player Zaia’n ZoFooty a hrilh danin khua a chhiat avangin an practice ngai loh thu leh practice miah lova an rawn kal thu a sawi a. Hei vang hian an khel enin an fitness a chhia tih pawh a hriat hle.

Inkhel tan atanga rei lo teah FC Kulikawn-in free kick an hmu a. Minute 8 naah Red Ribbon Top Scorer B.Zoramthara rawn pen chhuakin mawi lutukin a rawn pet goal a ni. Minute 19 naah Oil India Ltd.-in penalty an hmu a, Kulikawn keeper Sawma’n Oil India Striker Manas a titlu a, red card a hmu a, penalty a chawi bawk . Oil India Ltd. Captain Ruata’n mawi takin keeper a bum a, a pet goal a. FC Kulikawn hi a kim lo zawk ni mah se an tang thei hle a, an fighting spirit a tha a, players leh coaching staff te an fakawm hle a ni.

Oil India players te fitness a tha lo bawk nen, a tam zawk ni mah se an nawr hlei thei lova, FC Kulikawn players te an tang hle a ni. A kimlo zawkin minute 65 naah an ti goal leh a. B.Zoramthara bawkin through ball tha tak a hmu a, a pet goal a. 2-1 a ni a, Oil India lamin chak tumin an nawr a, mahse a fit lo zawk an nih avangin FC Kulikawn players that e an su tlang thei bik lova. Goal dang a luh belh tawh lova, 2-1 in FC Kulikawn an chak a ni.

Sawi zui ang
Nimin lamah Dinthar FC in I-League khel tur club ONGC an hneh thu kan sawi tawh a, vawiinah pawh Mizoram club-in club hlun leh players nei tha Oil India Ltd. an hneh leh tlat mai ! Hei hian a entir chu Mizoram club te hi an tha tawk a, players te pawh an tha a ni tih hi a ni. Exposure tha neiin sum chu nei deuh ila chuan hei ai hian kan thleng sang ngei ang le. Kumin atang MPL a awm dawn a, kum 4/5 hnuah te chuan kan ropui tawh khawpin a rinawm.

Vawiinah pawh FC Kulikawn te hi a kim lo zawk an ni a, heti chung hian an chak thei a, an players te an fakawm hle a ni. Chutih rualin Oil India Ltd. Mizo player Zaidinmawia chuan inkhelh hmain heti hian ZoFooty a hrilh. “Artificial turf-ah kan khel ngai lova, kan vawikhat khelhna te a ni hlawm a, chuvang chuan khelh harsa an ti khawp mai. Natural grass leh lei chara khel thin kan ni a, Lammualah hian khelh a har kan ti a. Tin, vawikhat pawh kan practice lova, kan fitness a chhia a, chuti chung chuan kan rawn kal thova. Fit lo mah ila champion chu kan tum dawn a ni” tiin a sawi.

FC Kulikawn hian an match hmasa berah Luangmual FC an hneh lo a ni a, tunah erawh kim lo zawkin Oil India an hneh thei a, an rawn phur thar khawp ang le. Coach-in squad a siksawi fuh a, an chakpui a tih theih. Mizoram football a thang a, hma kan sawn a ni tihin duhtawk phawt ang.

(Zanin khan Admin te’n Footballer Lalrozama Fanai te kan ral a, internet mumal lo bawk nen , inkhel review hi kan rawn tichhuak thei lawk lova, ZoFooties te hriatthiamna kan ngen a ni e.)